ეჭვგარეშეა, ონლაინ შეფასებებს მნიშვნელოვანი ღირებულება აქვს ბიზნესებისთვის. თუ გავითვალისწინებთ იმას, რომ მომხმარებელთა 98% რაღაცის ყიდვამდე შეფასებებს კითხულობს, ეს პროდუქტისა და მომსახურების შესახებ ინფორმაციის მისაღებად ერთ-ერთი მნიშვნელოვანი წყაროა. შესაბამისად, დღეს ბიზნესებმა ის გზები უნდა ეძებონ, რომლითაც ონლაინ რეპუტაციის ამაღლებას შეძლებენ.
ხშირად გამყიდველები მომხმარებლებს შეფასებების დაწერას სთხოვენ, პასუხობენ ძველ „რივიუებს“ ან სულაც, საკუთარ თუ კონკურენტების პროდუქტებზე ყალბ კომენტარებს წერენ… ყველაზე გავრცელებული მიდგომა კი აქ ელ.ფოსტით მომხმარებლებისთვის შეფასების თხოვნაა. გავრცელებული კია, მაგრამ, რამდენად კარგი იდეაა? ექსპერტების აზრით, ეს მხოლოდ ზოგჯერ ამართლებს.
სამოგზაურო პლატფორმის მიერ 200 000 მომხმარებელზე ჩატარებულმა კვლევამ აჩვენა, რომ ელ.ფოსტების გაგზავნას ორი შედეგი ჰქონდა: პირველი — მოგზაურობიდან 4 დღეში შეფასებათა მთლიანი რაოდენობა 8%-ით გაიზარდა, მეორე — ძალიან პოზიტიური ან ძალიან ნეგატიური შეფასებების ქულები 10%-ით შემცირდა.
მკვლევართა ვარაუდით, ადამიანები, რომლებიც ჩვეულებრივ გამოცდილებას იღებენ, ნაკლებად წერენ შეფასებებს, აქ ბრენდთან კონკრეტული ინტერაქციაც კი ავიწყდებათ ხოლმე. ხოლო, როცა ამ ელ.ფოსტებს იმ მომხმარებლებს უგზავნიან, რომელთაც ისინი კონკრეტულ დროში არ შეაფასეს, კვლავ ჩვეულებრივი გამოცდილების მქონე ადამიანებამდე აღწევენ. შემდგომ კი მსგავსი ელ.ფოსტები უბრალოდ შეხსენებაა მომხმარებლებისთვის, გაუზიარონ თავიანთი მიმოხილვა. და რას ნიშნავს ეს ბიზნესებისთვის, რომლებიც ონლაინ შეფასებებს ეყრდნობა?
თხოვნა თქვენს რეიტინგებს ძალიან დადებითიდან და ძალიან უარყოფითიდან საშუალოზე გადაიყვანს
ეს კარგიც შეიძლება იყოს და ცუდიც. ელ.ფოსტებით მაინც ზომიერ, მოკრძალებულ მიმოხილვებს ვიღებთ, უკეთეს შეფასებებს კი მომხმარებლები საკუთარი სურვილითვე ტოვებენ. ამგვარად, მაღალი რეიტინგის მქონე პროდუქტებისთვის შეხსენებები საშუალო რეიტინგს მოგვიტანს შედეგად. თუმცა ეს დაბალი რეიტინგის მქონე პროდუქტებზე საპირისპიროდ და დადებითად მოქმედებს.
პლატფორმებს უბრალოდ მეტი შეფასება უნდათ, მათ არ უნდა დააყოვნონ შემახსენებელი ელ.ფოსტების გაგზავნა
ბიზნეს მოდელების გამო ონლაინ პლატფორმებს ხშირად არ აინტერესებთ, როგორ ნაწილდება რეიტინგები კონკრეტულ პროდუქტებზე. მაგალითად, Booking.com-ს უფრო მეტად მთლიანი გამოცდილების შეფასება სურს და არა, კონკრეტული სასტუმროსა თუ პროდუქტის. შესაბამისად, რაც უფრო მეტი „რივიუ“ ექნებათ, მით უკეთესია. მათთვის შემახსენებელი ელ.ფოსტების გაგზავნაც საკმაოდ ეფექტურია, თუმცა მნიშვნელოვანია, იგი დროულად გაიგზავნოს — კვლევისას მეცხრე დღეს გაგზავნილთან შედარებით, მოგზაურობიდან მეორე დღეს გაგზავნილმა ელ.ფოსტებმა შეფასებები 3%-ით გაზარდა.
შეფასების მისაღებად მომხმარებლის მოქრთამვა არ გჭირდებათ, შეხსენება საკმარისია
ზოგიერთი ბრენდი ონლაინ შეფასებების მისაღებად ფინანსურ წახალისებებს მიმართავს, მათ შორისაა კუპონები და ფასდაკლებები, რაც ბოლო 3 წელში ძალიან პოპულარული გახდა. მაგრამ კვლევის თანახმად, უბრალო შემახსენებელ ელ.ფოსტას იმის ნახევარი ეფექტი აქვს, რაც კუპონის მქონეს. გამოდის, შეფასების მისაღებად ყველა მომხმარებლისთვის გადახდა უბრალოდ ძალიან დიდ ხარჯებამდე მიგვიყვანს…
ბუნებრივია, ბიზნესებს სურს, მომხმარებლებმა შეაფასონ, მაგრამ სანამ კონკრეტულ ნაბიჯებზე გადავლენ, უმჯობესია, საერთო რეიტინგულ ქულებს გადახედონ და შემდგომ გადაწყვიტონ, რა გააკეთონ.
წყარო: HBR
