ჭაღარა თმა, კანის პრობლემები, სპორტული ტრავმა, მენოპაუზის პერიოდი, თმის ცვენა, დიდი საღამოსთვის მზადება. Boots-ის ახალი კამპანია სწორედ იმ მომენტებზეა აგებული, რომლებიც ცხოვრების ძალიან განსხვავებულ ეტაპებზე გვხვდება და ხშირად ერთდროულად რთულიცაა და სრულიად ჩვეულებრივიც.
ბრიტანულმა ჯანმრთელობისა და სილამაზის ბრენდმა ახალი პლატფორმა Give It Some Boots წარადგინა, რომელიც WPP-ის გუნდთან თანამშრომლობით შეიქმნა. კამპანიის მთავარი იდეაა, აჩვენოს, რომ Boots მომხმარებლის გვერდით სხვადასხვა ასაკსა და სხვადასხვა საჭიროების დროს არის, იქნება ეს ჯანმრთელობა, გარეგნობასთან დაკავშირებული ცვლილება თუ უბრალოდ საკუთარი თავის უკეთ შეგრძნების სურვილი.
კამპანიის მთავარი ვიდეო 60 წამს გრძელდება და რამდენიმე ქალის ისტორიას აერთიანებს. ისინი სხვადასხვა გამოწვევას ხვდებიან: ერთს კანის პრობლემა აქვს, მეორე ჭაღარას ამჩნევს, სხვას სპორტული ტრავმა აწუხებს, კიდევ ერთი პერიმენოპაუზის პერიოდს გადის. ასევე, ფილმში ნაჩვენებია ქალი, რომელსაც კიბოს მკურნალობის შედეგად თმა სცვივა.
Boots ამ შემთხვევებს დრამატულად არ წარმოაჩენს. აქცენტი უფრო ყოველდღიურობაზეა და იმაზე, რომ ცხოვრების ცვლილებები ერთდროულად შეიძლება რთულიც იყოს და საკუთარი თავის მიღებასთან დაკავშირებული ახალი ეტაპიც.
ვიდეოში განსაკუთრებული ადგილი ეთმობა ბრენდის თანამშრომლების გამოცდილებასაც. ერთ-ერთ სცენაში რეალური No7 Macmillan Beauty Advisor მონაწილეობს. ეს სპეციალისტები სპეციალურად არიან მომზადებული იმისთვის, რომ კიბოს მკურნალობის დროს გარეგნობასთან დაკავშირებულ ცვლილებებზე მომხმარებლებს რჩევა და მხარდაჭერა შესთავაზონ.
ფილმის ბოლოს განწყობა მთლიანად იცვლება. სხვადასხვა ისტორიის გმირები Boots-ის მაღაზიის წინ ერთიანდებიან და ქორეოგრაფიულ ცეკვაში ერთვებიან. სცენას ნენსი სინატრას These Boots Are Made for Walkin’-ის სპეციალურად შექმნილი ვერსია ახლავს. ეს არჩევანი ბრენდის ძველ სარეკლამო ისტორიასაც ეხმიანება. კამპანია ნაწილობრივ Boots-ის 2007 წლის ცნობილ საშობაო რეკლამას გვახსენებს, რომელშიც Ernie K-Doe-ს Here Come the Girls ჟღერდა და ქალების ენერგიული, ხალისიანი ისტორიები ერთ საერთო სიუჟეტად ერთიანდებოდა.
Give It Some Boots მხოლოდ სატელევიზიო ვიდეოთი არ შემოიფარგლება. კამპანიას სოციალურ ქსელებში კონტენტის შემქმნელებიც შეუერთდებიან და საკუთარ ისტორიებს გააზიარებენ ცხოვრების რთულ და სასიამოვნო პერიოდებზე. Boots მომხმარებლების უშუალოდ ჩართვასაც გეგმავს. დიდ ბრიტანეთში სხვადასხვა ადგილას კარაოკეს სპეციალური სივრცეები გამოჩნდება, სადაც ადამიანებს სიმღერისა და საკუთარი ისტორიების გაზიარების შესაძლებლობა ექნებათ.
ახალი კამპანიით Boots ცდილობს, პროდუქტის ფართო ასორტიმენტზე მეტად თავის როლზე ისაუბროს. ბრენდი საკუთარ თავს აჩვენებს ადგილად, სადაც მომხმარებელი შეიძლება მივიდეს როგორც ჩვეულებრივი კოსმეტიკური პროდუქტის საყიდლად, ისე მაშინ, როცა ცხოვრების უფრო რთულ ცვლილებასთან გამკლავებისთვის რჩევა და მხარდაჭერა სჭირდება.
