საქართველოს საკომუნიკაციო სააგენტოების ასოციაციის (ACAG) მიერ სააგენტოებს შორის გამართული პრინტ კონკურსის შედეგები ცნობილია! 15 მონაწილე სააგენტოდან, 1-ლი სამი ადგილი ABK-ს, Leavingstone-სა და Mr.Wolf-ს შორის გადანაწილდა. ნაშრომებს თავად კონკურსში მონაწილე სააგენტოები აფასებდნენ.
დავალების მიხედვით, სააგენტოებს, 2 კვირის განმავლობაში, უნდა შეექმნათ პოსტერი, რომელიც ასახავდა ავტომობილის გამონაბოლქვის მიერ ქალაქის დაბინძურებას და ვიზუალურად უნდა გამოეხატათ მთავარი გზავნილი – „გამართე ან გამორთე“ – „გამართე ავტომობილი შენი და შენი შვილების ჯანმრთელობისა და სიცოცხლისთვის!“
კამპანია ემსახურებოდა საზოგადოებაში ჰაერის ხარისხისა და ტრანსპორტის გამართულობის შესახებ ცნობიერების ამაღლებასა და ავტომობილების ტექნიკური ინსპექტირების შესახებ ინფორმაციის გავრცელებას.
