Google Maps-მა სერიოზული, ფაქტობრივად, ბოლო ათწლეულის განმავლობაში ყველაზე მასშტაბური განახლება მიიღო. თავად კომპანიის შეფასებით, ეს ცვლილებები აპლიკაციის მოხმარების წესს ძირფესვიანად შეცვლის. სიახლე ორ მთავარ და რევოლუციურ ფუნქციას – Ask Maps-სა და Immersive Navigation-ს აერთიანებს.
ახალი ხელოვნური ინტელექტის ფუნქცია, Ask Maps, აპლიკაციაში Google-ის ყველაზე მოწინავე, Gemini მოდელებს აინტეგრირებს. მთავარი მიზანია, მომხმარებელს დანიშნულების ადგილების შესახებ კითხვების ბუნებრივ, სასაუბრო ფორმატში დასმის შესაძლებლობა მისცეს. სისტემა იმდენად სპეციფიკურ მოთხოვნებსაც კი ამუშავებს, როგორიცაა, მაგალითად, ტელეფონის დასატენად ისეთი ადგილის პოვნა, სადაც ყავის რიგში დიდხანს დგომა არ მოგიწევთ. ამის შემდეგ აპლიკაცია ზუსტად შესაბამის ლოკაციებს შემოგთავაზებთ, თუმცა, რამდენად ზუსტი იქნება ეს რეკომენდაციები პრაქტიკაში, ამას დრო აჩვენებს.
გარდა ამისა, მომხმარებლებს შეუძლიათ აპლიკაციას იმ ადგილების სია მიაწოდონ, რომელთა მონახულებასაც გეგმავენ და იკითხონ, ხომ არ გამოტოვეს რაიმე საინტერესო. თითოეული მომხმარებლისთვის იდეალური მარშრუტის შესადგენად, სისტემა 300 მილიონზე მეტი ობიექტის მონაცემებსა და 500 მილიონზე მეტი კონტრიბუტორის შეფასებებს აანალიზებს. რეკომენდაციების გაცემისას, მაგალითად, რესტორნის შერჩევისას, Ask Maps მომხმარებლის წარსულ გემოვნებასა და პრეფერენციებსაც ითვალისწინებს. ლოკაციის შერჩევის შემდეგ კი, პირდაპირ აპლიკაციიდანვეა შესაძლებელი მაგიდის დაჯავშნა, ადგილის სამომავლოდ შენახვა ან მეგობრებისთვის გაზიარება.
თუმცა, მორიგი ხელოვნური ინტელექტის ფუნქციის დამატებაზე უფრო მნიშვნელოვანი სიახლე Immersive Navigation, ანუ იმერსიული ნავიგაციაა. ფაქტობრივად, Google-მა Maps-ის გამოყენების სრულიად ახალი გზა დანერგა. ახალი ვიზუალითა და ინტუიციური მითითებებით, ნავიგაციის გამოცდილება სრულად ტრანსფორმირდა. ეს ფუნქცია მომხმარებელს 3D ფორმატის ნავიგაციას სთავაზობს. გარემო, რომელშიც თქვენი ავტომობილი მოძრაობს, ხაზს უსვამს გზის ისეთ მნიშვნელოვან დეტალებს, როგორიცაა ზოლები, გადასასვლელები, შუქნიშნები და გაჩერების ნიშნები. ამასთან, მიმდებარე შენობები, ხიდები და რელიეფი რეალურ სამყაროსთან მაქსიმალურად მიახლოებული ვიზუალით არის წარმოდგენილი.
ამ გლობალური ცვლილებების პარალელურად, აპლიკაციას უფრო მცირე, მაგრამ პრაქტიკული ფუნქციებიც ემატება. მათ შორისაა მარშრუტის შესახებ წინასწარი, გაუმჯობესებული შეტყობინებები, ბევრად უფრო ბუნებრივი და სასაუბრო სტილის ხმოვანი ნავიგაცია, დანიშნულების ადგილთან მიახლოებისას პარკინგის რეკომენდაციები და გზაზე არსებული შეფერხებების შესახებ რეალური დროის განგაშები. ასევე, როდესაც აპლიკაცია ალტერნატიულ მარშრუტს იპოვის, მომხმარებელს გადაწყვეტილების მისაღებად უფრო ვრცელ კონტექსტს მიაწვდის.
Ask Maps უკვე ეშვება აშშ-ში iOS და Android მოწყობილობებისთვის, წლის ბოლომდე კი დესკტოპ ვერსიასაც დაემატება. იმერსიული ნავიგაციაც დღეიდან ეტაპობრივად ჩაეშვება აშშ-ის ბაზარზე და მომდევნო თვეების განმავლობაში გაფართოვდება თავსებად iOS და Android მოწყობილობებზე, ასევე CarPlay-ზე, Android Auto-სა და იმ ავტომობილებზე, რომლებსაც Google-ის სისტემა ქარხნულად აქვთ ინტეგრირებული.
წყარო: Mashable
