საოჯახო ტექნიკის ბრენდმა Haier India კონდიციონერების ახალი ხაზი გამოუშვა. ეს იყო მათი პროდუქტის სრულიად განსხვავებული პოზიციონირებისა და საკომუნიკაციო კამპანიის მაგალითი – პოსტ-პანდემიურ პერიოდში, კიდევ უფრო მნიშვნელოვანი გახდა სუფთა ჰაერი. შესაბამისად, მომხმარებლები ცდილობენ, ასეთი გარემო შექმნან სახლში, ან ნებისმიერ სხვა სივრცეში, სადაც ყოფნა უწევთ. კომპანიამაც სწორედ ეს მოთხოვნები გაითვალისწინა ახალი პროდუქტის შექმნის, თუ მისი პოზიციონირების დროს. როგორ „ჩაუშვა“ Haier India-მ კონდიციონერების ბოლო სერია და რა ტიპის საკომუნიკაციო კამპანია გამოიყენა?! ამ „ქეისს“, ახლა, თქვენთან ერთად განვიხილავთ.
მოდით, დასაწყისისთვის, გავიხსენოთ, ზოგადად, რა ხდებოდა ამ ბაზარზე?! მომხმარებელთა გულის მოსაგებად, კონდიციონერების მწარმოებლები, ყურადღებას ამახვილებდნენ იმაზე, თუ როგორ აგრილებს ჰაერს მათი პროდუქტი. სულ ეს იყო მთელი მარკეტინგული კამპანიები, წლების განმავლობაში. ახლა მოცემულობა შეიცვალა. და მაგალითად, გლობალურმა კომპანიამ Haier, რომელიც ხანგრძლივი მოხმარების საოჯახო ტექნიკას აწარმოებს, აღნიშნა, რომ ინდოეთში გამოშვებული კონდიციონერების ახალი სერიის მთავარი „ღირსება“ სუფთა ჰაერია. როგორც გაყიდვებისა და მარკეტინგის მიმართულებით ვიცე-პრეზიდენტი სატიშ ნ.ს. ამბობს, მათი კონდიციონერები ანადგურებს ჰაერში დაგროვილ მავნე ნივთიერებებს, იმ ცირკულაციის საშუალებით, რაც მოწყობილობის ჩართვისთანავე ხდება. შემდეგ კი, LED UV ნათების დახმარებით, ინარჩუნებს ამ, უკვე გაწმენდილ ჰაერსა და ჯანსაღ გარემოს.
სააგენტო Zero Zero Creative Solutions-მ, რომელმაც ამ კამპანიაზე იმუშავა, ზუსტად და სწორად გათვალა, რაზე გაეკეთებინა აქცენტი და რა იქნებოდა მნიშვნელოვანი იმ მოსახლეობისთვის, პანდემიის გამო, დროის ძირითად ნაწილს, რომ სახლში ატარებენ. საბოლოდ გამოვიდა, რომ მათ სწორი ბრიფი სწორად შეასრულეს!
მოდით, ვნახოთ ეს ვიდეოები. შემდეგ კი დეტალურად განვიხილოთ მთელი კამპანია.
რა გააკეთეს სწორად Haier India-მ და Zero Zero Creative Solutions-მა?
1. პროდუქტის შექმნისას, გაითვალისწინეს მომხმარებლის პრიორიტეტები
პანდემიისა და მისი შედეგების გათვალისწინებით, მომხმარებელი დარწმუნდა, რომ საოჯახო ტექნიკა გაცილებით მეტს უნდა აკეთებდეს, ვიდრე მისი ძირითადი ფუნქციაა. ანუ აღარ აკმაყოფილებს მხოლოდ ის, რომ კონდიციონერი კარგად აგრილებს, მას სჭირდება ელექტროენერგიის და შესაბამისად ხარჯების დაზოგვა. ასევე – მაქსიმალურად სუფთა და ჯანსაღი ჰაერი.
„კონდიციონერების შემთხვევაში, მომხმარებელს აქვს შინაგანი მოთხოვნილება, ტექნიკამ შეუქმნას ჯანსაღი და უსაფრთხო გარემო, ასევე უზრუნველყოს ელექტროენერგიის ეკონომია“ – ამბობს სატიშ ნ.ს.
მისივე თქმით, სწორედ ეს გაითვალისწინეს ახალი პროდუქტის წარმოებისას და ამ სერიას რეალურად აქვს იგივე მახასიათებლები – აღჭურვილია თვითგამწმენდი ინვერტორ ტექნოლოგიით, რომლის საშუალებითაც, ღილაკზე ერთი დაჭერით, შესაძლებელია ოთახის თუ სხვა შიდა სივრცის გაწმენდა. ტრანსფორმაციის ფუნქცია კი საშუალებას აძლევს, მომხმარებელს, დაზოგოს ელექტროენერგია და შესაბამისად, ხარჯები.
2. საკომუნიკაციო კამპანიაში წინ წამოწიეს დროის, მოცემულობის ადეკვატური და მომხმარებელთა მთავარი მოთხოვნების შესაბამისი გზავნილები – პროდუქტის გამოშვების შემდეგ, ჯერი მარკეტინგულ კამპანიაზე მიდგა. Haier India-მ და Zero Zero Creative Solutions-მა გადაწყვიტეს, აქცენტი სწორედ ამ მახასიათებლებზე გაეკეთებინათ და მომხმარებლისთვის ეთქვათ, რომ ახალი პროდუქტი ზუსტად პასუხობს მათ მოთხოვნებს.
კონდიციონერების ბაზარზე წარსადგენად, ბრენდმა საკომუნიკაციო კომპანიას ასეთი ბრიფი მისცა: უნდა შეექმნათ 20-წამიანი ვიდეორგოლები, რომელიც მათ პროდუქტზე იუმორისტულ, მარტივად დასამახსოვრებელ და მახვილგონივრული გზით უამბობდა მომხმარებლებს. ამასთან, საკვანძო გზავნილი უნდა ყოფილიყო – ჯანსაღი, უფრო ზუსტად კი სუფთა ჰაერი, იმ ტექნოლოგიების მეშვეობით, რომლითაც აღჭურვილია ეს კონდიციონერები.
არა და, მსოფლიო მიჩვეულია 30-წამიან ვიდეორგოლებს და ეს თითქოს, კანონზომიერებაა. სატიში კი ამბობს, რომ მისთვის, როგორც მარკეტერისთვის, მნიშვნელოვანია, საკომუნიკაციო კამპანიაში ზუსტად ის ქრონომეტრაჟი ჰქონდეს ვიდეორგოლს, რაც მომხმარებლამდე ეფექტური გზით მიიტანს ბრენდის სათქმელს. არც მეტი, არც – ნაკლები.
რას გვასწავლის ეს „ქეისი“?
ბრენდმა ყოველთვის ყურადღებით უნდა შეისწავლოს იმ მომენტისა და რეალობისთვის არსებული მოთხოვნები და ადეკვატურად უპასუხოს მათ. მაგალითად, თუ მანამდე, მომხმარებელი მხოლოდ იმას აქცევდა ყურადღებას, რამდენად კარგად აგრილებდა კონდიციონერები, პანდემიის შედეგების გათვალისწინებით, აქტუალური გახდა სხვა რამ – ჰაერის მუდმივი გაწმენდა და ხარჯების ოპტიმიზაცია. Haier India-მ, ახალი ხაზის გამოშვებისას, ყურადღება სწორედ ამ მიმართულებებზე გაამახვილა და შესაბამისად აღჭურვა პროდუქტი. ანუ მათ ნახევარი საქმე უკვე გაკეთებული ჰქონდათ. ამის შემდგომ ჯერი კომუნიკაციაზე მიდგა. რა მოხდა ამ შემთხვევაში? ზუსტად იგივე გააჟღერეს მარკეტინგულ კამპანიაშიც, ანუ ის მახასიათებლები წამოწიეს წინ, რაც მომხმარებელს ყველაზე მეტად აღელვებდა. არც Haier India-სა და არც Zero Zero Creative Solutions-თვის მნიშვნელოვანი არ აღმოჩნდა ზოგადად, ბაზარზე დადგენილი ნორმები. მათ, მათთვის იდეალურ, მინიმალურ დროში, მარტივად აღქმადი, ეფექტური და დასამახსოვრებელი გზით უთხრეს მომხმარებელს მთავარი სათქმელი – ახალი კონდიციონერები მოგცემთ იმას, რაც ასე მნიშვნელოვანია – სახლში თუ სხვა სივრცეში მუდმივად გექნებათ სუფთა ჰაერი და დაზოგავთ ხარჯებს.
წყარო: The Drum
