სადაზღვევო კომპანიისგან როგორ რეკლამას მოელით? ან რომელი გახსენდებათ? ალბათ, საშინელებათა ფილმები არა… თუმცა ამას სინგაპურში დაფუძნებული Income Insurance ნამდვილად არ შეუჩერებია. ისინი რეკლამირების კრეატიული საზღვრების გარღვევას ისახავენ მიზნად და მთლიან მარკეტინგულ ბიუჯეტსაც ამას უთმობენ. სწორედ ამიტომ, 3 ერთმანეთისგან განსხვავებულ რეკლამას გვთავაზობენ.
ნამდვილად რთულია, თითქმის 18-წუთიანი საშინელებათა ფილმი როკ ბენდის მუსიკას დაუკავშირო, ანდაც გიგანტურ ყვითელ სტრესის ბურთს, რომელიც უსულო სხეული კი არა, ადამიანი-ბურთია თავისივე გრძნობებით… მაგრამ ეს ის არის, რასაც Income Insurance სააგენტო BBH Asia Pacific-თან ერთად აკეთებს.
კომპანიის ძირითადი აუდიტორია 30-49 წლამდე მერყეობს, მაგრამ ამ სეგმენტის მიღმა არსებულ ადამიანებზეც ზრუნავს, რომელთაც სურთ, დაცულობის შეგრძნება ჰქონდეთ. თანაც ბრენდმა დაადგინა, რომ სინგაპურელების 70% ადეკვატურად დაზღვეული არ არის. სწორედ ამიტომ, მარკეტინგის ბიუჯეტიდან თითოეული თეთრი პროდუქტების რეკლამირებას ეძღვნება.
ისინი ბრენდის კამპანიებს კი არ აგებენ, არამედ პროდუქტის კამპანიებს. შესაბამისად, BBH-ისთვის მიცემული ბრიფებიც პროდუქტების ირგვლივაა აგებული. BBH-ის სტრატეგიის ხელმძღვანელის კრის ჩალკი ამბობს: „ჩვენ საკმაოდ მკაფიო შეხედულებას ვიღებთ იმაზე, თუ რა პროდუქტია ეს და ვინ არის მისი სამიზნე აუდიტორია. სააგენტოსთვის ეს შესანიშნავია, მკაფიო ბრიფს მეტად საინტერესო კრეატიულ გადაწყვეტილებებამდე მივყავართ“.
მიუხედავად იმისა, რომ ყველაფერი მკაფიოდ და მკაცრად არის გაწერილი, სააგენტოს მაინც აქვს საშუალება, კრეატიულ გადაწყვეტილებებში მეტად ამბიციური იყოს. იმდენადაც კი, რომ ჯანმრთელობის დაზღვევას მუსიკალური ვიდეოს გაკეთება შესთავაზეს, რომლისთვისაც The Calling-ის როკერების ბენდი აარჩიეს, რადგან ეს მათი სამიზნე სეგმენტიდან რამდენიმე ჯგუფს უკავშირდებოდა. ვიდეოს გაშვებიდან ერთ თვეში მარტო Youtube-ზე 1.2 მილიონი ნახვა ჰქონდათ. გამოდის, განსხვავებულ ჟანრში შებიჯებაც წარმატებული აღმოჩნდა და ეს Income-ს სხვებისგან გამორჩევაშიც დაეხმარა.
რაც შეეხება საშინელებათა ფილმებით შთაგონებულ რეკლამას, ამას გუნდი როგორც რეკლამას ისე არ უყურებდა, ამიტომ კინორეჟისორ კელვინ ტონგთან ერთად მუშაობდა, რომელიც ისეთი ფილმებითაა ცნობილი, როგორებიცაა Eating Air და The Maid.
„გუნდი ღია იყო ჩვენი იდეებისადმი, გაგვაკვირვა კიდეც მათმა არჩევანმა და აქედან დაიწყო ყველაფერი. ერთ პროექტს მეორე მოჰყვა და რა არის შემდგომი საინტერესო რამ, რაც შეგვიძლია გავაკეთოთ? ჩვენ ეს შევძელით და იმედი გვაქვს, რომ ასეც გავაგრძელებთ“, — აცხადებს კააირულ მონძი, შემოქმედებითი ხელმძღვანელი.
მართალია, გუნდი მრავალ სტილს გვთავაზობს, მაგრამ ბრენდის ხელწერა ყველგან მკაფიოდ იგრძნობა. „ბევრი ადამიანი ვერ შეამჩნევს ამას, მაგრამ საშინელებათა ფილმის მუსიკა მთლიანად ჩვენი ბრენდის მუსიკაა. BBH-ს ჰქონდა უფლება, ის გადაეკეთებინა“.
საინტერესოა ისიც, რომ ყველა ნამუშევარს იუმორის ელემენტები აერთიანებს, მომავალი პროექტებისთვის კი შესაბამისი მოლოდინიც შექმნილია.
„ჩვენ ეს წელი დავიწყეთ სტრესის ბურთით, შემდგომ გავაგრძელეთ საშინელებათა ფილმით და ახლა მუსიკალური ვიდეო შემოგთავაზეთ. არ მგონია, ამ სამიდან რომელიმეს მოლოდინი ვინმეს ჰქონოდა“, — აცხადებენ კრეატორები.
ასე იყო თუ ისე, კრეატიული საზღვრების გაფართოებითა და, ერთი შეხედვით, უცნაური იდეების განხორციელებით, ფაქტია, სადაზღვევო კომპანიამ სხვებისგან გამორჩეული ადგილის დამკვიდრება შეძლო…
