იცოდით, რომ ადამიანები სამსახურიდან წასვლისას კომპანიებს კი არა, მენეჯერებს ტოვებენ? ამას Gallup-ის 2013 წლის კვლევაც გვიდასტურებს, რომელიც, მართალია, 10 წლის წინ ჩატარდა, მაგრამ დღეს არსებულ მდგომარეობას კვლავ შეეფერება.
თუ ერთ დროს თანამშრომლები მაღალი თანამდებობების მფლობელებს ყველაზე სანდოდ თვლიდნენ, ახლა ყველაზე მნიშვნელოვან წყაროდ ორგანიზაციისა და მისი პრიორიტეტების გასაგებად თავიანთ ხელმძღვანელებს მიიჩნევენ… 2021 წლის კვლევამაც დაადასტურა, რომ ადამიანები ცუდ სამსახურებს კი არა, ცუდ მენეჯერებს ტოვებენ.
ამის მიზეზი კი ის არის, რომ მენეჯერები ყოველთვის არ არიან მზად ამისთვის, არ აქვთ საკმარისი ტრენინგი გავლილი ან დრო, რომ არამდგრად სიტუაციებში თავიანთ გუნდებს შესაბამისად უხელმძღვანელონ. ასე რომ, თქვენი თანამშრომლებისა და მენეჯერების შენარჩუნებისთვის, მათ განვითარებაზე უნდა დაიწყოთ ზრუნვა, რაშიც შემდეგი 3 მეთოდი დაგეხმარებათ:
აამაღლეთ მენეჯერის როლი
ხშირად თანამშრომლებთან დაკავშირება მენეჯერებისთვის დამატებით სამუშაოდ აღიქმება… ეს ფუნდამენტური პრობლემაა, ამიტომ კომპანიებმა მკაფიოდ უნდა განსაზღვრონ, რომ მენეჯერების საქმიანობისთვის იგი დამატებითი კი არა, მნიშვნელოვანი ელემენტია.
General Mills’ Engaging Leader (EL)-ის პროგრამა სწორედ ამ კავშირის პრიორიტეტიზაციაზე ზრუნავს და ეკითხება მენეჯერებს: რა დაგჭირდებათ იმისთვის, რომ იყოთ კარგი ლიდერი? რა გჭირდებათ თქვენ? უკუკავშირმა კი ისინი EL-ის პროგრამის შექმნამდე მიიყვანა.
პროგრამა მენეჯერებს კომპანიის 4 ძირითად ღირებულებას უზიარებს — ერთად გამარჯვება, მუდმივი ინოვაციურობა, ჩემპიონობა და ყოველთვის სწორი რაღაცების კეთება. ამასთან, უტოვებს მათ სივრცეს და უზიარებს ქმედით ნაბიჯებს, თუ როგორ გამოიყენონ ეს ღირებულებები პრაქტიკაში. მენეჯერებს შემდეგ კითხვაზე პასუხის გაცემასაც სთხოვენ: რამდენად კარგად ვაკეთებ თითოეულ მათგანს? და ისინიც უკუკავშირს თავიანთი პირადი მოხსენებებიდან იღებენ.
უკუკავშირის მიწოდების ფორმალიზებით, EL-ის პროგრამამ გაზარდა არა მარტო მენეჯერის გამოცდილება, არამედ კავშირი პირად მოხსენებებთან. ამ დროს თანამშრომელთა 99% გრძნობდა, რომ მათ მენეჯერი მხარს უჭერდა, რაც პირდაპირ უკავშირდებოდა თანამშრომლების ჩართულობისა და შენარჩუნების გაუმჯობესებულ მაჩვენებლებს.
შექმენით სივრცე ზრდისთვის
ქაოსურ დროში მართვა ყველაზე გამოცდილი მენეჯერებისთვისაც კი წარმოადგენს გამოწვევას, რომ აღარაფერი ვთქვათ ახალ წევრებზე… თანამშრომლები ხშირად გადადიან მენეჯერულ პოზიციებზე იმის გამო, რომ ისინი თავიანთ საქმეებს კარგად ასრულებენ და არა იმიტომ, რომ მათ მენტორობის ან ქოუჩინგის კარგი უნარი აქვთ. თუმცა, მნიშვნელოვანია, კომპანიებმა დაწინაურებულ თანამშრომლებს ამ უნარების განვითარების შესაძლებლობა მისცენ.
ამ კუთხით, საინტერესოა, „3-საათიანი კულტურის საუბრები“, რაშიც მონაწილეობას Microsoft-ის 220 000 თანამშრომელი იღებს. ჯო უიტინჰილის, Microsoft-ის კორპორატიულის ვიცე პრეზიდენტის თქმით, მიზანი თანამშრომლებისთვის არსებული კულტურის გაზიარებაა. ამ საუბრებში მთავარი ის არის, რომ მათ HR-ები კი არა, მენეჯერები მართავენ, რათა უფრო პირდაპირი, პერსონალური კავშირები და ზრდის შესაძლებლობა შექმნან.
მათ სპეციალურ სახელმძღვანელოსაც აძლევენ, რომელშიც ასახულია, რა მნიშვნელოვანი გზავნილები უნდა გადასცენ საუბრის დროს. აქვე, ყურადღებას ამახვილებენ პირადი ამბების გაზიარების მნიშვნელობაზე. უიტინჰილი მენეჯერებს მსგავსი საუბრებისთვის ინდივიდუალურადაც კი ამზადებდა.
კონკრეტული მეთოდის გამოყენება უფრო პატარა ორგანიზაციებსაც შეუძლიათ — პირველი ნაბიჯი იმ პრობლემის დადგენაა, რომელიც გსურთ, რომ მენეჯერებმა მოაგვარონ, მაგალითად, ისეთი მაღალი დონის პრობლემები, როგორებიცაა ღირებულებები და კულტურა ან უფრო კონკრეტული საკითხები, იქნება ეს პროდუქტის განვითარება თუ გაყიდვები. შემდეგ კი, განსაზღვრეთ, როგორ შეგიძლიათ ჩართოთ მენეჯერები ამ საუბრებში და როგორ უნდა იხელმძღვანელოთ აქ თქვენი ღირებულებებით. უიტინჰილის თქმით „თუ ამას მოახერხებთ, შედეგად კუთვნილებას მიიღებთ“, რაც იმას ნიშნავს, რომ ეს მენეჯერებს, მათ გუნდებსა და ორგანიზაციებს გააერთიანებს.
მხარი დაუჭირეთ მენეჯერებს
კვალიფიციურ და გამოცდილ მენეჯერებსაც კი ბევრი მუშაობა უწევთ. ამიტომ, მუდმივი მხარდაჭერა აუცილებელია, მათ ხომ მზარდი გაურკვევლობების ფონზე უწევთ მუშაობა…
ამის საილუსტრაციოდ, კარგი იქნება, თუ One Upwork Forum-ს განვიხილავთ. ეს Upwork-ის Zoom-ის ყოველთვიური შეკრებაა, სადაც მენეჯერებს შეუძლიათ, ერთმანეთს გაუზიარონ ინფორმაცია იმ ცვლილებების შესახებ, რომლებსაც მართავენ, მრავალფეროვანი სამუშაო გარემოს ინიციატივები და ნებისმიერი რამ, რასთან გამკლავებაც უწევთ. მართალია, ეს გულწრფელი საუბრებია კოლეგებს შორის, მაგრამ ამას უზრუნველყოფს ხელმძღვანელი, რომელსაც სურს, მათ განვითარებაზე იზრუნოს. შედეგად, კონკრეტული ქმედება ჩართულობის გაზრდასაც მნიშვნელოვნად ეხმარება.
კოლეგების მხარდაჭერა, ზემოდან ქვემოთ მიმართული უკუკავშირისგან განსხვავებით, უამრავ სარგებელ გთავაზობთ, მათ შორისაა: მრავალფეროვანი პერსპექტივები, უსაფრთხო სივრცეში ახალი უნარების გამომუშავების შესაძლებლობა, მუდმივი მხარდაჭერის ქსელი და ა. შ. მენეჯერების უნარების ერთობლივი გამოცდა კი პროფესიონალური განვითარების კიდევ ერთი შესაძლებლობაა.
ალბათ, ყველა ვთანხმდებით იმაზე, რომ დღეს განსაკუთრებულად რთული დროა მენეჯერობისთვის, მაგრამ როგორც Gallup შეგვახსენებს: „სხვა ფაქტორებთან შედარებით, მენეჯერები ყველაზე მეტად შთააგონებენ გუნდის ჩართულობასა და პროდუქტიულობას… გუნდში ჩართულობის სხვაობის 70% მხოლოდ მენეჯერის მიერ განისაზღვრება“. სწორედ ამიტომ, დროა კომპანიებმა მათი მხარდაჭერა უნარების განვითარებითა და იმ დახმარების აღმოჩენით დაიწყონ, რომელიც გუნდებთან დასაკავშირებლად სჭირდებათ.
წყარო: HBR
