თავდაპირველად, ეს სერვისი ჩვენს ყოველდღიურობაში „ინფლუენსერ მარკეტინგის“ სახელით გამოჩნდა. ეტაპობრივად, ის მიმართულებებად გაიშალა: მაკრო ინფლუენსერები ცნობილი ადამიანები და მეგა-ინფლუენსერები არიან და 100,000-დან 1-მილიონამდე გამომწერი ჰყავთ, საკმაოდ დიდი აქტივობით. მათი აუდიტორია საკმაოდ მრავალფეროვანია. მიკრო ინფლუენსერებს გამომწერთა უფრო ნაკლები რაოდენობა ადევნებს თვალს, დახლოებით 1000-100,000 ფარგლებში. ისინი ნიშურ თემატიკაზე საუბრობენ და საკმაოდ დიდი ნდობით სარგებლობენ. ნანო ინფლუენსერებს 1000-მდე გამომწერი ჰყავთ, თუმცა მათი გავლენა ამ მცირე წრეშიც კი საკმაოდ მნიშვნელოვანია. საერთაშორისო ბრენდები ინფლუენსერ მარკეტინგს აქტიურად იყენებენ კომუნიკაციაში. ეს ბიუჯეტსაც ეტყობა, მაგალითად, 2022 წელს, აშშ-ში ინფლუენსერ მარკეტინგზე $16.4 მლრდ დაიხარჯა და ყოველი 4 მარკეტერიდან 1 მაინც იყენებს ამ სერვისს. ინფლუენსერ მარკეტინგი განსაკუთრებით საინტერესო ზეტ თაობასთან და მილენიალებთან კომუნიკაციის პროცესშია. მარკეტერთა დიდი ნაწილი კი, 2023 წლისთვის, კამპანიებში ინფლუენსერების უფრო აქტიურ ჩართვას გეგმავს. რაც შეეხება ქართულ ბაზარს, ინფლუენსერ მარკეტინგის ტენდენციას Echolize-ის თანადამფუძნებელი გიორგი თუშურაშვილი აფასებს.
M: როგორია ტენდენცია – რა მიმართულებით უფრო დაინტერესდებიან კომპანიები ინფლუენსერებთან თანამშრომლობით, წელს?
ინფლუენსერ მარკეტინგი უკვე ბევრი ბრენდის მარკეტინგის გეგმის ნაწილია და სიახლეს აღარ წარმოადგენს. ნდობა ინფლუენსერების მიმართ გაზრდილია და ბრენდებიც მზად არიან მეტი თავისუფლება მისცენ კრეატორებს. აქედან გამომდინარე, კონტენტი უფრო საინტერესო გახდება და მეტად იქნება მორგებული კრეატორის ნიშაზე. შედეგი კი ორივე მხარისთვის უკეთესი იქნება.
M: რა სერვისები არის დეფიციტური, რისი საჭიროებაც ბაზარზე არის, თუმცა სჭირდება უზრუნველყოფა ინფლუენსერების მხრიდან?
Content is King! ბრენდი უნდა იყოს წარმოდგენილი ყველა სოციალურ მედიასა და სხვადასხვა ციფრულ არხში. შესაბამისად, კონტენტის უდიდესი რაოდენობაა საჭირო. ინფლუენსერების შექმნილი კონტენტი პასუხობს ამ გამოწვევას და აძლევს ბრენდს საშუალებას, რომ ჰქონდეს მრავალფეროვანი და რაც მთავარია, სპეციფიკურ აუდიტორიაზე მორგებული კონტენტი.
M: თავად აუდიტორიის მოლოდინი როგორია? როგორი ინფლუენსერების როგორ კონტენტზე უფრო მეტად რეაგირებენ დადებითად?
აუდიტორიას მოსწონს ბუნებრივი კონტენტი, რომელიც არ არის ამოვარდნილი კრეატორის ყოველდღიურობიდან. ბოლო წლებში, საქართველოში ძალიან ბევრი კამპანია შეიქმნა ინფლუენსერ მარკეტინგის მიმართულებით და აუდიტორიამ უკვე კარგად იცის, რა არის რეკლამა და რა – არა. როცა ინფლუენსერი ისეთ კამპანიაში იღებს მონაწილეობას, რომელსაც არანაირი კავშირი აქვს მასთან, ეს რა თქმა უნდა, ცუდად მოქმედებს აუდიტორიაზე და გრძელვადიან პერსპექტივაში, კრეატორის ნდობაზე.
M: რას ურჩევდით ინფლუენსერებს 2023 წლისთვის?
აუცილებლად იყავით ბუნებრივი! თუნდაც, ორი წლის წინ, ჩვენი ამოცანა იყო ბრენდებისთვის აგვეხსნა, რა არის ინფლუენსერ მარკეტინგი. დღეს, ეს აღარ საჭირო, ყველამ იცის და მეტნაკლებად, ყველა იყენებს. შესაბამისად, უკვე კრეატორებსაც შეუძლიათ აირჩიონ, ვისთან თანაშრომლობენ და ვისთან – არა. როცა კრეატორი გრძნობს, რომ კონკრეტული კამპანია არ ჯდება მის ბრენდში და არ არის საინტერესო აუდიტორიასთის, სჯობს უარი თქვას.
ავტორი: თამარ მეფარიშვილი
