როგორ გამოიმუშაოთ ჯანსაღი ჩვევები, თუ გადაღლილი ხართ?

ახალი ჩვევის ჩამოყალიბება შეიძლება იყოს რთული, რომ აღარაფერი ვთქვათ უკვე არსებულის შეცვლაზე მაშინ, როდესაც ბოლომდე დაიხარჯეთ და გადაქანცული  ხართ. ბოლო რამდენიმე წელიწადმა თითქმის ყველა გადაღალა. თქვენ შეიძლება ენერგია ამოგეწურათ და ეჭვი გეპარებათ, ნამდვილად შეძლებთ თუ არა თქვენი მდგომარეობის შეცვლას – ან უბრალოდ, არ იცით საიდან დაიწყოთ. 

მაშ, რას აკეთებთ, როდესაც თქვენი ჩვევების გაუმჯობესების მოჯადოებულ წრეში იმყოფებით? როგორ უნდა იგრძნოთ განახლება, როცა ნებისყოფისა და მოტივაციის მოპოვება გიჭირთ? 

უამრავი ადამიანი, საქმის დაწყებისას უკვე დაღლილია, ზოგჯერ გადამწვარიც კი. მათ სურთ ცვლილება, მაგრამ არ იციან, როგორ დაიწყონ. ცხადია, მნიშვნელოვანია იპოვოთ აღდგენის გზა, რომელიც თქვენ ამჟამინდელ მდგომარეობას გაითვალისწინებს, მაგრამ არ მოგცემთ დანებების საშუალებას. ზოგჯერ, წინსვლაში დახმარების გასაღები საკუთარ თავთან მკაცრი მიდგომა სულაც არ არის. გვჯერა, თქვენ უკვე საკმარისად მკაცრი ხართ საკუთარი თავის მიმართ. სამაგიეროდ, ყველაზე ეფექტური გრძელვადიან პერსპექტივაში არის კომპლექსური მიდგომა: ძილის, კვებისა და ვარჯიშის საშუალებით საკუთარ თავზე ზრუნვა წინსვლის საფუძველს ქმნის, დროის მენეჯმენტის სხვა სფეროებში.

თუ თქვენ დაღლილი ხართ, მაგრამ ცვლილებებისკენ მაინც ისწრაფვით, განვიხილოთ გზა ახალი ჩვევების მდგრადი შექმნისკენ.

გამოიძინეთ

თუ ძალიან დაღლილი ხართ, მაშინ უფრო მეტი პროდუქტიულობის გასაღები უფრო ძლიერი დატვირთვა ვერ იქნება. როგორც კი ჩვეულ რეჟიმში საკმარისად გამოიძინებთ, თქვენი სხეული თავად დაგეხმარებათ თქვენი ყოველდღიური მიზნების მიღწევაში.

არსებობს ძალიან კონკრეტული თანმიმდევრობა, რომლის მიხედვითაც მართებულია დაღლილობისას ძილის რეჟიმზე იმუშაოთ. დაიწყეთ ძილის დაგეგმვით, იმის მიხედვით, თუ რამდენი საათი გჭირდებათ დასვენებისთვის. თუ საღამოს რვა საათია და დილის 7 საათზე გჭირდებათ ადგომა, ეს ნიშნავს, რომ შუქს ღამის 11 საათზე ჩააქრობთ. დააყენეთ განმეორებადი მაღვიძარა ამ დრომდე დაახლოებით 30 ან 45 წუთით ადრე თქვენს ტელეფონზე, რათა თავს შეახსენოთ, რომ დროა ძილისთვის დაიწყოთ მზადება

დაიწყეთ ძილის წინ რუტინაზე მუშაობა ისე, რომ დაწოლისას რეალურად დაიძინოთ. ექსპერიმენტი ჩაატარეთ სხვადასხვა სტრატეგიით, როგორიცაა ელექტრონიკის გამორთვა ძილის წინ ერთი საათით ადრე, არ უყუროთ რაიმე მასტიმულირებელს გვიან ღამით, ან უბრალოდ ჩაუწიეთ განათებას. 

თქვენი ძილის ხარისხის გასაუმჯობესებლად შემდეგი ნაბიჯი არის ფოკუსირება დროულად ადგომაზე. ადამიანების უმეტესობა ამ მიზანს პირველ ნაბიჯად აყენებს, მაგრამ ის სინამდვილეში მოგვიანებით მოდის. თუ კი დროულად და სწრაფად იძინებთ, ადგომა ბევრად უფრო ადვილია და როგორც დამატებითი ბონუსი, უფრო ადრე ადგომა ბევრად გაგიადვილებთ სამსახურში მგზავრობის დღეებს.

გადააფასეთ კვება

მას შემდეგ, რაც დასასვენებლად საკმარის დროს გამოყოფთ, სხვა მიმართულებებზე მუშაობის ენერგიასაც მიიღებთ. ენერგიის აღსადგენად ერთ-ერთი ეფექტური გზა სწორი კვებაა. დაიწყეთ უფრო მეტი წყლის სმით. წყლის დიდი რაოდენობით მიღება გვმატებს ენერგიას, აუმჯობესებს კონცენტრაციას, ამცირებს დაღლილობასა და შფოთვას. ყოველთვის იქონიეთ წყალი სამუშაო მაგიდასთან ახლოს და რეგულარულად სვით.

შემდეგ, აზრები კვებისკენ მიმართეთ. ხშირად, ისე ვართ ჩაფლული საქმეში, ჭამის დროც არ გვრჩება. ასეთი სიტუაციებისთვის ცილოვანი კოქტეილები ან ფიტნეს-სნექები მოიმარაგეთ. შესაძლოა, ამის შესახსენებლადაც დაგჭირდეთ კალენდრის ან ტელეფონის გამოყენება.

იმოძრავეთ მეტი

როდესაც ძილისა და კვების საკითხებს დაარეგულირებთ, დღის წესრიგში ფიზიკური აქტივობა ჩართეთ. ვარჯიში ენერგიით მოგამარაგებთ, გაგიუმჯობესებთ განწყობას, ძილის ხარისხსა და ფოკუსს. თუკი, დღის მანძილზე 25 წუთს მაინც დაუთმობთ ენერგიულ კარდიოვარჯიშებს, მთლიანობაში დიდ პროგრესს მიაღწევთ. დანიშნეთ სპეციალური დროები, კვირის განმავლობაში. თუკი, მოტივაციის მოკრება გიჭირთ, საერთო ინტერესების მქონე მეგობრები შემოიერთეთ. თუკი, ფიზიკური აქტივობის დაწყება დატვირთვას ნიშნავს, მაშინ, მცირე ნაბიჯებით შეუდექით ვარჯიშს – ჯერ მსუბუქი გაჭიმვებით. მაგალითად, დილას, გაღვიძებიდან 5-10 წუთი დაუთმეთ.

აირჩიეთ ახალი ჩვევა

ზემოთ ნახსენები აქტივობების დანერგვის შემდეგ, აირჩიეთ, რომელი ახალი ჩვევები გსურთ გამოიმუშაოთ? გადატვირთვის შესამცირებლად, გირჩევთ მხოლოდ ერთი ჩვევა აირჩიოთ. მაგალითად, დროის მენეჯმენტი, კვირის დაგეგმვა, პროექტის ამოცანებად დაყოფა ან ნებისმიერი სხვა. ფოკუსირდით მის ეტაპობრივად გამომუშავებაზე. მაგალითად, თუ დროის მენეჯმენტს აირჩევთ, იფიქრეთ, რომ შეხვედრაზე რამდენიმე წუთით ადრე მიხვიდეთ. დაიწყეთ მცირედით და ნელ-ნელა გაზარდეთ. ამრიგად, ენერგიის აღდგენასაც მიეჩვევით და დაღლილობასაც მალევე დააღწევთ თავს.

 

წყარო: HBR