რამდენიმე დღის წინ Google-მა განაცხადა, რომ ვებგვერდს ხელოვნურ ინტელექტზე დაფუძნებული საძიებო ფუნქცია დაემატა. მართალია, საწყის ეტაპზე Google Search Generative Experience-ზე (SGE) წვდომა მხოლოდ აშშ-ში ექნებათ, მაგრამ დროთა განმავლობაში სხვა ქვეყნებშიც გააქტიურდება.
მიმდინარე თვის დასაწყისში კომპანიამ თავის ოფიციალურ ღონისძიებაზე განაცხადა, რომ SGE ხელოვნური ინტელექტის შესაძლებლობების კლასიკურ საძიებო სისტემასთან გაერთიანებას ემსახურება. აქვე გასათვალისწინებელია, რომ აღნიშნული ფუნქციისთვის ცალკე ვებგვერდი არ გამოიყოფა, არამედ არსებულ საძიებო სისტემაშია ჩაინტეგრირებული. ალბათ, მსგავსი მიდგომით, ტექნიკურ გიგანტს სურს, AI ჩეტბოტებს „გაეჯიბროს“ და საბოლოოდ გადაწყვიტოს დილემა: რომელ სისტემას უნდა ჰკითხონ მომხმარებლებმა რაიმე?
