Google-მა Workspace-ის აპლიკაციებში სრულიად ახალი, ხელოვნურ ინტელექტზე დაფუძნებული ფუნქციები დააანონსა. გენერაციული AI მოდელი, Gemini, უკვე ინტეგრირებულია Docs-ში, Sheets-ში, Slides-სა და Drive-ში. ამ სიახლის მთავარი მიზანი ნებისმიერი პროექტის დაწყების პროცესის გამარტივებაა – ახლა უკვე Gemini-ს შეუძლია, პირველადი სამუშაო ვერსიები პირდაპირ თქვენი წერილებიდან, ჩატებიდან და ფაილებიდან ამოღებული ინფორმაციით შექმნას.
ნებისმიერი ტექსტური პროექტის დაწყებისას, ყველაზე რთული და შრომატევადი ეტაპი ხელით მოსამზადებელი სამუშაოებია. ადამიანები დიდ დროს ხარჯავენ ჩანაწერების შეგროვებაზე, ელექტრონულ ფოსტაში ძიებასა და სხვადასხვა ფაილის თავმოყრაზე, მხოლოდ იმისთვის, რომ ფურცელზე პირველადი მონახაზი გააკეთონ. სწორედ ამ რუტინულ საქმეს იღებს საკუთარ თავზე Gemini. თუმცა, სანერვიულო არაფერია – ხელოვნური ინტელექტი თქვენს პირად მიმოწერაში დაუკითხავად არ შეიჭრება.
იმისათვის, რომ Gemini-მ Gmail-იდან, Drive-იდან ან Chat-იდან ინფორმაცია გამოიყენოს, მომხმარებელმა მას შესაბამისი პრომპტი უნდა მისცეს ახალ ტექსტურ ველში, რომელიც თითოეულ აპლიკაციაში გამოჩნდება. მაგალითად, შეგიძლიათ სთხოვოთ, რომ შექმნას საინფორმაციო ბიულეტენი სამეზობლო ასოციაციისთვის, რისთვისაც იანვრის შეხვედრის ჩანაწერებსა და სამომავლო ღონისძიებების სიას გამოიყენებს. შიდა ფაილების გარდა, შესაძლებელია ინტერნეტიდან ინფორმაციის მოძიებაც. იული კვონ კიმის თქმით, Docs-ის ქვედა პანელში ერთი მარტივი მითითების ჩაწერით, ხელოვნური ინტელექტი მომენტალურად აგროვებს საჭირო მასალას სხვადასხვა წყაროდან და ქმნის საოცრად სასარგებლო პირველად ვერსიას, რომლის რედაქტირებაც მოგვიანებით ისევ Gemini-სთან ერთად არის შესაძლებელი.
ამ პროცესში მომხმარებელს სრული გამჭვირვალობა აქვს. ჯერ კიდევ მითითების მიცემისას ირჩევთ, კონკრეტულად რომელი წყაროებიდან გსურთ ინფორმაციის ამოღება. საბოლოო შედეგის მიღების შემდეგ კი ზუსტად ხედავთ, რომელი წერილი თუ დოკუმენტი გამოიყენა სისტემამ ამ ტექსტის შესაქმნელად. პირველადი ტექსტის გენერირების გარდა, Gemini-ს დოკუმენტის ცალკეული ნაწილების რედაქტირებაც შეუძლია. თუ კონკრეტულ აბზაცს მონიშნავთ და სისტემას სთხოვთ, ტექსტი უფრო პროფესიონალური, მაგრამ ამავდროულად ენერგიული გახადოს, ის თქვენი მითითების მიხედვით გადაწერს მას. ახალ ფუნქციას ასევე შეუძლია ტექსტის ტონისა და სტილის მთლიან დოკუმენტთან შესაბამისობაში მოყვანა, ან სულაც ახალი დოკუმენტის ისე ფორმატირება, რომ ის თქვენ მიერ მითითებულ ძველ ფაილს ჰგავდეს.
სიახლეები არანაკლებ საინტერესოა Google Sheets-ში. Docs-ის მსგავსად, აქაც შეძლებთ მთლიანი ცხრილების დაგენერირებას თქვენი წერილებიდან, ჩატებიდან და Drive-დან მიღებული მონაცემებით. მაგალითად, შეგიძლიათ სისტემას სთხოვოთ ახალ ქალაქში გადასვლის ორგანიზება: ოთახების მიხედვით ჩასალაგებელი ნივთების სიის შექმნა, კომუნალური სამსახურების კონტაქტების მოძიება და ინბოქსიდან გადამზიდავი კომპანიების ფასების ცხრილში გადატანა. Gemini არსებულ ცხრილებშიც მარტივად შეიყვანს მონაცემებს ჩვეულებრივი ტექსტური მითითებების საფუძველზე, რაც ხელით ბეჭდვის რუტინას წარსულს აბარებს.
რაც შეეხება Google Slides-ს, ამ ეტაპზე უკვე არსებულ პრეზენტაციაში ახალი სლაიდების დაგენერირებას მარტივად შეძლებთ. სისტემა მონაცემებს კვლავ Gmail-იდან, Drive-იდან და ინტერნეტიდან ამოიღებს. დაგენერირებული სლაიდის რედაქტირება ხელითაც შეგიძლიათ და Gemini-ს დახმარებითაც – მაგალითად, თუ ეტყვით, რომ ახალი სლაიდის ფერები პრეზენტაციის დანარჩენ ნაწილს შეუხამოს.
წყარო: Mashable
