გინდათ უფრო მეტი რამ გააკეთოთ თქვენი საყვარელი Android აპლიკაციებითა და ფუნქციებით? Google ამისთვის 5 განახლებას გთავაზობთ ტელეფონებზე, პლანშეტებსა და Wear OS-ის საათებზე, შეგეძლებათ Offline რუკები პირდაპირ მაჯიდან გამოიყენოთ, მუსიკა დამატებითი აპლიკაციების გარეშე მოძებნოთ და ა. შ. მოდით, თითოეული ქვემოთ განვიხილოთ:
1. სურათების დეტალურ აუდიო აღწერილობებს ახლა Gemini გააუმჯობესებს
TalkBack ანდროიდის ეკრანის მკითხველია, რომელიც მხედველობა დაქვეითებული ადამიანებისთვისაა შექმნილი, ახლა კი ციფრული სურათები კიდევ უფრო ხელმისაწვდომი გახდება დეტალური აუდიოგანმარტებებით. ამ პასუხისმგებლობას, რაღა თქმა უნდა, Gemini საკუთარ თავზე აიღებს. არ აქვს მნიშვნელობა, პროდუქტების სურათებს ეძებთ ონლაინ, ფოტოებს ალბომში, ტექსტურ შეტყობინებებსა თუ სოციალურ მედიაში, TalkBack ყველაფერს მიხედავს.
2. მუსიკის მოძიება Circle to Search-ის ფუნქციით
თუ უცბად მუსიკა გაიგონეთ და ძალიან მოგეწონათ, შეგიძლიათ დამატებით აპლიკაციები დაივიწყოთ და იგი პირდაპირ Circle to Search-ის ფუნქციით მოძებნოთ. არ აქვს მნიშვნელობა, ეს მუსიკა სოციალურ ქსელშია ჩართული თუ თქვენთან ახლოს მყოფ დინამიკში, უბრალოდ დიდხანს დააჭირეთ Home-ის ღილაკს ან ნავიგაციის ჩანართს, რათა ფუნქცია გაააქტიუროთ, შემდგომ მუსიკის ღილაკს დააკლიკეთ სიმღერისა და შემსრულებლის სახელის გასაგებად ან თუნდაც YouTube ვიდეოსთვის — სულ ეს არის.
3. ონლაინ ძიებისას ვებგვერდების წაკითხვა
მარტივად გეტყვით, იმ ადამიანებისთვისაა, რომელთაც წაკითხვას მოსმენა ურჩევნიათ. დიახ, ახლა Chrome-ში ვებგვერდების მოსმენას შეძლებთ, იქნება ეს ბლოგები თუ რეცეპტები. შეგიძლიათ მოსმენის სიჩქარე, ხმის ტიპი და ენაც თავადვე განსაზღვროთ.
4. მიწისძვრისთვის მომზადება ანდროიდის ამერიკელი მომხმარებლებისთვის
ამჯერად Android Earthquake Alerts System ამერიკის მასშტაბით ყველა შტატსა და 6 ახალ ადგილზე გახდება ხელმისაწვდომი. მომხმარებლებს მიწისძვრამდე წამებით ადრე გააფრთხილებს და რჩევებსაც მისცემს, თუ როგორ უნდა მოიქცნენ.
5. ახალ ქალაქში მოგზაურობა Google Maps-თან ერთად
როცა Maps-ს ტელეფონზე გადმოწერთ, შეძლებთ მასზე წვდომა ჭკვიანი საათითაც მიიღოთ. ასე მარტივად მოახერხებთ ორიენტაციის განსაზღვრას მაშინაც კი, თუ ტელეფონი სადმე დაგრჩებათ. ხოლო ორი ახალი ჩანართი საშუალებას მოგცემთ, თქვენი ხმით კონკრეტული ადგილები ონლაინ რეჟიმში მოძებნოთ ან იმდროინდელი მდებარეობა ნახოთ უბრალოდ ერთი კლიკით თქვენსავე საათზე.
