in

როგორ მოიძიეს ამერიკელმა სტილისტებმა დამატებითი შემოსავალი, კარანტინის დროს? [Hairstory-ის ქეისი]

პანდემიის დროს, სილამაზის სალონების დახურვამ სტილისტებიც უსაქმოდ დატოვა, თუმცა მათ ფულის გამომუშავების ალტერნატიულ მეთოდებს მაინც მიაგნეს. ზოგმა Zoom-ის საშუალებით თავისი კლიენტებისთვის თმის დამოუკიდებლად შეჭრის სწავლება დაიწყო, სხვებმა თმის სასურველი ფერის მისაღებად, საღებავების შერევა და მათი საკურიერო სერვისით მომხმარებლამდე მიწოდება გადაწყვიტეს.

სხვადასხვა ბრენდის პროდუქტზე რეკომენდაციის გაწევა ბევრი სტილისტისა და სილამაზის სალონისთვის დამატებითი შემოსავლის მიღების კარგი საშუალება აღმოჩნდა. მაგალითად, თმის მოვლის საშუალებების ბრენდმა Hairstory სტილისტები ინფლუენსერებად მიიწვია, თავისი ახალი პროდუქტის New Wash პოპულარიზაციისთვის. გაწეული რეკომენდაციებისთვის, ბრენდმა სტილისტებს, გასულ თვეში, საერთო ჯამში, $125,000 გადაუხადა. Hairstory-ს აქვს საპარტნიორო პროგრამა, რომელიც პროფესიონალებს, პროდუქტის რეკლამირებისთვის, საკომისიოს სახით, 25%-ს უხდის, ყოველი შესყიდვიდან. ეს სქემა სამსახურის გარეშე დარჩენილ სტილისტებს ძალიან დაეხმარა.

ამ შემოთავაზებას ეჭვის თვალით უყურებდა სან-ფრანცისკოს სალონების ქსელი Edo, თუმცა, მაინც სცადა. როგორც აღმოჩნდა, ორ თვეში, მცდელობამ შედეგი გამოიღო – იანვარში Edo-მ $3,280 გამოიმუშავა, მარტში კი – $7,185, რამაც სალონს ქირის საფასურის დაფარვა შეაძლებინა: “რაკი სალონი დამოკიდებულია იმ ადამიანების მიერ გადახდილ ფულზე, რომლებიც ადგილზე მოდიან, ეს საუკეთესო გზაა ანაზღაურების მისაღებად. თანაც, ეს საქმე იზრდება და დახარჯული ძალისხმევაც უფრო ნაკლებია.”

მექანიზმი ასეთია: მას შემდეგ, რაც მომხმარებლები პირველად იყიდიან პროდუქტს, მათ სთავაზობენ სპეციალურ პლატფორმაზე Hairstory Club რეგისტრაციას. პლატფორმა შეძენილ პროდუქტს სახლში უგზავნის და უფრო შეღავათიან შეთავაზებებსაც აწვდის.

Hairstory-ის რეკომენდატორთა ყველაზე მაღალი ანაზღაურება, დაახლოებით, $8000 დოლარია. ხოლო ისინი, ვისაც დაახლოებით $1000-ის გამომუშავება სურს, დაახლოებით 50 მომხმარებლის მიზიდვაზე მუშაობს, რომლებიც თავიანთ მარაგს რეგულარულად განაახლებენ.

ზოგიერთის აზრით, 50 ბევრია, თუმცა, ამ სალონებში სტილისტი დღეში, საშუალოდ, 12 ადამიანს ემსახურება, რაც კვირაში 60 მომხმარებელს გვაძლევს, თვეში კი – 240-ს. აქედან გამომდინარე, 50 მომხმარებელი საერთო რაოდენობის, დაახლოებით, 20% გამოდის.

ბუნებრივია, სტილისტებისა და სილამაზის სალონების გაყიდვებში აქტიურად ჩართვა დადებითად აისახა Hairstory-ზეც. როგორც მისი დამფუძნებელი ელი ჰოლიუელი ამბობს, კარანტინამდე, სტილისტებზე კომპანიის გაყიდვების ერთი მესამედი მოდიოდა, ახლა კი, ეს მაჩვენებელი 2/3-ია.

მარტში, სტილისტების მიერი გაყიდული პროდუქციის მოცულობა 50%-ით გაიზარდა. ამის წინაპირობად, ჰოლიუელი სტილისტების მომხმარებლებისადმი ყურადღებიან დამოკიდებულებას ასახელებს: “საუკეთესო გზა, რომ სტილისტმა შემოსავალი მნიშვნელოვნად გაზარდოს, როგორც კარანტინის დროს, ისე მის შემდეგ, არის მის აქტივებზე ზრუნვა. ისინი რეგულარულად უნდა ეკონტაქტებოდნენ ყველა მომხმარებელს”. თუმცა, ჰოლიუელის აზრით, თუკი მომხმარებელი პასუხს არ უბრუნებს, მას თვეში მხოლოდ ერთხელ სჯობს, რომ შეეხმიანონ. რაც შეეხება კომუნიკაციას, ეს უნდა იყოს მოკითხვის სახით, ჰოლიუელი სტილისტებს ურჩევს, გამოიჩინონ მზრუნველობა და იკითხონ, რა მდგომარეობაშია მათი მომხმარებლის თმა და ურჩიონ რაიმე სასარგებლო. ეს არამხოლოდ გაყიდვებში დაეხმარებათ, არამედ, გრძელვადიან პერიოდშიც წაადგებათ.

 

წყარო: Forbes

„ქოლგა თბილისი ფოტოს“ ვირტუალური კვირეული

იაპონურ ტრადიციებზე შექმნილი ტოსტის დიზაინები