Galler გახლავთ ბრენდი, რომელიც ასოცირდება საუკეთესო შოკოლადთან, რომელმაც მთელი მსოფლიოს გარშემო შემოიკრიბა შოკოლადის მოყვარულები. ის ქმნის გამორჩეულ ტკბილეულს, რომელიც სასიამოვნოა როგორც თავისი გემოვანი თვისებების გამო, ისე ვიზუალურად.
Galler-ის ისტორია ჟან გალერის სახელს უკავშირდება. ის, 1955 წელს, ბელგიის ქალაქ ლიეჟში დაიბადა. მის ბაბუას საცხობი ჰქონდა და ახალგაზრდა ჟანს შოკოლადისადმი სიყვარული სწორედ იქიდან გაეღვიძა. თავდაპირველად, სხვადასხვა კულინარიულ დაწესებულებაში მუშაობდა, თან პროფესიას ითვისებდა. სულ რაღაც 19 წლის იყო, როდესაც ბელგიის საუკეთესო შეგირდად დასახელდა. უნარების დახვეწისა და ცნობილ კონდიტერ გასტონ ლენოტრესთან გამოცდილების მიღების შემდეგ, ჟან გალერმა საკუთარი შოკოლადის შექმნას მიჰყო ხელი.
1976 წელს, ლიეჟის მახლობლად, პატარა სოფელ ვო-სუ-შევრემონში ჟან გალერის შოკოლადის პირველი სახელოსნო გაიხსნა. ასე დაიბადა Galler-ის ბრენდი. თავად ჟან გალერი სრულყოფილებისკენ დაუღალავი სწრაფვით გამოირჩეოდა. ის ფოკუსირებული იყო ისეთი შოკოლადის შექმნაზე, რომელიც არა მხოლოდ გემრიელი იქნებოდა, არამედ ვიზუალურადაც მოახდენდა შთაბეჭდილებას. მისმა სულისკვეთებამ, ინოვაციურმა მიდგომამ და დეტალებისადმი ყურადღებამ შედეგი გამოიღო და Galler სწრაფად იქცა მომხმარებლის რჩეულ ბრენდად.
Galler-ის გლობალურ წარმატებას ხელი რამდენიმე ფაქტორმა შეუწყო. მათგან უმთავრესი ბრენდის ხარისხისადმი ურყევი ერთგულება იყო. მსოფლიოს საუკეთესო კაკაოს მარცვლების მოპოვებითა და ბელგიური შოკოლადის დამზადების ტრადიციული ტექნიკის გამოყენებით, Galler-მა თითოეული ნაჭერი შედევრად აქცია. გარდა ამისა, კომპანიის ინოვაციაზე აქცენტირებამ ხელი შეუწყო უნიკალური გემოს კომბინაციებისა და ტექსტურების შექმნას, რომელმაც მომხმარებლები ძალიან მოხიბლა.
ბრენდის პოპულარიზაციაზე დიდი გავლენა იქონია მარკეტინგულმა სტრატეგიამ. ბრენდის ელეგანტურმა შეფუთვამ და პრეზენტაბელურობამ ის პრემიუმ პროდუქტად წარმოაჩინა. ეფექტური სადისტრიბუციო არხების დახმარებით, Galler-მა საკუთარი გავლენის გაფართოება ბელგიის საზღვრებს გარეთაც მოახერხა და შოკოლადის მოყვარულთა გულები მთელ მსოფლიოში დაიპყრო.
დღესდღეობით, Galler 170 შოკოლატიერს აერთიანებს და კვლავაც მოწინავეა შოკოლადის ინდუსტრიაში. ბრენდი აგრძელებს თავისი დამფუძნებლის მემკვიდრეობის შენარჩუნებას ისეთი შოკოლადის წარმოებით, რომელიც არის როგორც შესანიშნავი, ასევე ეთიკურად მოპოვებული. მაგალითად, ბრენდის გადაწყვეტილებაა, რომ კაკაოს მარცვლები სამართლიანი ვაჭრობით შეიძინოს და ამით ნედლეულის მწარმოებლებს შეუწყოს ხელი.
რუბრიკის „ყავასთან საკითხავი“ წარმდგენია Dunkin’.
