ბევრი ჩვენგანისთვის ახალი წელი ახალ დასაწყისს ნიშნავს, ამიტომ, წინასწარ გარკვეულ მოლოდინებს ვიქმნით. ასეა ბიზნესების შემთხვევაშიც, თუმცა აქ საჭიროებებისა და პრიორიტეტების ცვლას მეტი რისკიც ახლავს თან…
როცა კვლევისას მომხმარებლებს ჰკითხეს, თუ რას აპირებდნენ მომდევნო წელს, ისინი ჯანსაღი კვების, ვარჯიშის, წონის კლების, ფულის დაზოგვისა და სხვა მსგავს საკითხებზე საუბრობდნენ. გამოკითხულთა 21% კი ისეთ მიზნებს ისახავდა, როგორებიცაა ახალი უნარის შეძენა, ჰობებისთვის დროის გამოყოფა და ორგანიზებულობა. აღმოჩნდა, რომ ადამიანთა 18% ოჯახთან და მეგობრებთან უფრო მეტი დროის გატარებას აპირებს, 12% კი ნაკლებ დროს გაატარებს სოც.მედიაში. აქვე, მომხმარებლებს პირადი და პროფესიული ცხოვრების დაბალანსებაც სურთ.
მთლიანობაში, მათი პრიორიტეტები მრავალფეროვანია, მაგრამ მიუხედავად ამისა, გამოვლინდა სტრატეგიები, რომლებიც ნებისმიერ ბიზნესს მომხმარებელთა ცვალებადი პრიორიტეტების დაკმაყოფილებაში დაეხმარება:
მიეცით მომხმარებლებს ის, რაც სურთ
„ვაპირებ იმ პროდუქტების ყიდვას, რომლებიც ჩემი მიზნების სწრაფად მიღწევაში დამეხმარება და ცვალებად ჩვევებსაც გააძლიერებს“.
ბუნებრივია, ადამიანებმა იციან, რომ დასახული მიზნების მიღწევა ადვილი არ იქნება. მართალია, ზოგიერთი მეტად ოპტიმისტურადაცაა განწყობილი, მაგრამ ზოგიც იმ პროდუქტებს ეძებს, რომლებიც მათ ამ მიზნების მიღწევაში დაეხმარება. სწორედ ამიტომ, დიდებული დროა ბიზნესებისთვის, რათა ხაზი გაუსვან იმას, თუ როგორ შეუძლიათ მათ პროდუქტებს დაეხმარონ ადამიანებს იმაში, რაც სურთ.
მოიზიდეთ ახალი მომხმარებლები
„ვფიქრობ, წელს უფრო ღია ვიქნები იმ ახალი პროდუქტებისა და ბრენდების მიმართ, რომელთაც აქამდე არ ვაქცევდი ყურადღებას. მოვძებნი განსხვავებულ ბრენდებსა და პროდუქტებს 2023 წელს“.
გამოკითხულთა 80%-ის თქმით, 2023 წელს მათ ახალი ბრენდის გამოცდის სურვილი აქვთ, თუ იგი მათ მიზნების მიღწევაში დაეხმარება. გამოდის, ახლა ბიზნესებს ახალ მომხმარებელზე გასვლის საუკეთესო შანსიც აქვთ. ამისთვის კარგი გზა კი შეიძლება საახალწლო შეთავაზებები ან თქვენი პოპულარული პროდუქტების უფასოდ გამოცდის საშუალების მიცემა იყოს. ეს შანსი პატარა, ნაკლებად ცნობილმა ბრენდებმა აუცილებლად უნდა გამოიყენონ, რადგან ბევრი რესპონდენტი არაბრენდულ ვარიანტებსაც განიხილავდა.
გააცანით ახალი პროდუქტები
„მინდა, უფრო ღია გავხდე ახალი რაღაცების მიმართ… იმედი მაქვს, რომ ვიპოვი ახალ პროდუქტებს და არ ამოვიჩემებ იმას, რომელიც არც ისე ეფექტურია ჩემთვის“.
არსებულ მომხმარებლებს ახალი პროდუქტები ან ახალი სავაჭრო გამოცდილებაც შეგიძლიათ შესთავაზოთ. არ არის საჭირო ფუნდამენტური ცვლილებები ან რაღაც გრანდიოზული, მაგრამ ახალ წელს ახალ შეთავაზებას ნამდვილად კარგი შედეგის მოტანა შეუძლია. ამიტომ, განიხილეთ ახალი პროდუქტის გაშვება და გახსოვდეთ, რომ თქვენი მომხმარებლები ღია არიან სიახლეების მიმართ. ასე რომ, მიეცით მათ ის, რაც სჭირდებათ.
იზრუნეთ მომხმარებელთა ერთგულების მოპოვებაზე
„ამ წელს არ ვიქნები ერთგული სახელგანთქმული ბრენდების მიმართ, რადგან ნაკლებად ცნობილი ბრენდების პროდუქტები ხშირად ასეთივე კარგი და უფრო იაფიცაა“.
გამოდის, მომხმარებლები მზად არიან, ცნობილი ბრენდები მიატოვონ და მათ კონკურენტებზე გადაერთონ. ეს კი მათ ახალი მომხმარებლების მოსაზიდად უნდა გამოიყენონ. ეს იმასაც ნიშნავს, რომ კომპანიებმა ყველა ხერხს უნდა მიმართონ, რათა მომხმარებლებთან ძლიერი პერსონალური ურთიერთობები ჩამოაყალიბონ — რთულია, იმ ბრენდის მიტოვება, რომელთანაც პერსონალურ კავშირს გრძნობთ.
მომხმარებელთა ლოიალობის გასაზრდელად ეფექტური სტრატეგია შეიძლება დაჯილდოების პროგრამებიც იყოს. თუმცა ეს მხოლოდ ფინანსურ საკითხებს არ ეხება. კვლევების თანახმად, ასე მომხმარებლებისა და ბრენდის ურთიერთობის გაუმჯობესებაა შესაძლებელი. მეტიც, მომხმარებლები მატერიალურზე მეტად გამოცდილების უზრუნველმყოფ ჯილდოებს აფასებენ. ამიტომ, უბრალოდ ფასდაკლებებისა და შეთავაზებების ნაცვლად, განიხილეთ კინოს ბილეთების ჩუქება ან წვდომა ექსკლუზიურ კონტენტზე, რათა მათ თქვენს ბრენდთან უფრო ძლიერი კავშირი იგრძნონ.
დაეხმარეთ თანამშრომლებს ფინანსური მიზნების მიღწევაში
„გამოვიყენებ კუპონებს, დაველოდები ფასდაკლებებს და არ მივიღებ იმპულსურ გადაწყვეტილებას. მხოლოდ საჭიროებების მკაცრ სიას გავყვები“.
მიმდინარე ეკონომიკური მდგომარეობის ფონზე გასაკვირი არ არის, რომ რესპონდენტები მსგავსად საუბრობენ. ისინი ფულის შეგროვებას, დაზოგვასა და ვალების გადახდას აპირებენ. ამიტომ, კარგი იქნება, თუ კომპანიები მათ ამ ფინანსურ საჭიროებებს დაუკმაყოფილებენ, შესთავაზებენ ფასდაკლებებს, კუპონებს, გადახდის მოქნილ გრაფიკსა და სხვა. ამ ინფორმაციის მომხმარებლამდე მისატანად კი ინფლუენს მარკეტინგი დაგეხმარებათ.
პრიორიტეტი მიანიჭეთ ღირებულებას
„ვაპირებ, ვფოკუსირდე იმის რეალურ ღირებულებაზე, რასაც ვყიდულობ. სავარაუდოდ, ნაკლებად ვიყიდი იმას, რაც არ არის რეალურად საჭირო და ფულს იმ პროდუქტებზე დავხარჯავ, რომლებიც ღირებულია ჩემთვის“.
მიუხედავად ზემოთ განხილული ფაქტორისა, გამოვლინდა, რომ მომხმარებლები იაფ ვარიანტებზე მეტად, ღირებულების მიღებისკენ მიისწრაფვიან. მათ პრაქტიკული პროდუქტები სურთ, რომლებიც მიზნების მიღწევაშიც დაეხმარებათ.
აქ ბრენდები ხარისხზე უნდა ფოკუსირდნენ, საცალო მოვაჭრეებმა კი არსებულ პროდუქტებს დამატებითი ღირებულება უნდა შესძინონ და ეს ამბავი მომხმარებლებამდეც მიიტანონ. მაგალითად, Vital Protein-მა გამომწერებს გაუგზავნა საახალწლო რეცეპტები, რომლებშიც მათივე პროდუქტის სხვადასხვა გზით გამოყენებაზე ამახვილებდა ყურადღებას. მსგავსი კონტენტი კი დამატებით ღირებულებასაც აწვდის მომხმარებელს და შეახსენებს მას, რატომ ღირს ამ პროდუქტებში ფულის გადახდა.
მომხმარებლებს კარგი გადაწყვეტილებების მიღებაში დაეხმარეთ
„ვაპირებ, ვიყიდო ბევრი ეკომეგობრული პროდუქტი. ვეცდები, შევამცირო პლასტმასის გამოყენება და მოვძებნი ისეთ ნივთებს, რომლებიც გადამუშავებადი და მრავალჯერადად გამოსაყენებელი შეფუთვებისგან შედგება“.
საბედნიეროდ, ახალი წელი ის დროცაა, როცა მომხმარებლები მხოლოდ საკუთარ თავზე კი არ არიან ორიენტირებულნი, არამედ მსოფლიოზე დადებითად ზემოქმედებაც სურთ. ამგვარად კი, ბიზნესებმა ეკომეგობრული გადაწყვეტილებები უნდა მიიღონ იმ გზებით, რომლებიც კონკრეტულ ინდუსტრიებში მათთვის ხელმისაწვდომია.
დიახ, ახალი წელი ოპტიმიზმის, იმედისა და ცვლილებების დროა, თუმცა ჩვენი გადაწყვეტილებები მხოლოდ ჩვენს ცხოვრებაზე კი არ ზემოქმედებს, არამედ ჩვენს შესყიდვის გადაწყვეტილებებსაც შთააგონებს. ეს უკანასკნელი კი კომპანიებს ორ რამეს სთავაზობს: შესაძლებლობებსა და რისკებს. ახალი წელი ბიზნესებისთვის წარმატებული რომ იყოს, მათ უნდა გაიაზრონ, რა გავლენა აქვს მომხმარებელთა ცვლად აზროვნებას მათივე ბიზნესზე. განსაზღვრონ, როგორ შეუძლიათ მომხმარებელთა ცვალებადი საჭიროებების დაკმაყოფილება და იმ ღირებულების მიწოდება, რომელსაც მყიდველები დღეს ეძებენ.
წყარო: HBR
