“იყიდება ბედნიერება” ანუ, რატომ ვყიდულობთ პროდუქტს?

ახალი წლის დადგომასთან ერთად ყველას გვახსენდება კოკა-კოლა. ჩემი მეგობარიც კი, რომელსაც კოლა არ უყვარს, ყოველ ახალ წელს აუცილებლად ყიდულობს ამ საახალწლო სასმელს.

დაფიქრებულხართ, რა გიზიდავთ რეკლამაში და რატომ მიიწევთ იმ თაროსკენ, სადაც კოკა-კოლა დევს?

გადაწყვეტილების მიღება რაიმეს ყიდვის შესახებ არაცნობიერ დონეზე და იმპულსურად ხდება. მამაკაცები ყიდულობენ მანქანას/ბრენდს, რომელიც ასოცირდება მათთვის თავისუფლებასთან, კომფორტთან და შესაძლებლობებთან. ქალები ყიდულობენ სამოსს, რომლის ბრენდიც ხაზს უსვამს ფუფუნებას, ასოცირდება აღიარებასთან, რაიმე სიმბოლური ხასიათი აქვს ან კონკრეტულ ემოციას აღვიძებს სხვაში.

სინამდვილეში, როცა ჩვენ ვყიდულობთ ქოლგეითს, ვყიდულობთ სუფთა და თეთრ კბილებს, როცა ვყიდულობთ წვენს, ვყიდულობთ ოჯახურ მყუდროებას და ბედნიერებას, როცა ვყიდულობთ „ჯილეთს“, ვყიდულობთ თავდაჯერებულობას, „ნაიკი“ – გამარჯვების შეგრძნება და ა.შ. სინამდვილეში ბრენდის შეძენისას ჩვენ ვყიდულობთ იმ ემოციებს, რასაც ეკრანიდან გვაწვდიან და რაც საყოველთაო და ზოგად ფასეულობებს ემყარება.

განვიხილოთ მაგალითები:

სქემა 1: ბედნიერება

შეიტანე ნათელი ფერები და ბედნიერება შენს ცხოვრებაში კოკა-კოლასთან ერთად. უყურებ რეკლამას და სახეზე ჩნდება ღიმილი. მოსაწყენი ნაცრისფერიდან, მკვეთრ წითელ და მწვანე ფერებში გადადიხარ. ჩნდება ემოცია და აქვე ჩნდება კოკა-კოლა. შემდეგ გადის დრო, შედიხარ მაღაზიაში, იღებ თაროდან კოლას და ელი იგივე ემოციას.

http://www.youtube.com/watch?v=6Ih0Drtuufc

სქემა 2: ოჯახი, როგორც ფასეულობა

ამ სქემაზე არაერთი საკვები პროდუქტის, ზეთის, მარგარინის, ან თუნდაც სარეცხი ფხვნილის რეკლამაა აგებული, სადაც კადრში ყოველთვის ჩანს ბედნიერი ოჯახი. ამ შემთხვევაში მაგალითად მოვიყვან Saatchi & Saatchi Russia-ს ერთ-ერთ ნამუშევარს. ეს ის ფასეულობაა, რომელიც ადამიანთა 99%-სთვის მნიშვნელოვანია. ამიტომ, ამ რგოლის ნახვის შედეგად თბილი, დადებითი ემოცია ჩნდება, რასაც, ბუნებრივია, უკავშირებ წვენს Моя семья.

სქემა 3: თავდაჯერება

თავდაჯერებული ადამიანის ცხოვრება იღბალითა და წარმატებითაა სავსე. უყურებ რეკლამას და თითქოს იძაბები. ამაში ხელს გიწყობს მუსიკაც, ფერებიც. მერე კი, როცა გამოსავალი უკვე მოიძებნა, ისმის მთავარი სლოგანი და შენც გიჩნდება ემოცია, რომ თავდაჯერებული ადამიანი ყველაფერს შეძლებს. ამ მოტივზე იგება ძირითადად ქალის და მამაკაცის პარფიუმერიის სარეკლამო ხაზები, ჰიგიენური საშუალებების რგოლები და ა.შ. ყიდულობ ამ პროდუქციას და ყიდულობ თავდაჯერებას.

სქემა 4:  სექსუალური ფანტაზიები

საკმაოდ ძლიერი სექსუალური ხასიათის ნიუანსებზეა აგებული Pepsi, Nestle, Dove  რეკლამები, გამაგრილებელი სასმელების, შოკოლადების რგოლები. მამაკაცებში ეს პირდაპირ სურვილს აღვიძებს, ქალებს კი უბიძგებს იყიდონ პროდუქცია და იგივე ემოცია მიიღონ, რაღაცით მაინც დაემსგავსონ რეკლამის სექსუალურ პერსონაჟს. და ეს ყველაფერი, რა თქმა უნდა, სრულიად გაუცნობიერებლად ხდება.

ასეთი სქემა საკმაოდ ბევრია, მაგრამ ეს არ არის მთავარი. შეგიძლიათ გამოიანგარიშოთ ყოველდღიურად, დღეში რა რაოდენობით და დოზით მოგეწოდებათ ამგვარი ემოციები და ფასეულობები?

სინამდვილეში, ემოციის გაყიდვა უფრო ადვილია, ვიდრე თავად პროდუქტის. რეკლამის შემქმენელები კი საკმაოდ ძლიერ NLP ტექნიკებს იყენებენ იმისათვის, რომ კონკრეტულ პროდუქტზე ემოციური მიბმა მოახდინონ და ადამიანში პირობითი რეფლექსი შექმნან. იმ პირობით რეფლექსზე მაქვს საუბარი, დაუფიქრებლად რომ მიიწევ თაროზე განთავსებული პოდუქციისკენ.

თუ რა კონკრეტული ტექნიკებით კეთდება ეს ყველაფერი, ამაზე შემდეგ სტატიაში ვისაუბრებ. თქვენ კი გაიხსენეთ და კომენტარებში დაგვიწერეთ სარეკლამო რგოლები და ის სქემები, რომელიც გახსენებთ კონკრეტულ ემოციას და ფასეულობებს. ან უბრალოდ, რომელიც „თავში გაგეჭედათ“ 🙂

ავტორი: ირინა ჭოჭუა