ამერიკული მენტალური ჯანმრთელობის პლატფორმა Grow Therapy პირველ ეროვნულ ბრენდულ კამპანიას იწყებს და ამით თერაპიის შესახებ ერთ-ერთ ყველაზე გავრცელებულ წარმოდგენას ეჭვქვეშ აყენებს: რომ ფსიქოლოგიური დახმარება მხოლოდ მაშინ გვჭირდება, როცა ყველაფერი უკვე ძალიან რთულად არის.
KDSP-სთან თანამშრომლობით შექმნილი კამპანია თერაპიას უფრო ყოველდღიურ კონტექსტში აჩვენებს. აქ მთავარი აქცენტი კრიზისზე არ არის, უფრო იმაზეა, როგორ შეიძლება პროფესიონალთან საუბარი დაგვეხმაროს ურთიერთობებში, მშობლებთან მიმართებით, საზღვრების დაცვაში, რთული გადაწყვეტილებების მიღებაში და უბრალოდ საკუთარი ცხოვრების უკეთ გააზრებაში.
კამპანია ოთხი მოკლემეტრაჟიანი ფილმისგან შედგება. თითოეული მათგანი განსხვავებულ ყოველდღიურ სიტუაციას გვაჩვენებს: პასიურ-აგრესიულ დაძაბულობას ურთიერთობაში, მამას, რომელიც ცდილობს შვილთან უკეთესი კავშირი იპოვოს, დედა-შვილის რთულ გამომშვიდობებას და ქალს, რომელმაც საკუთარ თავს უნდა შეახსენოს, რომ ცხოვრებით სიამოვნებაც შეიძლება.
ყველა ისტორიაში პერსონაჟები თერაპიაში მოსმენილ რჩევებს იხსენებენ და რეალურ სიტუაციაში იყენებენ. ამის მიუხედავად, ვიდეოები მძიმე ან ზედმეტად დრამატული არ გამოდის. კამპანიას მსუბუქი, ზოგჯერ თითქმის იუმორისტული ტონი აქვს, რასაც სპეციალურად შექმნილი მუსიკალური ნომრებიც აძლიერებს.
რეჟისორი John Hillcoat ყოველდღიურ სცენებს ისე იღებს, რომ თერაპია არც ინსტრუქციად გვევლინება და არც დიდ გარდატეხად. ის უბრალოდ ერთ-ერთ რესურსად ჩანს, რომელსაც ადამიანები მაშინაც იყენებენ, როცა ცხოვრება გარედან სრულიად ჩვეულებრივად გამოიყურება.
Grow Therapy-ის მთავარი გზავნილიც ამაშია: ფსიქოლოგიური მხარდაჭერა მხოლოდ ყველაზე მძიმე მომენტებისთვის არ არის განკუთვნილი. ის შეიძლება იყოს საშუალება, რომ ადამიანი ყოველდღიურ სირთულეებს უკეთ გაუმკლავდეს და საკუთარ რეაქციებსაც უფრო დაკვირვებით შეხედოს.
კამპანია ასევე ცდილობს დაარღვიოს წარმოდგენა, თითქოს ემოციურ და ფსიქოლოგიურ საკითხებს ადამიანი ყოველთვის დამოუკიდებლად უნდა უმკლავდებოდეს. Grow Therapy თერაპიას სისუსტის ნიშნად კი არა, ცხოვრების ხარისხზე ზრუნვის ნაწილად აჩენს.
