Jeep-მა ახალი კამპანია “This Is Jeep Country” გამოუშვა. ის ამერიკაში ბრენდის 250 წლისთავთან არის დაკავშირებული და დაახლოებით ერთწლიანი საკომუნიკაციო გეგმის გაგრძელებაა.
კამპანიის საწყისი იდეა ერთი მარტივი მოსაზრებიდან გაჩნდა: „ამერიკა Jeep-ის პირველი მომხმარებელი იყო“. კრეატიული გუნდისთვის ეს უბრალოდ სარეკლამო ფრაზა არ ყოფილა – იდეა ბრენდის ისტორიაში დიდ როლს ასრულებს.
მთავარი ვიდეო Jeep-ის 85-წლიან ისტორიას ამერიკის ისტორიასთან აკავშირებს. ის იწყება შავ-თეთრი კადრებით, რომლებშიც ომში გაგზავნილი Jeep-ებია ნაჩვენები. შემდეგ ახალ და საარქივო მასალას მომხმარებლების მიერ შექმნილი კონტენტიც ემატება. კამპანია სხვადასხვა სცენით ავითარებს Jeep-ის სამყაროს – რევოლუციური ომის რეკონსტრუქციითა და მოკრივის ვარჯიშით დაწყებული, ბუნებაში გადაღებული აქტიური ცხოვრების ამსახველი კადრებით დამთავრებული.
კამპანიის მთავარი იდეა ისაა, რომ ამერიკისთვის დიდი ხნის განმავლობაში ავტომობილების შექმნამ Jeep-ს ქვეყნის ღირებულებებთან გარკვეული საერთო კოდი ჩამოუყალიბა.
გარემო, რომელშიც კამპანია შეიქმნა
ამერიკასთან კავშირი Jeep-ის ბრენდისთვის ახალი არ არის. Brand Keys-ის კვლევებში ის არაერთხელ დასახელებულა ამერიკის ყველაზე პატრიოტულ ბრენდად. ბრენდისთვის ამერიკულ კულტურასთან, თავისუფლებასა და თავგადასავალთან კავშირი მისი იდენტობის მნიშვნელოვანი ნაწილია. შესაბამისად, კამპანია თავისუფლების, გამძლეობისა და იმ სულისკვეთების აღნიშვნას ცდილობს, რომელიც, ბრენდის ხედვით, როგორც Jeep-ს, ისე ამერიკას უკავშირდება.
მეორე მხრივ, კამპანია Jeep-ისთვის ხელმძღვანელობის ცვლილებების პერიოდსაც ემთხვევა. მისი მშობელი კომპანია Stellantis მაისში გამოცხადებულ ხუთწლიან სტრატეგიულ გეგმაზე მუშაობს, რომლის ფარგლებშიც დაახლოებით $70 მილიარდის ინვესტიციაა დაგეგმილი.
Jeep-ის ახალი ხელმძღვანელობის შეფასებით, “This Is Jeep Country“ ბრენდის კომუნიკაციაში ახალ ტონსაც წარმოადგენს. ახალი კამპანია უფრო თამამი და პირდაპირია და განსაკუთრებით ამახვილებს ყურადღებას პატრიოტულ თემაზე.
ახალი კამპანია Jeep-ის მთელ სამოდელო ხაზს მოიცავს: Wrangler-ს, Gladiator-ს, Grand Cherokee-ს, Cherokee-ს, Compass-ს, Grand Wagoneer-სა და ახალ სრულად ელექტრო Jeep Recon-ს.
“This Is Jeep Country“ გავრცელდება როგორც მედიასივრცეში, ასევე ციფრულ პლატფორმებზე, connected TV-სა და სტრიმინგსერვისებზე, მათ შორის Disney+, Paramount+, Max-სა და Peacock-ზე.
კამპანიის გაშვება Jeep-ისთვის ბიზნესის ზრდის პერიოდსაც ემთხვევა. Stellantis-მა 2026 წლის მეორე კვარტალში ჩრდილოეთ ამერიკაში გაყიდვების წლიური ზრდის ზედიზედ მეოთხე კვარტალი დააფიქსირა, აშშ-ში კი გაყიდვები 6%-ით გაიზარდა.
“Jeep Country“ მხოლოდ კონკრეტულ ადგილს არ ეხება
მიუხედავად იმისა, რომ კამპანიის პირველი ვერსია მთლიანად ამერიკულ კონტექსტზეა აგებული, Jeep-ისთვის “Jeep Country“ კონკრეტულ გეოგრაფიულ ადგილს მაინც არ ნიშნავს.
ბრენდის ხედვით, ის ყველგანაა, სადაც მისი მომხმარებლები ცხოვრობენ. შესაბამისად, “Jeep Country“ უფრო დამოკიდებულება, აზროვნების სტილი და ცხოვრების წესია, ვიდრე კონკრეტული ტერიტორია. სწორედ ამიტომ, კამპანიის იდეის სხვა ბაზრებზე მორგებაც შესაძლებელია.
