როგორ ვითხოვოთ რაღაც ისე, რომ იძულებად არ ჟღერდეს

როდესაც პროექტზე მუშაობთ და თქვენს გუნდს სთხოვთ ზეგანაკვეთურ მუშაობას, შეიძლება მოგეჩვენოთ, რომ თქვენი თანამშრომლებისგან დადებითი პასუხის მიღება ნებისმიერ ფასად გჭირდებათ. მაგრამ როგორია ეს ფასი? როდესაც თანამშრომლები გრძნობენ ზეწოლას ან დანაშაულის გრძნობას იმ თხოვნაზე დათანხმებისას, რომელიც პირადად მათთვის მიუღებელია, ამან შეიძლება გამოიწვიოს იმედგაცრუება და წყენა. თანამშრომელმა, რომელიც უხალისოდ ეთანხმება თხოვნას მოცემულ მომენტში, შეიძლება დაბალი ხარისხის დახმარება გაგიწიოთ ან უარი თქვას თავის ვალდებულებაზე თქვენთვის ნაკლებად მოსახერხებელ დროს.

თანამშრომელთა ერთგულებისა და ჩართულობის შენარჩუნება, რომ არაფერი ვთქვათ იმის უზრუნველყოფაზე, რომ არ გადაკვეთოთ ზღვარი თანამშრომლებზე უნებლიე ზეწოლით, მოითხოვს ნამდვილი, ნებაყოფლობითი თანხმობის მიღებას. ბევრმა არ იცის, როგორ გამოთქვას თხოვნა ისე, რომ ზეწოლა არ აგრძნობინოს ადრესატს.

რას გვიჩვენებს კვლევა

კვლევები აჩვენებს, რომ ადამიანები უფრო მეტ ზეწოლას გრძნობენ თხოვნაზე თანხმობისას, ვიდრე ჩვენ გვგონია. ისინი ხშირად თანხმდებიან ისეთი რამის გაკეთებაზე, რაც არ სურთ. თხოვნით შეგვიძლია ვინმე უხერხულ მდგომარეობაში ჩავაყენოთ, რადგან ადამიანებს ხშირად უჭირთ „არას“ თქმა.

ზეწოლის წინააღმდეგ საბრძოლველად, მრავალმა მკვლევარმა და პრაქტიკოსმა შექმნა სტრატეგიები, რომლებიც შეიძლება გამოიყენონ თხოვნის ადრესატებმა უარის სათქმელად. თუმცა, ასეთი ჩარევები უარის თქმის ტვირთს მთლიანად თხოვნის ადრესატზე აკისრებს. გარდა ამისა, ეს ჩარევები შეიძლება საეჭვოდ ეფექტური და არაპრაქტიკული იყოს, ხშირად მოითხოვს ადრესატებისგან რთული, მრავალნაწილიანი პასუხების მოფიქრებას, რომელთა განხორციელებაც არარეალისტურია.

ალტერნატიული მიდგომის სახით, როგორ შეიძლება მთხოვნელებმა ჩამოაყალიბონ თხოვნები ისე, რომ ადრესატებს უფრო მეტი უფლებამოსილება ჰქონდეთ საკუთარი ნებაყოფლობითი არჩევანის გასაკეთებლად?

მიეცით ადამიანებს დრო პასუხის გასაცემად

ადამიანებისთვის შეიძლება რთული იყოს „არას“ სათქმელად სიტყვების მოფიქრება, როდესაც ისინი უეცრად აღმოჩნდებიან ასეთ სიტუაციაში. სიტყვების დაკარგვა, რასაც ჩვენ განვიცდით მოცემულ მომენტში, საბოლოოდ შეიძლება გახდეს მიზეზი იმისა, რომ თანხმობა ნაკლები წინააღმდეგობის გზად მოგვეჩვენოს. შესთავაზეთ დრო დასაფიქრებლად. ამის გაკეთება შეგიძლიათ თქვენი თხოვნის გამოთქმით და შემდეგ დამატებით, მაგალითად, „ახლავე ნუ მიპასუხებთ. დაფიქრდით და ხვალ მითხარით“.

სთხოვეთ ელფოსტით გიპასუხონ

ელფოსტა არ არის სრულყოფილი საშუალება, მაგრამ მას აქვს თავისი უპირატესობები. ერთ-ერთი უპირატესობა ისაა, რომ ის საშუალებას გაძლევთ დაწეროთ და გადააკეთოთ სათქმელი იმდენჯერ, რამდენჯერაც გსურთ. ზოგიერთ ადამიანს სჭირდება ძალიან კონკრეტული რამეების თქმა, რათა თავი საკმარისად კომფორტულად იგრძნონ უარის სათქმელად. ელფოსტა ამის საშუალებას იძლევა. თხოვნაზე ელფოსტით პასუხის გაცემის საშუალების მიცემის კარგი გზაა თხოვნის ელფოსტით გაგზავნა.

გაუზიარეთ „არას“ თქმის მაგალითი

„თუ არ გინდათ, შეგიძლიათ უარი თქვათ,” – მიეცით მაგალითი და გაუადვილეთ მოსაზრების თქმა ადამიანებს. ასეთ შემთხვევაში, მხოლოდ ამ დამოკიდებულების გამოც კი შეიძლება დაგთანხმდნენ.

თქვენ შეგიძლიათ შექმნათ გარემო, სადაც თანამშრომლები თავს უფრო კომფორტულად იგრძნობენ თქვენს თხოვნაზე გულწრფელი პასუხის გასაცემად, იქნება ეს დადებითი თუ უარყოფითი. ეს არა მხოლოდ აუმჯობესებს კომუნიკაციას, არამედ ხელს უწყობს ნდობასა და პატივისცემას სამუშაო გარემოში.

თხოვნის გამოთქმა, იძულების შეგრძნების გამოწვევის გარეშე, არის უნარი, რომელიც შეიძლება განავითაროთ და დახვეწოთ. ის მოითხოვს ემპათიას და იმის გააზრებას, თუ როგორ შეიძლება აღიქვას თქვენი თხოვნა მეორე მხარემ. გახსოვდეთ, ნამდვილი თანხმობა და თანამშრომლობა მოდის მაშინ, როდესაც ადამიანები გრძნობენ, რომ მათ აზრს პატივს სცემენ და მათ აქვთ რეალური არჩევანი.

წყარო: HBR