24
May
2017

“ღრუბლის არქიტექტორები” – ქართული ანიმაციური პროექტი, ცაში აფრენილი ბუშტების თავგადასავალზე

24 May 2017

ამბობენ, რომ ბუშტები, რომლებიც ცაში მიფრინავენ, ქალაქ LOOnciTy-ში ხვდებიან, სადაც მთელი სამყარო არის მათთვის მოწყობილი. იქ არ არის საზღვრები და ბუშტები, მთელი მსოფლიოდან, ტკბილად და საამურად ცხოვრობენ. მათ საყვარელი საქმიანობა ღრუბლების დაპროექტებაა, ამიტომ, ყველაზე გავრცელებული პროფესია აქ “ღრუბლის არქიტექტორობაა” და სწორედ ასეც ჰქვია მოკლემეტრაჟიან მულტფილმს, რომელზეც დავით მირცხულავა მეგობრებთან ერთად მუშაობს. ჩანაფიქრი, ჯერჯერობით, პროექტის დონემდეა მიყვანილი და სრულმეტრაჟიანი მულტფილმის მხოლოდ პირველ ეტაპს წარმოადგენს. ანიმაციაზე სააგენტო In Joy-ის გუნდი მუშაობს და აქ გაერთიანებული მეგობრები ცდილობენ საკუთარი სახსრებით გაუმკლავდნენ რთულ სამუშაოებს, პარალელურად, დაფინანსების წყაროებსაც ეძებენ. დეტალები In Joy-ს კრეატიული დირექტორის დავით მირცხულავასგან გავიგეთ.

M: მოგვიყევი ანიმაციის შინაარსსა და მთავარ პერსონაჟებზე…

სცენარის შექმნის იდეა გაჩნდა კითხვიდან, რომელიც  ბავშობაში ალბათ ბევრ ჩვენგანს დაუსვამს: სად მიფრინავენ ჩვენგან გაშვებული ჰელიუმის ბუშტები?!

პირველი ეტაპზე, ჩვენ შევქმენით ბუშტების ქალაქის კონცეფცია, ზღაპრული ადგილი, რომელიც ადამიანთა მზერის მიღმა, სადღაც ღრუბლებს ზევით არსებობს. მოქმედება ბუშტების ქალაქ LOOnciTy-ში ვითარდება. ეს ზღაპრული ქალაქი დიდი საჰაერო ბუშტებით არის ნაშენები. სწორედ იქ ხვდებიან და მხიარულად თანაცხოვრობენ  ჩვენგან ცისკენ გაშვებული ბუშტები.

ბუშტების ქალაქს ასევე დავუმატეთ სხვა მფრინავი სხეულები, რომლებიც პატრონებმა, ერთ დროს, ცაში დაკარგეს. ეს შეიძლება ყოფილიყო ქარისგან გატაცებული ფრანები, ქოლგები, მფრინავი მანათობლები, დირიჟაბლები და საჰაერო ბურთები.

საბოლოოდ, ამ ქალაქზე ფიქრისას მივხვდით, რომ ეს იქნებოდა ორგინალური, საინტერესო ლოკაცია, სადაც შეიძლება ანიმაციური ფილმის მოქმედება განვითარდეს.

მთავარი გმირები არიან ბუშტები მარლი და რუ, რომლებიც ახალგაზრდა არქიტექტორების გამოცდისთვის ემზადებიან და სხვადასხვა თავგადასავლებში ეხვევიან. რუ მარლის იმ დროს გადაეყრება, როდესაც გოგონა არქიტექტორების გამოცდისთვის ემზადება და სიუჟეტი ისე ვითარდება, რომ მათ ერთად უწევთ მუშაობა. მთლიანობაში, გმირების ვიზუალზე ძალიან ბევრი ვიმუშავეთ, რადგან რთულია, ბუშტს მისცე ანიმაციური პერსონაჟის სახე და თან ჰუმანოიდი არ გამოგივიდეს. საბოლოოდ, ტანსაცმელიც მოვარგეთ და ვფიქრობ, ძალიან დამახასიათებელი გმირებიც გამოგვივიდა.

M: რას მოიცავს იდეა და როგორია ანიმაციის ქრონომეტრაჟი?

რადგან ბუშტები მსოფლიოს ნებისმიერი წერტილიდან უფრინდებათ, ჩვენ  მოგვეცა საშუალება, რომ ქალაქი ყოფილიყო მულტიკულტურული სივრცე, ანუ ადგილი, სადაც ნებისმიერი პერსონაჟი შეიძლება იყოს სხვადასხვა ქვეყნის და სოციალური წრის წარმომადგენელი. ეს მეტი ფანტაზიის საშუალებას გვიქმნიდა სცენარისტებს.

საქართველოში ძალიან ძნელია, თავიდანვე სრულმეტრაჟიანი ანიმაცია რომ შექმნა. ამიტომ, ეს პროცესი დავყავით რამდენიმე ეტაპად. ერთი გვინდა გავაკეთოთ Motion Comics – წიგნის სახით კომიქსები, მეორე არის პატარა ანიმაცია “ღრუბლის არქიტექტორები”, რაც ერთგვარი ტრადიციული დარგი და ჰობია LOOnciTy-ში. ესაა პროფესია, რომლითაც ამ ქალაქში დაკავებულია ყველა, დიდიან პატარიანად – ისინი იფიქრებენ კომპოზიციებს, არქიტექტურას და შემდეგ უკვე ქმნიან იმ ლამაზ ღრუბლებს, რომლებსაც შემდეგ ჩვენ ვადარებთ სპილოებს, ცხენებს, თუ სხვადასხვა ფორმებს. თანაც, გააქტიურებული გვაქვს ეკოლოგიური პრობლემა, რაც, ვფიქრობ, ძალიან მნიშვნელოვანია, ამდენად, ეს გლობალური მასშტაბის პროექტია.

ეს მოკლემეტრაჟიანი ვერსია არის სრულმეტრაჟიანის ერთ-ერთი მიმართულება, რომლის შექმნის შემდეგ, ვფიქრობთ, რომ შეიძლება მოგვეცეს სრულმეტრაჟიანის შექმნის რესურსი.

M: ვისი იყო ჩანაფიქრი და ვინ მუშაობთ ანიმაციაზე?

პირველადი იდეა მე და ჩემს მეუღლეს მარიამ გაფრინდაშვილს მოგვივიდა, შემდეგ In Joy-ს გუნდთან ერთად დავხვეწეთ და განვავითარეთ.

M: როდის ვიხილავთ მოკლემეტრაჟიანი ანიმაციის დასრულებულ ვერსიას?

ეს ცოტა რთული საკითხია, გამომდინარე იქიდან, რომ ეს საქართველოა. ძალიან მძიმე მდგომარეობაა სახელმწიფო კონკურსებთან დაკავშირებით. გავედით კინოს ცენტრის ვორქშოპზე, სადაც წარვადგინეთ პროექტი, გვქონდა გაწერილი სრულმეტრაჟიანი და მოკლემეტრაჟიანი ვერსიები, განვითარებული პერსონაჟები, საბაზისო მზაობაც. საკმაოდ კონკურენტუნარიანებიც ვიყავით, რადგან დანარჩენი პროექტები ძირითადად, იდეის დონეზე იყო წარმოდგენილი. გვქონდა მოლოდინი, რომ მოვიგებდით. თანაც, საუბარი იყო საკმაოდ მცირე ბიუჯეტზე. მე არ ვამბობ, რომ ის პროექტი არ იმსახურებდა გამარჯვებას. ჩემი გულისტკივილია ის, რომ, მაგალითად, შარშან მაგ ვორქშოფზე ორი პროექტი გაუშვეს და ამ შემთხვევაში არ დაუშვეს გამონაკლისი. პლუს, არ მომცეს ადეკვატური ახსნა-განმარტება, თუ რა აკლდა ამ პროექტს ისეთი, რაც გამარჯვებულს ჰქონდა, რა კრიტერიემით შეფასდა და ა.შ

არ მინდა, რომ ამპარტავნულად გამომივიდეს, მაგრამ თითქმის ყველას მოსწონს როგორც იდეა, ასევე შესრულება, გარდა სხვადასხვა კონკურსების ჟიურის წევრებს, –
ეს გაშვებულმა რეკლამამაც დაადასტურა. უბრალოდ, ვისურვებდი, რომ ცოტა მეტი ყურადღება დაეთმოს კონკურსანტებთან ურთიერთობას, მოგვცენ რჩევები, ერთად გაკეთდეს ანალიზი და სრულფასოვანი საქმიანი დიალოგის ფორმატში მოგვარდეს გაურკვევლობა. კიდევ ერთხელ გავიმეორებ, თითქმის მთელ საქართველოს მოსწონს იდეა და მარტო რამდენიმე ადამიანს არა, ხოლო ისინი ვერც ამბობენ, რატომ არ მოსწონთ. ცოტა გასაკვირი და საწყენია. ამიტომ, ამ ეტაპზე, ვცდილობთ საკუთარი სახსრებით გავუმკლავდეთ ამოცანას, ამიტომ რთულია თქმა, როდის დავასრულებთ.

M: რა თანხა არის საჭირო, რომ ანიმაცია რაღაც პირველად შედეგამდე მიიყვანოთ?

დაახლოებით გვჭირდება 20 000  ლარი იმისთვის, რომ შევკრათ პრეზენტაცია, გავაკეთოთ გმირები 3D-ში…  ანუ 20 000 ლარით ანიამაციას ვერ დაასრულებ, ამ თანხით შეძლებ გააკეთო ისეთი პრეზენტაცია, რომ წახვიდე უცხოეთში კოპროდუქციის მოსაპოვებლად, ანუ დაასრულო პრეპროდაქშენი: შექმნა სცენარი, გააკეთო 3დ მოდელები და მოკლე, ერთწუთამდე ანიმაცია.

M: რომელ საერთაშორისო ფესტივალებზე შეიძლება ასეთი ანიმაციის წარდგენა და რა მოლოდინი გაქვს, მოხვედრის შემთხვევაში, გამარჯვებასთან დაკავშირებით?

ერთ-ერთი დიდი ფესტივალი-ბაზრობა ანესის ფესტივალია, ევროპაში. იქ საკონკურსო პროგრამის გარდა, შესაძლებელია შენი პროექტით წარდგენა პროდუსერების წინ, რაც კოპროდუსინგის შესაძლებლობას იძლევა. სხვა დიდ ფესტივალებზე როგორიცაა კანი, ბერლინალე და სხვა, რა თქმა უნდა, სურვილი გვექნება მანდ მოხვედრის და გამარჯვებისაც. თეორიულად, ყველაფერი შესაძლებელია. მაგრამ, ამ ეტაპზე, ცოტა შორია იმაზე ფიქრი, თუ სად მოხვდებით და სად გავიმარჯვებთ. ჩვენი პროექტი საწყისს ეტაპზეა და საკამოდ დიდი გზა აქვს გასავლელი. ჩვენი მთავარი მიზანი არა ფესტივალებზე გატანა/გამარჯვებაა, არამედ პროექტის განხორციელება და ჩვეულებრივი მაყურებლისთვის გაზიარება, რადგან ვთვლით, რომ ამ ისტორიამ შეიძლება პოზიტიურად იმოქმედოს მაყურებელზე და სულ ცოტატი შეცვალოს უკეთესობისკენ.
M: როგორ ფიქრობ, რამდენად მნიშვნელოვანია, რომ ეს პროექტი განხორციელდეს და როგორ წარმოგიდგენია, როგორმა ორგანიზაციამ შეიძლება გამოყოს რესურსები მის განსახორციელებლად?
ვისაც მძლავრი ფინანსური რესურები აქვს და ჩათვლის, რომ ეს ისტორია ღირებული და საინტერესოა. თან იდეა ორიგინალურია, ინტერნაციონალური და ძალიან ემოციური. ალბათ, არამარტო საქართველოში გასჩენიათ კითხვა, თუ სად მიფრინავენ ბუშტები. ჰოლივუდის ენაზე ასეთ პროექტს ჰქვია high concept, რაც ნიშნავს, რომ ერთი წინანდადებით ყვები ფილმის აზრს, მაყურებლის უმეტესობა ხვდება და აქედან გამომდინარე, აინტერესებს ფილმის ნახვა. ჰოლივუდში ძალიან ფასობს “ჰაი კონცეპტები” და პრინციპში, ახლა რაღაც მხრივ, ასეთი კონცეპტების დეფიციტიც არის, ისეთის, მრავალმხრივი სეგმენტისა და გემოვნების მაყურებელს რომ მოეწონება.

განხილვა

1 Response

  1. 24/05/2017

    […] მაყურებელს რომ მოეწონება. წყარო: მარკეტერ  Facebook Comments Share on Facebook Share Share on TwitterTweet Share on Google Plus […]