20
Jul
2018

რატომ არის პერსონალიზაცია სასტუმროების ელექტრონული კომერციის მომავალი? 

20 Jul 2018

სასტუმროების ბიზნესში, პერსონალიზაცია ტრენდი უკვე დიდი ხანია, აღარ არის. დღეს, ეს ერთგვარი ვალდებულებაა. ინდუსტრიის მოთამაშეები სულ უფრო აქტიურად იყენებენ ტექნოლოგიურ ინსტრუმენტებს, რომ რაც შეიძლება გაამარტივონ ნომრის დაჯავშნის პროცედურა და სტუმრებს მეტი კომფორტი შეუქმნან. მაგალითად, თუ პოტენციური კლიენტი ვებგვერდის საშუალებით იხდის საფასურს, მკაცრადაა გაწერილი თითოეული ნაბიჯი, მითითებულია რომელი ტრანზაქცია როგორ განხორციელდეს და ა.შ. ეს ვების ტექნოლოგიური პერსონალიზაციის საშუალებით ხორციელდება და სასტუმროს ხელმძღვანელობას აძლევს შესაძლებლობას, კლიენტს ავტომატურად შესთავაზოს კონკრეტული კატეგორიის ნომრები, სხვადასხვა სახის პაკეტები და თითოეულ მომხმარებელზე მორგებული მოსაკრებელიც კი.

პერსონალიზაციის დახმარებით გაუმჯობესებულ პროცედურებს მთელი რიგი სარგებელი მოაქვს სასტუმროსთვის. მაგალითად,„ბუქინგის“ რაოდენობის მატება, მომხმარებლების კმაყოფილება და ვებგვერდზე ხელმეორედ დაბრუნება, რაც ბრენდის მიმართ ლოიალობის ზრდის მაჩვენებელია. ყველა ამ ნაბიჯმა, შესაძლებელია, სასტუმროს მისცეს კიდევ დამატებითი ინსტრუმენტი, რომ უფრო ეფექტურად გააკონტროლოს გაფართოების თაობაზე მიღებული გადაწყვეტილებები. შემდეგ კი, პირდაპირი და არაპირდაპირი არხების საშუალებით, დააბალანსოს ელექტრონული გაყიდვების სტრატეგია.

მოდით, გავეცნოთ 4 მაგალითს, როგორ განავითარეს სასტუმროებმა პერსონალიზაციის ინსტრუმენტები და თანამედროვე, ცვალებადი ელექტრონული კომერციის ლანდშაფტისთვის საჭირო მეთოდები.

 

ბრენდის მიმართ ლოიალობის ზრდა კომპანიის ინვესტიციაა 

ბრენდის მიმართ ლოიალობის საკითხმა „აიძულა“ ნევადას შტატში არსებული კაზინო Affinity Gaming-ის მარკეტინგის დირექტორი ვინსენტ ლენტინი, შემოსავლების განკარგვის სტრატეგიულ პლატფორმა Duetto’s PlayMaker-თან ეთანამშრომლა და ვებგვერდის პერსონალიზაცია გაეკეთებინა. მისი თქმით, ნაღდი ფულით გადამხდელი კლიენტებს ხომ ნებისმიერი Online Travel Agency, ანუ OTA-ისადმი არც თუ სახარბიელო დამოკიდებულება აქვთ. ლენტინი განმარტავს, რომ PlayMaker-მა მოახერხა მათი დაწესებულების მიმართ, ლოიალობის გაზრდა, რადგან პირდაპირი დაჯავშნის შემთხვევაში, პოტენციურ სტუმრებს გარკვეული ბენეფიტები შესთავაზა.

„ჩვენს სტუმრებზე ახლა გაცილებით მეტი ინფორმაცია გვაქვს. იმის მიუხედავად, რომ ვიცით, ვის როგორი ნომერი ან ლოიალობის კოეფიციენტი შევთავაზოთ, შეუძლებელია ხელით უზრუნველყო ამ მასშტაბის პერსონალიზაცია ჯავშნის გაფორმების პროცესში ან შეარჩიო, რა შემთხვევაში რომელი შეთავაზება გაუკეთო კონკრეტულ კლიენტს. ახლა როცა, ჩვენი პარტნიორები ციფრული მარკეტინგისა და შემოსავლების სტრატეგიის მიმართულებით გვეხმარებიან გადაწყვეტილებების მიღებაში, ვცდილობთ, მაქსიმალურად ეფექტურად გამოვიყენოთ ჩვენი პირდაპირი არხები“, – ამბობს ვინსენტ ლენტინი.

ლენტინი აპირებს, მათ, ვინც Affinity’s ლოიალობის პროგრამას შეუერთდება, სპეციალური შეთავაზების სახით, 10%იანი ფასდაკლება შესთავაზოს. მისი აზრით, ეს გაცილებით მეტ შემოსავალს მოუტანს. თან, კომპანია, აღარც OTA-ების მხრიდან დაიბეგრება 15%-ით.

აუცილებელია პირდაპირი ჯავშნის კოეფიციენტის გაუმჯობესება 

პერსონალიზაციის დღევანდელი ტექნოლოგია, ასევე, დაეხმარება სასტუმროებს, მოახდინონ პირდაპირი ჯავშნის კოეფიციენტების ოპტიმიზაცია. ბოსტონის უნივერსიტეტის, სასტუმროების ბიზნესის ადმინისტრირების სკოლის დეკანი, პროფესორი არუნ უპნეა გამოცემა Skift-თან ინტერვიუში აღნიშნავს, რომ პირდაპირ, ძირითადად, სასტუმროების ვებგვერდიდან იჯავშნება.

„მაგრამ თუ ანალიტიკოსები იტყვიან, რომ ვებგვერდზე უბრალოდ შემოდის ხალხი და ჯავშნები ნაკლებად კეთდება, ე.ი. დროა, ახალი ინსტრუმენტების გამოყენება დავიწყოთ. ვებგვერდიდან გასვლის შემდეგ, ალბათ, მომხმარებლებს ავიწყდებათ კიდეც ის დეტალები, იმდენ სხვადასხვა მისამართზე გადადიან სასტუმროს ვებიდან. ამიტომ, სანამ სხვა ბმულზე გადაიყვანთ, შესთავაზეთ სწორი ფასები, სასტუმროს ნომრების კლასიფიკაცია და სხვა, მათთვის საინტერესო დეტალები“, – ამბობს არუნ უპნეა.

მნიშვნელოვანია ადამიანურ და ტექნოლოგიურ პერსონალიზაციებს შორის ბალანსის დაცვა 

სტუმრების პერსონალიზაცია, დღეს, სასტუმროს ბიზნესში ჩვეულებრივი მოვლენაა. ისეთი ბრენდები, კი როგორიც, მაგალითად, არის სასტუმროებისა და რესტორნების ქსელი sbe, ცდილობენ, დაიცვან ბალანსი ადამიანური და ტექნოლოგიური რესურსის პერსონალიზაციას შორის.

ბრენდის ინფორმაციის ოფიცერი პიტერ ჩამბერსი ამბობს, რომ ადამიანებზე ორიენტირებული პერსონალიზაცია, კომპანიის გამოცდილებით, კონკრეტულ პიროვნების აბსოლუტური ინტეგრალია. ეს ითვალისწინებს პერსონალის განათლებას, სასმელს, საკვებს, დიზაინსა და სტუმრის კომფორტის შექმნისთვის ყველა სხვა კომპონენტს.

თუმცა, მისივე თქმით, ამ ბიზნესში არანაკლებ მნიშვნელოვანია ტექნოლოგიური პერსონალიზაცია. მაგალითად, ვებგვერდის საშუალებით ნომრის დაჯავშნა.

„ამ ტექნოლოგიით, ვცდილობთ, მოვახერხოთ მომხმარებლის ჩვენს კომპანიასთან ინტეგრირება და თითოეულმა სტუმარმა, თავი sbe-ის გარემოცვაში, უშუალოდ სასტუმროში მოსვლამდე იგრძნოს“, – ამბობს ჩამბერსი.

ციფრული აქტივობები, როგორც მნიშვნელოვანი ინსტრუმენტი 

პერსონალიზაციის ტექნოლოგია, „ონალიან“ ჯავშნის ხელახლა გასააზრებლად, სულ უფრო მნიშვნელოვანი ინსტრუმენტი ხდება. მაგრამ იმისთვის, რომ ეს პროცესი წარმატებული იყოს, აუცილებელია თან ახლდეს ისეთი ტრადიციული მიმართულებების რეგულირება, როგორებიცაა კლიენტთა მომსახურება და სასტუმროს დიზაინი. ამერიკული სასტუმროების ქსელი The Viceroy Los Cabos ერთ-ერთი მათ შორის, რომლის წარმომადგენლებიც ცდილობენ, ვიზიტორს შესთავაზონ პერსონალიზაცია ყველა მიმართულებით, როგორც ჩამოსვლამდე, ისე უშუალოდ სასტუმროში ყოფნის დროს.

Viceroy-ის ციფრული პერსონალიზაცია ნომრის დაჯავშნის ფაზით იწყება. ამას პოტენციური სტუმარი სასტუმროს ვებგვერდის საშუალებით აკეთებს, რომელიც ხელმისაწვდომია კომპიუტერისა და „სმარტოფონის“ საშუალებით ინგლისურ და ესპანურ ენებზე, რაც სასტუმროს ძირითად ბაზრებზე მიუთითებს. ამ მარტივი ნაბიჯების შემდეგ, თითოეული მომხმარებლისთვის ხელმისაწვდომი ხდება კონკრეტული შეთავაზების პაკეტი, რომელიც შერჩეულია ინდვიდუალურად მისი IP მისამართის მიხედვით. ანუ ყურადღება ექცევა, თუ რომელი ქვეყნიდან არის შემოსული ვებგვერდზე პოტენციური ვიზიტორი.

„ჩვენ ვიცით, რა მოთხოვნა არსებობს კონკრეტულ ბაზრებზე და რახან გვაქვს ინფორმაცია, საიდან არის ვიზიტორი, შესაბამის პაკეტებს ვთავაზობთ“, – ამბობს Viceroy Los Cabos მარტინ კიპინგი.

მისივე ​თქმით, „ონლაინ“ სივრცეში ყოფნისას, ყველა სოციუმის წარმომადგენელს ინდივიდუალური ქცევა ახასიათებს. ამიტომ, შესაბამისია სასტუმროს წარმომადგენლების შეთავაზებებიც. მაგალითად, ვებგვერდზე ტვირთავენ საკვებისა და სასმელის ფოტოებს, ოთახების ვიზუალს და ა.შ. შემდეგ კი ადგილზე ჩამოსულებს, კიდევ დამატებით ბენეფიტებს სთავაზობენ.

დასკვნა 

პერსონალიზაცია, რომელიც დღეს ასე მნიშვნელოვანია სასტუმროების ბიზნესში, ძირითადად, მომხმარებლის გამოცდილებას ემყარება. თუ იგრძნობენ, რომ თითოეული დეტალი კონკრეტულად მათთვის გათვალეს, მოიფიქრეს და ისე შესთავაზეს, ამ სასტუმროში ისინი მეორედ და შესაძლოა უფრო მეტჯერაც, აუცილებლად დაბრუნდებიან.

მაგრამ სასტუმროს მფლობელები და ხელმძღვანელობა მხოლოდ მზა რეცეპტის იმედზე არ უნდა იყოს. დღეს ამ ინდუსტრიაში საკმაოდ დიდი კონკურენციაა. პერსონალიზაცია ისე უნდა იყოს ადაპტირებული და მოიცავდეს სხვადასხვა მიმართულებას, რომ პოტენციურ სტუმარს ბრენდის მიმართ ლოიალობა გაუჩნდეს.

 

წყარო: www.skift.com



განხილვა