ჯეიმს ვების კოსმოსური ტელესკოპის მიერ გამოქვეყნებულ ახალ ფოტოში სიცოცხლის დასასრულს მიახლოებული ვარსკვლავს ვხედავთ.
მშვილდოსნის თანავარსკვლავედში, ჩვენგან დაახლოებით 15 000 სინათლის წლის დაშორებით მდებარე ვარსკვლავი WR 124 ცნობილია, როგორც ვოლფ-რაიე. ეს უკანასკნელი იშვიათად გვხვდება ირმის ნახტომის გალაქტიკაში, რადგან მხოლოდ გარკვეული ტიპის ვარსკვლავები გარდაიქმნება ამ ტიპად. თანაც, მათი არსებობის პერიოდი საკმაოდ ხანმოკლეა — შესაბამისად, აღნიშნული გამოსახულების მოპოვება ასტრონომებისთვის ძალიან მნიშვნელოვანია, რათა იშვიათი მოვლენა შეისწავლონ.
ვოლფ-რაიეს ვარსკვლავები ევოლუციური, მასიური, ძალიან ცხელი და კაშკაშაა — უბრალოდ, თითოეული მათგანი მასას ძალიან სწრაფად კარგავს. მასის სწრაფი დაკარგვა კი ვარსკვლავური ქარის 2000 კმ/წმ-მდე აჩქარებას და სიკაშკაშის დონის მატებას იწვევს. ამიტომაცაა მისი გამოსახულება ასეთი თვალწარმტაცი.
WR 124-მა უკვე დაკარგა საკმაოდ დიდი მასა; ის გარშემორტყმულია საკუთარი ამონაფრქვევის ღრუბლით, ქსელებითა და კვანძებით. წინა დაკვირვებით, რომელიც ჰაბლის ტელესკოპის მეშვეობით განახორციელეს, ვიცოდით, რომ ვარსკვლავი ნამდვილად უჩვეულო ღრუბლით იყო გარშემორტყმული — ვების ტელესკოპმა კი უფრო დეტალური აღქმის საშუალება მოგვცა, ნამდვილი ფერებითა და შემადგენელი ნაწილებით.
მაღალი რეზოლუციის ფოტოს ჩამოტვირთვა NASA-ს ვებგვერდიდან შეგიძლიათ.
