საერთოდ არაა ბაიკერობა საჭირო იმისთვის, რომ იცოდეთ, რა ბრენდია Harley-Davidson. ის არ არის უბრალოდ მოტოციკლების მწარმოებელი, ის თავისუფლებისა და ამბოხის სიმბოლოა.
მისი ისტორია თავმდაბლურად იწყება და გვიჩვენებს, როგორ ავიდა სიმაღლეებზე. მილუოკის პატარა ფარდულში დაწყებული ბიზნესი დღეს ერთ-ერთი ყველაზე ცნობადი ბრენდია.
ფარდული. 1903 წელი
1903 წელს უილიამ ს. ჰარლიმ და არტურ დევიდსონმა, არტურის ძმებთან უოლტერთან და უილიამთან ერთად კომპანიის დაარსება გადაწყვიტეს, რომელიც მოტოციკლებს ააწყობდა. მათ თავი მოიყარეს ვისკონსინის შტატში, მილუოკის პატარა ფარდულში, სადაც ნიჭიერმა ინჟინერმა ჰარლიმ შექმნა ბენზინზე მომუშავე ძრავის პირველი პროტოტიპი. თავდაპირველად ის გათვლილი იყო ველოსიპედზე დასაყენებლად.
Harley-Davidson-ის პირველი მოტოციკლის სიმძლავრე სულ რაღაც 3.5 ცხენის ძალას შეადგენდა, თუმცა მან სწრაფად მიიპყრო ხალხის ყურადღება სიჩქარისა და საიმედოობის გამო. ხმა მისი შთამბეჭდავი შესრულების შესახებ მალე გავრცელდა და ბრენდმა დაიწყო ზრდა. მალევე კომპანიამ წარმოადგინა პირველი წარმოების მოდელი 1904 წელს. 1906 წლისთვის კი Harley-Davidson ყიდდა მოტოციკლებს მთელი ქვეყნის მასშტაბით და გაითქვა სახელი, როგორც უმაღლესი დონის მწარმოებელმა.
მე-20 საუკუნის დასაწყისი
გამძლეობა და საიმედოობა ის მახასიათებლები იყო, რის გამოც Harley-Davidson-ის მოტოციკლები ცნობილი გახდა წლების განმავლობაში. 1900-იანი წლების დასაწყისში კომპანიამ შექმნა მოტოციკლები სპეციალურად სამხედრო და სამართალდამცავი ორგანოებისთვის. პირველი მსოფლიო ომის დროს კი მნიშვნელოვანი როლი ითამაშა აშშ-ის სამხედროებისთვის ათასობით ტრანსპორტის მიწოდებით. შეიარაღებულ ძალებთან ამ კავშირმა არა მხოლოდ გააძლიერა Harley-Davidson-ის რეპუტაცია, არამედ გზა გაუხსნა კომპანიას გლობალურ ბაზარზე.
1920-იან წლებში Harley-Davidson-ს კონკურენტები გამოუჩნდნენ, მაგრამ მან შეინარჩუნა დომინირება ამერიკული მოტოციკლების ინდუსტრიაში. მისი ინოვაცია იყო V-twin ძრავა, რომლითაც ის ათწლეულის ბოლოს გახდა მოტოციკლების უმსხვილესი მწარმოებელი მსოფლიოში.
დიდი დეპრესია და მეორე მსოფლიო ომი
1930-იანი წლები რთული პერიოდი იყო Harley-Davidson-ისთვის, რადგან დიდმა დეპრესიამ მძიმედ დაარტყა აშშ-ს ეკონომიკას. მიუხედავად ამ ფინანსური გაჭირვებისა, კომპანია მუდმივად სთავაზობდა ინოვაციებსა და ხელმისაწვდომ მოდელებს.
როდესაც მეორე მსოფლიო ომი დაიწყო, Harley-Davidson-ის მოტოციკლები სასიცოცხლო ინსტრუმენტად იქცა დაზვერვის, ტრანსპორტირებისა და კომუნიკაციისთვის. ბრენდის პოპულარობამ პიკს მიაღწია ომისშემდგომ ეპოქაში, როდესაც ჯარისკაცები სახლში დაბრუნდნენ. ის იქცა თავისუფლებისა და თავგადასავლების სიმბოლოდ.
მეამბოხე იმიჯი
1960-იან და 1970-იან წლებში Harley-Davidson კონტრკულტურული მოძრაობის სინონიმი გახდა. მოტოციკლები უკვე აღარ იყო მხოლოდ გადაადგილების საშუალება, ისინი განასახიერებდნენ ამბოხების, თავისუფლებისა და ინდივიდუალურობის სიმბოლოს. ამ ეპოქაში გამოჩნდა ლეგენდარული მოდელები. ერთ-ერთია Electra Glide, რომელიც ცნობილია თავისი დახვეწილი დიზაინითა და მოწინავე მახასიათებლებით.
ბრენდის იმიჯზე გავლენა იქონია ჰოლივუდის ფილმებმაც, განსაკუთრებით 1969 წელს გადაღებულმა Easy Rider-მა, რომელშიც პიტერ ფონდა და დენის ჰოპერი თამაშობდნენ. ამ კინოსურათმა მოტოციკლი განასახიერა, როგორც პირადი თავისუფლებისა და ამერიკული სულის სიმბოლო.
დაცემა და აღორძინება
1980-იანი წლებისთვის ბრენდი გამოწვევების წინაშე აღმოჩნდა. იაპონური მოტოციკლების მწარმოებლების, Honda-სა და Yamaha-ს აღმავლობამ ჰარლის ბაზრის წილის შემცირება გამოიწვია. გარდა ამისა, კომპანია ებრძოდა ხარისხის კონტროლს და შრომის საკითხებს, რაც საფრთხეს უქმნიდა მის გადარჩენას.
მაგრამ მშველელი გამოჩნდა. 1981 წელს ინვესტორთა ჯგუფმა, ძმები ზიდლერების ხელმძღვანელობით, აიღო კომპანიაზე კონტროლი. ის აკონტროლებდა პროდუქტის ხარისხს, მარკეტინგულ სტრატეგიებსა და ერთგული მომხმარებლების ბაზას. ბრენდი ეყრდნობოდა თავისუფლებისა და აჯანყების კლასიკურ იმიჯს, ხოლო თანამედროვე მოთხოვნილებების დასაკმაყოფილებლად – ტექნოლოგიის განახლებას.
1990-იანი წლები იყო Harley-Davidson-ის ოქროს ხანა. კომპანიის აქციები საჯარო გახდა და ის კიდევ ერთხელ იქცა კულტურულ ფენომენად.
დღეს Harley-Davidson აგრძელებს ინოვაციებს და პატივს სცემს თავის მდიდარ ისტორიას. კომპანიამ გააფართოვა თავისი ასორტიმენტი მოტოციკლების სპექტრით, მსუბუქი ქუჩის სერიებიდან დაწყებული, ძლიერ, სპორტულ მოდელებამდე. ბოლო წლებში კომპანიამ ყურადღება მიაქცია ელექტრომობილობას და გამოუშვა LiveWire, თავისი პირველი ელექტრომოტოციკლი.
საერთო ჯამში კი, იგი დგას იმ იდეებზე, რომლებმაც პირველად შთააგონეს ბრენდის დამფუძნებლები 1903 წელს.
ბიზნესისტორიებს წარმოგიდგენთ „ალიანს ჯგუფი”.
