თუ ექსპერტებს დავუჯერებთ, ფსიქოლოგია დიდ როლს თამაშობს როგორც ვებგვერდის, ისე კონვერსიის მაჩვენებლების ოპტიმიზაციის (CRO) საკითხებში. შესაბამისად, დიზაინში, კონტენტში თუ თქვენი ვებგვერდის მომხმარებელთა გამოცდილებაში (UX) ფსიქოლოგიური პრინციპების ჩართვა დაგეხმარებათ, ვიზიტორს ვებგვერდზე თქვენთვის სასურველი ქმედებებისკენ უბიძგოთ და ასე ბიზნესის ზრდაც უზრუნველყოთ. თუმცა მაინც ისმის კითხვა:
რატომ არის ფსიქოლოგია მნიშვნელოვანი ვებგვერდების ოპტიმატიზაციისას?
ზუსტად იმიტომ, რომ გადაწყვეტილებაზე მრავალი ფსიქოლოგიური ფაქტორი ზემოქმედებს — კოგნიტიური მიკერძოებები, ემოციური კავშირები, სოციალური თუ გარემო ფაქტორები. ხოლო, თუ ბიზნესები ამ ფაქტორებს სწორად მიუდგებიან, ვებგვერდის ვიზიტორთა პრეფერენციებსა თუ სურვილებზე მორგებასაც მოახერხებენ.
მაგალითად, როცა მომხმარებელს საიტზე შესვლისას პროდუქტის ან მომსახურების დადებითი შეფასება ხვდება, მეტი სანდოობა უჩნდება ბრენდის მიმართ. ვებგვერდები კი ვიზუალურად მიმზიდველი უნდა იყოს, დიზაინი ისეთ ფსიქოლოგიურ პრინციპებზე დაფუძნებით უნდა შეიქმნას, როგორებიცაა კოგნიტიური დატვირთვის შემცირება და ვიზუალური იერარქია, რაც შედეგად მომხმარებელთა კმაყოფილებასა და ჩართულობას მოგცემთ.
ვებგვერდის კონტენტის მიღმა არსებული ფსიქოლოგია
ფოკუსირების ეფექტი
ადამიანები გადაწყვეტილებებს მეტად დეტალურ და აშკარა ინფორმაციებზე დაფუძნებით იღებენ, შესაბამისად, აიგნორებენ ყველა იმ თანაბრად მნიშვნელოვან ინფორმაციას, რომელიც მათი თვალთახედვის არეში არ ხვდება. სწორედ ამიტომ, ვებგვერდისთვის კონტენტის წერისას შემდგომი საკითხები უნდა გაითვალისწინოთ:
- მკაფიოდ აჩვენეთ თქვენი ძირითადი შეთავაზებები ან ღირებულებები
- ინფორმაციების გვერდით CTA სტრატეგიულად განათავსეთ
- გამოიყენეთ მკაფიო სათაური, რათა ვიზიტორებს უთხრათ, რა განგასხვავებთ კონკურენტებისგან
- ხაზი გაუსვით თქვენს უპირატესობებს
- დაამატეთ ვიზუალურად მიმზიდველი სურათები
- აჩვენეთ მომხმარებელთა შეფასებები და სხვა სოციალური მტკიცებულებები
- უზრუნველყავით ინტუიციური ნავიგაციისა და მენიუების პროცესი
- საკონტაქტო ინფორმაცია მარტივად ხელმისაწვდომი გახადეთ
კოგნიტიური ეფექტი
ეცადეთ, შეამციროთ ხმაური თქვენს კონტენტში და გაამარტივოთ ყველაფერი, რაც შესაძლებელია. პირდაპირი ენის გამოყენებით მომხმარებლებს ეხმარებით, სწრაფად გაიაზრონ ის ღირებულება, რომელსაც კომპანია სთავაზობს მათ. ეს არა მარტო ჯანსაღ კოგნიტიურ ეფექტს უზრუნველყოფს, არამედ მათი ნდობისა და ერთგულების მოპოვებაშიც გეხმარებათ.
პრაიმინგის ეფექტი
ეს უკვე იმას გულისხმობს, რომ წარსულში მიღებული გამოცდილება ჩვენს შემდგომ მოქმედებებზე ზემოქმედებს, თუმცა ამას ადამიანები ვერ აცნობიერებენ. მაგალითად CRO-ს შემთხვევაში საუკეთესო იქნებოდა თქვენი ძირითადი CTA-ს მუდმივად გამეორება და ამ ენის შენარჩუნება. ეს მომხმარებლებს საშუალებას მისცემს, ყოველთვის იცოდნენ საბოლოო ქმედების შესახებ თავიანთ მოგზაურობაში, რასაც სწორედ პრაიმინგის ეფექტი აქვს — ამზადებს მათ მოქმედებებისთვის…
ილუზიური სიმართლის ეფექტი
ადამიანები ინფორმაციებს სიმართლედ უფრო მეტად მაშინ მიიჩნევენ, როცა ამას ხშირად უმეორებენ, შესაბამისად, ეს ეფექტი ვებგვერდის კონტენტის წერისას სანდოობის გასაზრდელად შეგიძლიათ გამოიყენოთ:
- ბრენდის შეტყობინების თანმიმდევრულობა — გამოიყენეთ ძირითადი შეტყობინებები, სლოგანები და ბრენდის ღირებულებები ვებგვერდზე, რათა ნაცნობობა და სანდოობა განამტკიცოთ.
- სარგებელზე ხაზგასმა — მუდმივად ხაზი გაუსვით მთავარ სარგებელს, რათა მათი მნიშვნელობა გააძლიეროთ.
- თანმიმდევრული დიზაინის ელემენტები — ფერთა პალიტრა, შრიფტები, ჩარჩოები… ყოველთვის ერთი გამოიყენეთ, რათა ნაცნობობის განცდა შექმნათ.
- სტატისტიკა და მონაცემები — უახლესი ინფორმაციებით კვლავ მომხმარებელთა ნდობას დაიმსახურებთ.
- Call-to-Action (CTA) — გამოიყენეთ მსგავსი და მკაფიო CTA ღილაკები, რათა მომხმარებლებს სასურველი ქმედებებისკენ უბიძგოთ.
სოციალური მტკიცებულება
რეალური მომხმარებლების გამოცდილების ჩვენებით, კარგი რეპუტაციის მქონე წყაროების დადებითი შეფასებებითა და რელევანტური სტატისტიკით ვებგვერდებს ნდობის მოპოვება, გადაწყვეტილების მიღების პროცესზე ზეგავლენა, დაბრკოლებების შემცირება და სანდოობის უზრუნველყოფა შეუძლია, რასაც კონვერსიის მაღალ მაჩვენებლებამდეც მივყავართ.
ვებგვერდის დიზაინის მიღმა არსებული ფსიქოლოგია
ესთეტიკის ეფექტი
ადამიანები ესთეტიკურ დიზაინს მარტივად გამოსაყენებლად თვლიან. როცა პროდუქტი ან მომსახურება ესთეტიკურად სასიამოვნო დიზაინითაა წარმოდგენილი, მის ავტორებს გამოყენების მცირე პრობლემებსაც მარტივად პატიობენ. შესაბამისად, თუ ვინმე გეტყვით, რომ რაღაც საიტზე უფრო ლამაზად გამოიყურებოდა, ისინი არ ცდებიან…
ნაცნობობის მიკერძოებები
ეს ვებგვერდის დიზაინში ისეთი ელემენტების დამატებას გულისხმობს, რომლებიც მომხმარებლებისთვის უკვე ნაცნობია, რაც ვიზიტორებისთვის საიტს მეტად კომფორტულსა და მარტივს ხდის. ნაცნობობის მიკერძოებების ვებგვერდის დიზაინში გამოყენება გეხმარებათ, მომხმარებელზე მორგებული გამოცდილება მათივე მოლოდინების დაკმაყოფილებით შექმნათ.
Hick-ის კანონი
ეს ფსიქოლოგიური კანონია, რომლის თანახმადაც დრო, რომელიც ადამიანს გადაწყვეტილების მისაღებად სჭირდება, მის წინაშე არსებული არჩევანის რაოდენობის მიხედვით იცვლება. შესაბამისად, აქ ვებგვერდზე არსებული არჩევანისა თუ ვარიანტების შემცირებას გვირჩევენ. უფრო კონკრეტულად, ნავიგაციის პროცესში ვარიანტების შეზღუდვას გულისხმობს და კონტენტის ლოგიკურ კატეგორიებად დაყოფას. ამასთან, თუ რაღაც ველების შევსებას სთხოვთ მომხმარებლებს, უმჯობესია, მათი რაოდენობა მინიმუმამდე დაიყვანოთ. იგივე პრინციპი ვრცელდება CTA-ზეც.
აქვე მომხმარებლებისთვის ინფორმაციების თანდათან გაზიარებაზე საუბრობენ, რომ პირდაპირ მთლიანი მასალა კი არ მივაწოდოთ, არამედ მისი მცირე ნაწილი, შემდგომში კი ფრაზა, რომ იხილონ დამატებითი დეტალები ან კლიკის დახმარებით სრულ ინფორმაციაზე წვდომა მიიღონ. როგორც ამბობენ, ასე მომხმარებლებს უკვე ჭარბი არჩევანის წინაშე აღარ ვაყენებთ და გადაწყვეტილების მიღებაც მეტად სწრაფად ხდება.
სიახლოვის კანონი
ვებგვერდების დიზაინში ეს კონტენტის ვიზუალურად დაკავშირებასა და ორგანიზებას გულისხმობს. დიზაინერებს შეუძლიათ, გააუმჯობესონ მომხმარებლის გამოცდილება ელემენტებს შორის ურთიერთობების ვიზუალური კომუნიკაციით, კონტენტის ეფექტურად ორგანიზებით, მკაფიო ვიზუალური იერარქიის ჩამოყალიბებითა და გვერდის სკანირების გაუმჯობესებით. ეს ყველაფერი მომხმარებლებისთვის ორგანიზაციის ვებგვერდისა და მისი სტრუქტურის გაგებას გაამარტივებს, დაეხმარება მათ სასურველი ინფორმაციის მარტივად პოვნაში.
ფერების ფსიქოლოგია
აქვე აუცილებლად უნდა ვისაუბროთ ფერების ფსიქოლოგიაზე მარკეტინგში, ჯერ კი უშუალოდ ის ფერები განვიხილოთ, რომლებსაც წამყვან ბრენდებს ვუკავშირებთ:
- წითელი — უკავშირდება ენერგიას, ვნებასა და აღელვებას, მას ხშირად ირჩევენ გართობის ინდუსტრიაში არსებული ბრენდები, მაგალითად ნეტფლიქსი.
- ლურჯი — ნდობასა და პროფესიონალიზს უკავშირდება, ძირითადად ფინანსურ დაწესებულებებსა და ტექნოლოგიურ კომპანიებში გვხვდება.
- მწვანე — ეს უკვე ბუნებას, ზრდასა და მდგრადობას მოიცავს, ხშირად გვხვდება ეკომეგობრულ თუ ორგანულ ბრენდებში.
- ყვითელი — ოპტიმიზმსა და ბედნიერებას უკავშირდება, იდეალურია მხიარული და შთამბეჭდავი რეკლამებისთვის, როგორსაც McDonald’s გვთავაზობს.
- შავი — დახვეწილობას, სიმდიდრეს და ექსკლუზიურობას გულისხმობს, რის გამოც მას პრემიუმ კლასის ბრენდები ირჩევენ.
- სტაფილოსფერი — ეს უკვე წითელი ფერის ენერგიასა და ყვითელის სითბოს აერთიანებს, ხშირად კი აღელვებისა და ენთუზიაზმის გადმოსაცემად გამოიყენება. დიახ, Fanta ერთ-ერთ მაგალითად შეგიძლიათ ჩათვალოთ.
ვებგვერდის დიზაინის შემთხვევაში CTA ღილაკების კონტრასტული ფერებით წარმოჩენას გვირჩევენ, მაგალითად ყიდვის ღილაკი ხშირად წითელ ან სტაფილოსფერ ფერებში გვხვდება, მენიუები ლურჯ ფერში, E-commerce ვებგვერდები კი კვლავ წითელსა და სტაფილოსფერს ანიჭებს უპირატესობას. დაბოლოს, ფერების ფსიქოლოგიის გააზრებით მარკეტერებსა და დიზაინერებს შეუძლიათ, ეფექტურად გადასცენ შეტყობინებები, დაუკავშირდნენ სამიზნე აუდიტორიას და შექმნან დასამახსოვრებელი ბრენდის გამოცდილება…
