Instagram ავითარებს ახალ ფუნქციას, რომელიც მომხმარებლებს საშუალებას მისცემს, საკუთარი თავი ამოიღონ სხვისი Close Friends (ახლო მეგობრების) სიიდან. ამის შესახებ Meta-მ თავად განაცხადა. კომპანიის თქმით, ფუნქცია ჯერ კიდევ ადრეულ ეტაპზეა და საჯაროდ ტესტირება ამ ეტაპზე არ მიმდინარეობს.
Instagram-ის Close Friends ფუნქცია მომხმარებლებს საშუალებას აძლევს, სთორები, რილსები და პოსტები გაუზიარონ ადამიანების შერჩეულ ჯგუფს და არა მთელ გამომწერთა სიას. ფუნქციის 2018 წელს გაშვების შემდეგ, მომხმარებლებს არ ჰქონდათ შესაძლებლობა, საკუთარი თავი ამოეღოთ სხვისი Close Friends სიიდან.
განახლების მიხედვით კი, Meta გააფრთხილებს მომხმარებლებს, რომ თუ ისინი დატოვებენ Close Friends სიას, ვეღარ ნახავენ ამ ადამიანის კონტენტს, თუ ის პირი ხელახლა არ დაამატებს მათ საკუთარ სიაში.
მიუხედავად იმისა, რომ ზოგიერთ ადამიანს შესაძლოა ეწყინოს, თუ სხვები დატოვებენ მათ Close Friends სიას, ეს ფუნქცია, დიდი ალბათობით, სასურველი იქნება მათთვის, ვისთვისაც არაკომფორტულია გარკვეული ადამიანების ახლო მეგობრების სიაში ყოფნა.
აღსანიშნავია, რომ Snapchat-ს, რომელიც Instagram-ის ერთ-ერთი მთავარი კონკურენტია, უკვე აქვს მსგავსი ფუნქცია – მომხმარებლებს შეუძლიათ საკუთარი თავი ამოიღონ სხვისი Private Story-დან.
Close Friends-ის განახლებების გარდა, Instagram სხვა ახალ ფუნქციებზეც მუშაობს. ის გეგმავს ახალი გამოწერების ტესტირებას, რომლებიც მომხმარებლებს მისცემს წვდომას ექსკლუზიურ ფუნქციებზე Instagram-ზე, Facebook-სა და WhatsApp-ზე.
მიუხედავად იმისა, რომ Meta-ს ჯერ არ გაუზიარებია დეტალები, თუ კონკრეტულად რომელი ფუნქციები შევა ამ განახლებაში, Instagram-ის პრემიუმგამოწერა მომხმარებლებს საშუალებას მისცემს შექმნან შეუზღუდავი აუდიტორიის სიები, ნახონ რომელი გამომწერები არ მიჰყვებიან მათ და უყურონ სთორებს ისე, რომ ავტორმა ვერ გაიგოს ამის შესახებ.
როგორც ჩანს, კომპანია ერთ კონკრეტულ სტრატეგიაზე არ არის შეჩერებული. ის გეგმავს სხვადასხვა ფუნქციური პაკეტების ტესტირებას, სადაც თითოეულ აპლიკაციას ექნება განსხვავებული ექსკლუზიური შეთავაზებები.
[პარტნიორის კონტენტი]
