როცა საქმე სამსახურში კეთილდღეობის გაუმჯობესებას ეხება, პატარა ნაბიჯებს დიდ ცვლილებებამდე მივყავართ, თუ რა თქმა უნდა, ამას მუდმივი ხასიათი აქვს. თუმცა ერთი რამ განვმარტოთ, თანამშრომლის კეთილდღეობა ორგანიზაციული საკითხია და არა ინდივიდუალური. ბევრი ფაქტორიც ზემოქმედებს ამაზე, მათ შორის სამუშაო დატვირთვა და მოქნილობა, მენეჯერი და გუნდის კულტურა. მაგრამ რა ხდება, როცა ვერც ორგანიზაციას და ვერ უფროსს ვიცვლით? მარტივი, თანაც მეცნიერებაზე დაფუძნებული საკითხები არსებობს და თუ მათ თქვენს ყოველდღიურობაში დანერგავთ, თქვენსავე ემოციურ კეთილდღეობას გაიუმჯობესებთ.
ემოციურ ნაწილში საკუთარi თავისადმი, აზრებისადმი, ემოციებისა თუ სხვა ადამიანებისადმი მეტად მხარდამჭერი ურთიერთობა იგულისხმება. ამგვარად, ემოციურ გამოწვევებს ნაკლები სტრესითა და შფოთვით გაუმკლავდებით… ახლა კი უშუალოდ იმ 6 მარტივი, მაგრამ გასაოცრად ძლიერი ემოციური პრაქტიკებისკენ გადავინაცვლოთ, რომლებიც სტრესის უკეთ მართვასა და თქვენი კეთილდღეობის გაუმჯობესებაში დაგეხმარებათ:
შეამოწმეთ საკუთარი თავი ყოველდღიურად
საკუთარ თავს ჰკითხეთ: როგორ ვგრძნობ დღეს თავს? თუმცა ნუ განსჯით თქვენს პასუხებს და ნურც იმის გამოსწორებას დაიწყებთ, რასაც გრძნობთ. უბრალოდ გაიაზრეთ ეს. კვლევის თანახმად, ადამიანები, რომლებმაც საკუთარი ემოციების შესახებ იციან, კეთილდღეობის გაუმჯობესებასაც უკეთ ახერხებენ. თქვენი რთული გრძნობების გაცნობიერება მათ ინტენსივობას ამცირებს და გაძლევთ შესაძლებლობას, გააკეთოთ რაღაც საკუთარი თავის მხარდასაჭერად.
აიღეთ რამდენიმე მოკლე, მაგრამ ხარისხიანი შესვენება დღის მანძილზე
მთავარი სიტყვა აქ ხარისხია. ეს იმის კეთებას გულისხმობს, რაც სამსახურთან კავშირის გაწყვეტაში დაგეხმარებათ. თუმცა სოციალური მედიის სქროლვა ან ახალი ამბების კითხვა ნამდვილად არ არის ხარისხიანი შესვენება, არც გასაკეთებელი საქმეების სიაში ჩახედვა…
ადამიანის ტვინს საუკეთესოდ ფუნქციონირებისა და სტრესის თავიდან ასარიდებლად ყოველ 90-120 წუთში სჭირდება შესვენება. Microsoft-მა ახლახან ჩაატარა კვლევა და ისიც გვეუბნება, რომ შეხვედრებს შორის 5-10 წუთიანი შესვენებები მნიშვნელოვნად ამცირებს სტრესის დონეს და ხელს გიწყობთ ფოკუსირებაში. ექსპერტებისთვის კი ამგვარი ხარისხიანი შესვენებისთვის საყვარელი გზა გარეთ გასეირნებაა — აუმჯობესებს განწყობას, თქვენი ფოკუსირებისა თუ მოტივაციის დონეს, რომ აღარაფერი ვთქვათ ჯანმრთელობის სარგებელზე, თუ ამას მუდმივად გააკეთებთ.
გამოცადეთ მიმღებლობა, რათა ფოკუსირდეთ იმაზე, რისი გაკონტროლებაც შეგიძლიათ
მიმღებლობა 2 ნაბიჯს მოიცავს: პირველი, სიტუაციის ცხადად გაცნობიერება, ფაქტებზე ფოკუსირება და მეორე, იმ ერთი ნაბიჯის დადგენა, რომლის გადადგმასაც ნაკლები სტრესით შეძლებთ.
ხშირად არასწორად ვაფასებთ იმას, თუ როგორ გვფიტავს სტრესული სიტუაციები… ხოლო, როცა საკუთარ თავს ნეგატიური ფიქრების მარყუჟში აღმოაჩენთ, მიმღებლობის ამ ორი ნაბიჯით ყურადღების ფოკუსირებას შეძლებთ იმ საკითხებზე, რომელთა კონტროლიც შეგიძლიათ. პატარა, მაგრამ პროდუქტიულ ქმედებებზე გადასვლასაც მოახერხებთ. ეს პატარა „მოგებები“ კი სწორედ ის არის, რაც თქვენს ტვინს პროგრესის გრძნობას უჩენს, თავს კარგად გაგრძნობინებთ და გაძლევთ მოტივაციას, იპოვოთ შემდგომი გამოსადეგი ნაბიჯები.
პრიორიტეტი მიანიჭეთ კოლეგებთან ურთიერთობის პატარა მომენტებს
მიესალმეთ თქვენს კოლეგებს ენთუზიაზმით, როცა საუბრობთ ან როცა მთელი დღის მანძილზე პირველად ხედავთ. ვირტუალურ შეხვედრებზე, სადაც პირდაპირ საქმეებში გადაშვების ტენდენცია ვლინდება, დასაწყისშივე ყველას სთხოვეთ, რომ გასული კვირიდან რაღაც კარგი გაგიზიაროთ. მიზნად დაისახეთ კოლეგასთან მისვლა იმის გასაგებად, თუ როგორ არიან.
თანაც პანდემიის შემდეგ ადამიანებთან ურთიერთობა ყველას გვწყურია და თუ ამას ვერ ვახერხებთ, ეს უარყოფითად აისახება ჩვენსავე კეთილდღეობაზე. კვლევაც ამაზე მოწმობს — სოციალური მხარდაჭერა და კავშირის შეგრძნება ჩვენს მენტალურ ჯანმრთელობას აუმჯობესებს, შესაბამისად, სტრესისა და შფოთვის დონეებს ამცირებს.
ასე რომ, გამოიჩინეთ ინიციატივა და თქვენს კოლეგასთან კავშირის ყოველდღიური მომენტები შექმენით. ამას არც დიდი დრო და ძალისხმევა სჭირდება, თანაც ასე სხვა ადამიანსაც ეხმარებით, თავი ნაკლებად მარტოსულად იგრძნოს.
გამოხატეთ მადლიერება, რათა თქვენივე ტვინის ნეგატიურ მიკერძოებებს დაუპირისპირდეთ
თუ უკვე არ ფლობთ რაღაც ასეთს, დაამკვიდრეთ ყოველდღიური მადლიერების პრაქტიკა. ეს ისეთივე მარტივი შეიძლება იყოს, როგორც ყოველ დილით ან საღამოს იმ სამი საკითხის ჩამოწერა, რომლებსაც ყველაზე მეტად აფასებთ.
მადლიერების აზროვნების განვითარება ყოველთვის სასარგებლოა თქვენი კეთილდღეობისთვის, განსაკუთრებით კი არამდგრად სიტუაციებში. ეს არამდგრადობა ძალიან სტრესულია და ენერგიას გაცლით, ადამიანის ტვინისთვის ყველაზე რთული საკითხიცაა გასამკლავებლად — როცა ტვინი არასტაბილურ სიტუაციაში ექცევა, შესაძლო საფრთხეების პოვნაზე ფოკუსირდება და ირჩევს ამასთან გამკლავების ან გაქცევის მდგომარეობას, რათა დაგიცვათ. ეს კი, რეალურად, თქვენს შფოთვას ზრდის და ყველაზე ცუდი სცენარების წარმოდგენისკენ გიბიძგებთ.
აი, მადლიერების გამოხატვით თქვენს ტვინს არსებული ხედვის გაფართოებისა და ყურადღების ფოკუსირების საშუალებას აძლევთ მეტად პოზიტიურ საკითხებზე. აქ მიზანი არსებული სირთულეების უარყოფა ნამდვილად არ არის, არამედ საკუთარი თავისთვის იმის შეხსენება, რომ მხოლოდ ეს არ შეადგენს თქვენს ცხოვრებას. მსგავსად, თქვენი ემოციური მდგომარეობაც უმჯობესდება და მეტად გამძლეებიც ხდებით.
აქტიურად დაისვენეთ სამსახურის გარეთ
ბოლოს კი, მნიშვნელოვანია, სამსახურის გარეთ არსებული დრო თქვენთვის საყვარელ საქმეებსა თუ აქტივობებს დაუთმოთ — კითხვა, მებაღეობა, ხატვა, წერა… რაღაც ჰობი, რაც სიამოვნებას განიჭებთ. იდეა იმის კეთებაა, რაც მეტი ენერგიით დაგმუხტავთ. ამ კუთხით კვლევაც საინტერესო მოსაზრებას გვიზიარებს — ექთნები, რომლებიც თავისუფალ დროს ჰობს, მეგობრებთან ან ოჯახის წევრებთან დროის გატარებას უთმობდნენ, ნაკლებად გრძნობდნენ თავს გამოფიტულად…
დაბოლოს, მაშინაც კი, როცა თქვენი საქმე ძალიან გიყვართ, სამსახურის გარეთ თქვენთვის საყვარელი სხვა რაღაცები უნდა აკეთოთ. საკუთარ თავს შეახსენეთ, რომ აქტიური დასვენება საკუთარ თავში ინვესტირებაა, რითაც თქვენს მაქსიმუმს გამოავლენთ.
წყარო: HBR
