ის, რომ Google-ში ინფორმაციის უფასოდ და სწრაფად მოძებნა შეიძლება, უკვე გუშინდელი დღეა. საძიებო სისტემა, ნელ-ნელა, ახალ საფეხურზე გადადის – ცდილობს, რაც შეიძლება მეტი პლატფორმა შექმნას განათლებისა და კარიერული ზრდისთვის. ერთი-ერთი ასეთია „ონლაინ“ კურსები სამსახურის მაძიებელთათვის.
ეს Google-ისა და Udacity-ის ერთობლივი პროექტია, რომელიც 11 უფასო კურსს აერთიანებს. პლატფორმაზე არის ინფორმაცია, რეკომენდაციები და მითითებები, როგორ უნდა დაიწეროს რეზიუმე და სამოტივაციო წერილი, გაკეთდეს პერსონალური ბრენდინგი ან შეიქმნას GitHub-ისა და LinkedIn-ის კარგი, პროფესიონალური პროფილები.
„ჩვენი პარტნიორებისაგან ხშირად გვსმენია, რომ ეს, ერთი შეხედვით, ჩვეულებრივი უნარები გადამწყვეტია თანამშრომლის სამსახურში აყვანისას. სწორედ ამ ცოდნით, სტრატეგიითა და მეთოდებით განსხვავდებიან კანდიდატები ერთმანეთისაგან. უპირატესობას კი მას ანიჭებენ, ვინც ეს ყველაფერი იცის“, – ამბობს Udacity-ს წარმომადგენელი ქეთლინ მულანი.
აღსანიშნავია, რომ Google და Udacity, განათლებისა და კარიერული ზრდის მიმართულებით, წარსულშიც აქტიურად თანამშრომლობდნენ. მათ, რამდენიმე თვის წინ, “Networking for Career Success“ გააკეთეს. გარდა ამისა, Udacity-მ პროგრამა „Grow With Google“ -ის მონაწილეთათვის სპეციალური სტიპენდიები დააწესა.
წყარო: www.entrepreneur.com
