Google კრეატიული დიზაინის ბაზარზე ახალი ინსტრუმენტით, Google Pics-ით შედის. გამოსახულებების შექმნისა და რედაქტირებისთვის განკუთვნილი ახალი ხელსაწყო Google Workspace-ის ბიზნესვერსიისა და Google AI-ს პრემიუმგამოწერების ნაწილი გახდება.
კომპანიის ინფორმაციით, Google Nano Banana-ს გამოსახულებების გენერაციის მოდელზე მუშაობს და უახლოესი კვირების განმავლობაში ეტაპობრივად გახდება ხელმისაწვდომი Workspace-ის მომხმარებლებისა და Google AI Pro-სა და Ultra-ს გამომწერებისთვის.
Adobe Express-ისა და Canva-ს მსგავსი პოპულარული დიზაინის ხელსაწყოების მსგავსად, Google-ის ახალი პროდუქტი ყოველდღიური დიზაინის ამოცანებისთვისაა შექმნილი, რომლებიც სამსახურში ან პირად ცხოვრებაში შეიძლება დაგვჭირდეს. მაგალითად, მისი გამოყენებით შესაძლებელია პოსტერების, სოციალური მედიის პოსტებისა და სხვა ვიზუალებისა თუ ილუსტრაციების შექმნა.
თუმცა, Canva-სგან განსხვავებით, სადაც მხატვრებს, ილუსტრატორებსა და ფოტოგრაფებს შეუძლიათ საკუთარი შაბლონების, გრაფიკული მასალის, ფოტოებისა თუ სხვა ნამუშევრების გამოქვეყნება და მათი გამოყენებიდან შემოსავლის მიღება, Google Pics-ის მთავარი დანიშნულება ხელოვნური ინტელექტის გამოყენებით კონტენტის შექმნაა. თავად AI-მოდელი კი ხელოვანების ნამუშევრებზეა გაწვრთნილი.
Google Pics ასევე განსხვავდება Adobe Express-ისგან, რომელსაც კრეატორები ხშირად უკვე არსებული მასალის შესაქმნელად იყენებენ. Google-ის ახალი ხელსაწყოს შემთხვევაში მომხმარებელი სასურველ შედეგს ტექსტური მოთხოვნის, ანუ პრომპტის, საშუალებით ქმნის და არა ნულიდან დიზაინის აწყობით.
აპლიკაციაში რედაქტირების ფუნქციებიც იქნება ხელმისაწვდომი. მომხმარებლებს შეეძლებათ ობიექტების გამოყოფა და გარდაქმნა, გამოსახულებაში არსებული ტექსტის შეცვლა ან თარგმნა და სხვა ოპერაციების შესრულება. ხელსაწყო ასევე მხარს უჭერს ერთობლივ რედაქტირებას და ერთი მოთხოვნის საფუძველზე გამოსახულების რამდენიმე განსხვავებული ვერსიის გენერირებას, რის შემდეგაც მომხმარებელს საუკეთესო ვარიანტის არჩევა შეუძლია.
Google Pics Google Workspace-ში იქნება ინტეგრირებული. თავდაპირველად ის Docs-სა და Slides-ში გამოჩნდება, სადაც მისი გაშვება უკვე დაიწყო, მოგვიანებით კი Google Drive-შიც გახდება ხელმისაწვდომი.
