სოფლის მეურნეობის ინდუსტრიაში რამდენიმე გლობალურად ცნობილი სახელი არსებობს და ერთ-ერთი მათგანია John Deere. ის იქცა ლიდერად სასოფლო-სამეურნეო ტექნიკის, სამშენებლო აღჭურვილობისა და სატყეო პროდუქტების წარმოებაში…
მაგრამ როგორ დაიწყო ეს ლეგენდარული ისტორია და რამ განაპირობა მისი წარმატება თითქმის ორი საუკუნის განმავლობაში? მას ისეთი თავმდაბალი დასაწყისი ჰქონდა, ალბათ ვერც იფიქრებდნენ, რომ ერთ დღეს ინდუსტრიის გიგანტის როლს მოირგებდნენ.
ადრეული წლები
ჯონ დირი, ამ სახელის უკან იდგა მჭედელი ვერმონტიდან, რომელიც 1830-იან წლებში გადავიდა ილინოისში. მან შენიშნა, რომ ადგილობრივი ფერმერები ბევრი გამოწვევის წინაშე იდგნენ, მათ შორის იყო მიწის დამუშავება.
1837 წელს დირმა შეიმუშავა პირველი კომერციულად წარმატებული ფოლადის გუთანი, რამაც რევოლუცია მოახდინა ფერმერულ მეურნეობაში, გააადვილა მიწის დამუშავება და ამ ინოვაციის წარმატებამ საფუძველი ჩაუყარა კომპანიას John Deere.
გაფართოება და ზრდა
1800-იანი წლების შუა პერიოდისთვის დირის წარმოება დიდი წარმატებით საქმიანობდა და 1868 წელს იგი ოფიციალურად დაარსდა როგორც Deere & Company. კომპანიამ გააფართოვა თავისი პროდუქციის ხაზი გუთნების, კულტივატორების, პლანტატორების და სხვა სასოფლო-სამეურნეო აღჭურვილობის მიმართულებით. ჯონ დირის ერთგულება ხარისხისა და ინოვაციებისადმი დაეხმარა ბიზნესს სწრაფად განვითარებაში.
ტრაქტორების ერა
მე-20 საუკუნის დასაწყისში სოფლის მეურნეობაში დრამატული ცვლილება მოხდა ტრაქტორების დანერგვით. Deere & Company არც ამ ინოვაციას ჩამორჩა და შევიდა ტრაქტორების ბაზარზე 1918 წელს, შეიძინა Waterloo Benzin Engine Company, რომელიც აწარმოებდა რამდენიმე პირველ ბენზინზე მომუშავე ტრაქტორებს. ამ შეძენამ გამოიწვია ლეგენდარული John Deere Model D-ის წარმოება, რომელიც გახდა ბესტსელერი და საფუძველი ჩაუყარა ინდუსტრიის მომავალს.
დიდი დეპრესია და მსოფლიო ომები
დიდი დეპრესიის დროს, ეკონომიკური სიდუხჭირის მიუხედავად, ჯონ დირი თავისი საქმის ერთგულად დარჩა და ფერმერებს მაქსიმალურად ეხმარებოდა. ის მათ საშუალებას აძლევდა, კრედიტით შეეძინათ აღჭურვილობა.
მეორე მსოფლიო ომის დროს კომპანიამ თავისი წვლილი შეიტანა ომის პროცესში სამხედრო ტექნიკის წარმოებით, მაგრამ მისი ძირითადი აქცენტი დარჩა სასოფლო-სამეურნეო ტექნიკაზე.
ომისშემდგომი პერიოდი
ეს იყო ტექნოლოგიური წინსვლისა და გლობალური გაფართოების პერიოდი. John Deere-მ წარმოადგინა ტრაქტორის ახალი მოდელები, მათ შორის John Deere 4020, რომელიც გახდა ერთ-ერთი ყველაზე პოპულარული ტრაქტორი ისტორიაში. კომპანია ასევე გაფართოვდა საერთაშორისო მასშტაბით, დაამყარა კავშირები ევროპაში, სამხრეთ ამერიკასა და აზიაში. ამ დროის განმავლობაში ჯონ დირმა ასევე დაიწყო სამშენებლო და სატყეო აღჭურვილობის წარმოება, რამაც გააფართოვა ბაზრის არეალი.
ტექნოლოგიების კვალდაკვალ
როდესაც მსოფლიო ციფრული ეპოქისკენ მიიწევდა, ჯონ დირმა თავისი ტექნიკის ინტეგრირება მოახდინა მოწინავე ტექნოლოგიაში. კომპანიამ წარმოადგინა GPS-ით მართული ტრაქტორები, გადაწყვეტები ავტონომიურ მეურნეობაში, ზუსტი სასოფლო-სამეურნეო ინსტრუმენტები, რაც ფერმერებს ეხმარებოდა მოსავლიანობის ოპტიმიზაციაში და გარემოზე ზემოქმედების შემცირებაში.
მდგრადობა გახდა ბრენდის მთავარი აქცენტი, როდესაც Deere-მა აიღო ვალდებულება უფრო ენერგოეფექტური და ეკოლოგიურად სუფთა აღჭურვილობის წარმოებაზე.
ბრენდი დღეს
დღეს John Deere არის მსოფლიოში ერთ-ერთი უდიდესი და ყველაზე პატივსაცემი სახელი სასოფლო-სამეურნეო, სამშენებლო და სატყეო აღჭურვილობის წარმოებაში. ის 160-ზე მეტ ქვეყანაშია წარმოდგენილი და აგრძელებს წინსვლას, ინოვაციებს, მდგრადობასა და ფერმერების მხარდაჭერას.
ილინოისის უბრალო სამჭედლო მაღაზიით დაწყებული ბიზნესი სიახლეებისადმი მისწრაფებამ წარმატებულ მსოფლიო ბრენდად აქცია. ეს ისტორია ადასტურებს, რომ წინდახედული გადაწყვეტილებების მიღება ბიზნესში სასიცოცხლოდ მნიშვნელოვანია.
ბიზნესისტორიებს წარმოგიდგენთ „ალიანს ჯგუფი”.
