ბურბონის ვისკიზე საუბრისას პირველი ყველას Jim Beam გვახსენდება. ეს არის ამერიკული ბრენდი კენტუკიდან, რომელსაც კომპანია Beam Suntory აწარმოებს. Beam-ის ოჯახის შვიდი თაობა იყო ჩართული ბრენდის განვითარებაში, რომელიც წვეულებებისა და სალონური შეკრებების ხშირი წარმომადგენელია.
ამ სტატიაში მისი წარმატების ისტორიას გიამბობთ.
ადრეული წლები
ჯიმ ბიმის ისტორია იწყება ჯეიკობ ბიმით, რომელიც დაიბადა გერმანიაში 1770 წელს და მოგვიანებით ემიგრაციაში წავიდა შეერთებულ შტატებში. 1795 წელს ჯეიკობ ბიმმა შექმნა დისტილერია კენტუკიში და შეიმუშავა ბურბონის უნიკალური სტილი, რომლისთვისაც ადგილობრივად მოყვანილ სიმინდს, ჭვავსა და ქერს იყენებდა. ასე დაიწყო ბიმის ოჯახის ხანგრძლივი და ცნობილი ამბავი ბურბონის წარმოებაში.
სადავეების დაპყრობა
მე-19 საუკუნის დასაწყისში სახელი „ჯიმ ბიმი” ხარისხიანი ბურბონის სინონიმად იქცა. ამაში გადამწყვეტი როლი ითამაშა ჯეიკობ ბიმის შვილიშვილმა, ჯეიმს ბ. ბიმმა, იგივე ჯიმ ბიმმა. იგი საოჯახო ბიზნესს მაშინ ჩაუდგა სათავეში, როცა ალკოჰოლური სასმლის აკრძალვების ეპოქა დაიწყო და მოახერხა, ყოფილიყო ერთ-ერთი პირველი, ვინც აკრძალვის გაუქმების შემდგომ მაშინვე აიღო ფედერალური ლიცენზია. ამან ჯიმ ბიმ ბურბონი გახადა ერთ-ერთი პირველი ლეგალური ბურბონი, რომელიც გაიყიდა შეერთებულ შტატებში და გააძლიერა მისი, როგორც ნამდვილი ამერიკული კლასიკის სახელი.
ფლაგმანი პროდუქტი
ერთ-ერთი მთავარი ფაქტორი, რამაც ხელი შეუწყო ჯიმ ბიმის წარმატებას, იყო მათი ფლაგმანი პროდუქტის, Jim Beam White Label Bourbon-ის დანერგვა. 1950-იანი წლების ბოლოს გამოშვებულმა ამ გლუვმა და რბილმა ბურბონმა სწრაფად მოიპოვა პოპულარობა და გახდა ბრენდის სახე. White Label Bourbon იქცა სტანდარტად, რომლითაც მრავალი სხვა ბურბონი იზომება.
გაფართოება და ინოვაცია
ჯიმ ბიმის ისტორია გამოირჩევა ინოვაციებისადმი ერთგულებით. 1964 წელს მათ შემოიღეს ბურბონი მცირე პარტიით, სახელად Knob Creek. ეს სახელწოდება დაარქვეს მდინარის მიხედვით, რომლის წყალსაც დისტილერიაში იყენებდნენ. ეს სასმელი იყო ერთგვარი გადახვევა ტრადიციული ჯიმ ბიმიდან, თუმცა, ამავდროულად, მდიდრულ და ძლიერ გემოს ქმნიდა.
ინოვაციების დანერგვა ბრენდმა მომდევნო წლებშიც განაგრძო. ესენი იყო: Booker’s, Basil Hayden’s და Baker’s. თითოეულ მათგანს უნიკალური გემო და პროფილი აქვს. პროდუქციის ხაზის ასეთმა მრავალფეროვნებამ ჯიმ ბიმს საშუალება მისცა, მომსახურებოდა ბურბონის მოყვარულთა ფართო სპექტრს.
1987 წელს ჯიმ ბიმმა შეიძინა National Distillers, ანუ ბრენდები, რომლებიც მოიცავდა: Old Crow-ს, Bourbon de Luxe-ს, Old Taylor-ს, Old Grand-Dad-სა და Sunny Brook-ს.
ბურბონის პირველ ოჯახად წოდებული Beam-ის ოჯახი 200 წელზე მეტი ხნის განმავლობაში ამზადებდა ბურბონს კენტუკიში შვიდი თაობის განმავლობაში. დღესდღეობით შეგიძლიათ, 20-ზე მეტი Beam პროდუქტი აღმოაჩინოთ მაღაზიაში ალკოჰოლური სასმელების თაროზე.
2014 წელს Beam Inc. შეიძინა Suntory Holdings Ltd-მა, იაპონური დისტილერების ჯგუფმა. მიუხედავად იმისა, რომ მათი ბევრი გულშემატკივარი წუხდა ბრენდის შესახებ, Beam-ის ვისკიმ შეინარჩუნა კენტუკის ფესვები და გემო. შესაბამისად, როდესაც სვამთ ჭიქა Jim Beam-ს, თქვენ არ სვამთ მხოლოდ ერთ-ერთ ყველაზე ცნობილ ბურბონს, არამედ აგემოვნებთ ამერიკის ერთ-ერთ უძველეს ბრენდს. მე-18 საუკუნის ბოლოს მოკრძალებული დასაწყისიდან ბრენდი გადაიქცა გლობალურ კულტად, რომელიც ცნობილია თავისი მდიდარი მემკვიდრეობითა და განსაკუთრებული ვისკით.
ბიზნესისტორიებს წარმოგიდგენთ „ალიანს ჯგუფი”.
ავტორი: მარიამ გოჩიაშვილი
