სივრცის დიზაინერი, სიმშვიდის კომპოზიტორი და სიმყუდროვის მოქანდაკე JWT Metro-ს ახალ რეკლამაში

შემოქმედებით სფეროში ნებისმიერი ავტორი „თეთრი ფურცლიდან“ იწყებს. ზოგისთვის ეს სახატავი ტილოა, ზოგისთვის კი — თეთრად შეღებილი ოთახის კედლები. JWT Metro-ს ახალ ვიდეორგოლში კი, რომელიც „თეთრი კვადრატისთვის“ შეიქმნა, მთავარ გმირად სივრცის დიზაინერი, სიმშვიდის კომპოზიტორი და სიმყუდროვის მოქანდაკე გვევლინება, რომელიც ვიდრე ჩანაფიქრს არ განახორციელებს, ვერ მოისვენებს.

რეკლამაში იდეალური სიზუსტითაა გადმოცემული ის შემოქმედებითობა, რომლის მატარებელიც თავად სახლის პატრონია. ისინი ხომ საკუთარი იდენტობის სივრცეში გადმოტანაზე ზრუნავენ, რათა სახლი პირად შედევრად იქცეს. სიუჟეტის ვიზუალური განვითარებაც ამ იდეას ეფუძნება, რადგან თვიდან „ავტორი“ თეთრს კედლებშია მოქცეული, საბოლოოდ კი დიზაინის მრავალ ვარიაციას ვხედავთ — თითოეული მათგანი განსხვავებული ხასიათის თუ ემოციის მატარებელია.

„კამპანია იმაზეა თუ როგორ უდგებიან ადამიანები საკუთარი სახლის შემქმას. რამდენს ფიქრობენ, არჩევენ, იგონებენ, რათა შექმნან ის უმთავრესი შედევრი რომელშიც თავად იცხოვრებენ. მერე როგორ აჩვენებენ სხვებს და ამაყობენ საკუთარი ქმნილებით. სახლი ჩვენი ავტოპორტრეტია, რომლის შექმნასაც ვიწყებთ თეთრი კედლიდან“, — ამბობს ეკა ყიფიანი, JWT Metro-ს კრეატიული დირექტორი.