28
Oct
2019

კაი – კოკა ქამუშაძე

28 Oct 2019

ეს ის არ არის რაც თქვენ გგონიათ! მეც და სარედაქციო კოლეგიამაც, მშვენივრად ვიცით, რომ „კაი“ – კარგის არასწორი ფორმაა და ასეთ სივრცესა და ადგილას მისი გამოყენება არაფრის დიდებით არ შეიძლება და რომ ასეთი სიტყვების გამოყენებით უდიდეს ზიანს ვაყენებთ თავანკარა ქართულ ენას. თუმცა, ალბათ, ამ ახსნა – განმარტებას სათაურის წამკითხველთა ნახევარი არც წაიკითხავს, რადგან, როგორ შეიძლება, რამე ღირებული ეწეროს იქ, სადაც სათაურში უკვე, ასეთი უზუსტობაა დაშვებული.

ამ დროს კი, ჩემი “კაი”, აბსოლუტურად სხვა რამეა და იმ ყველასათვის ცნობილ „კაისთან“ მისი დამთხვევა სრულიად შემთხვევითია. მას არც ჰანს-კრისტიან ანდერსენის ცნობილ პერსონაჟთან აქვს რაიმე კავშირი.
“კაი” – ანუ კომუნიკაციის ადეკვატურობის ინდექსი, ის საზომი ერთეულია, რომლითაც შეგვიძლია ესა თუ ის მარკეტინგული კომუნიკაცია შევაფასოთ. ამ ინდექსის მიხედვით 0 – ყველაზე არაადეკვატურ კომუნიკაციას აღნიშნავს, 10 კი პირიქით – ყველაზე ადეკვატურს. კომუნიკაციის ადეკვატურობის შეფასებაზე ბევრი ფაქტორი მოქმედებს:

ბრენდის სტრატეგიულ პლატფორმასთან თანხვედრა, ანუ რამდენად თანხვედრაშია ესა თუ ის კომუნიკაცია იმ სათქმელთან, რაც ზოგადად ამ ბრენდს აქვს, რამდენად იმეორებს ის ამ ბრენდის სალაპარაკო ენას, ვიზუალურ სტილისტიკას და ა.შ.

კალენდარი, წლის რომელი სეზონია, რამე მნიშვნელოვანი თარიღი ხომ არ არის (ახალი წელი, ვალენტინობა, სასწავლო წლის დაწყება, შავი პარასკევი და ა.შ.).

მაგალითად, საოჯახო ტექნიკით მოვაჭრე ერთ-ერთი ქართული ბრენდი მოგვიწოდებს: ჩავერთო back to school (excuse my french) აქციაში და ფასდაკლებით შევიძინოთ ჩასაშენებელი ღუმელი ან გაზქურის ზედაპირი.
ალბათ მარკეტერს ასეთი ინსაითი ჰქონდა:

  •  ბავშვებს რა უყვართ? ტკბილეული.
  • ტკბილეული რა არის? ნამცხვარი.
  • ნამცხვარს რა სჭირდება? გაზქურა.

მოკლედ, თუ ამ აქციაში ჩაერთვებით, შეძლებთ თქვენს საამაყო შთამომავალს ახალ ღუმელში გამომცხვარი მაჭკატები გაატანოთ სკოლაში და როცა მადისაღმძვრელ სუნზე, დორბლმორეული თანამერხელი კითხვანარევი მზერით გახედავს… თქვენი შვილი თვალს ჩაუკრავს, მაჭკატს ჩაკბეჩს და იტყვის: ელექტროლუქს – შვედეთი – შესრულებული გონებით (არის ასეთი შვედური ბრენდი, დაახლოებით ასეთივე სლოგანით).

თქვენი არ ვიცი და ჩემი აზრით ამ კამპანიის “კაი” დაახლოებით 2-ის მიდამოებთან დაფარფატებს.

სოციო-პოლიტიკური სიტუაცია, ანუ რამდენად რელევანტურია ჩვენი კომუნიკაცია საზოგადოებაში არსებულ სოციალურ, პოლიტიკურ და ეკონომიკურ სიტუაციასთან. მაგალითად ერთ-ერთი ქართული ბრენდის მიერ, პარიზში განხორციელებული ტერაქტის მეორე დღეს, ალ-ქაიდას მუქრის სტილში გადაღებული სარეკლამო რგოლი იმდენად არაადეკვატური იყო, რომ BBC-ზეც კი მოხვდა.

საბედნიეროდ, ქართულ ბაზარზე, ამის საპირისპირო მაგალითებიც მრავლად გვხვდება, თუნდაც ჯოვანი მორას ანტი-საოკუპაციო კოლექცია.

აქ ჩამოთვლილი ფაქტორების გარდა, სხვადასხვა სიტუაციაში შესაძლოა სხვა ნიუსებმაც იქონიონ გავლენა ჩვენი კომუნიკაციის ადეკვატურობაზე. მოკლედ, ბევრი რომ არ გავაგრძელო, სანამ რამეს ვიტყვით, მის ადეკვატურობას თუ შევაფასებთ, ალბათ არ იქნება ცუდი. შესაძლოა, ზოგიერთ სიტუაციაში საერთოდ არც არაფერი ვთქვათ.

როგორც ერთი ძველი ქართული პოემა გვეუბნება: “ზოგჯერ თქმა სჯობს, არა-თქმასა, ზოგჯერ თქმითაც დაშავდების.”

ხშირად ესა თუ ის არაადეკვატური კომუნიკაცია, ჩვენი გასხვავებულობის და საერთო სურათიდან ამოვარდნის სურვილით “პრავდება”, თუმცა ჩემი აზრით, ჭეშმარიტად კარგი კომუნიკაცია ის არის, რომელიც განსხვავებულთან და მოულოდნელთან ერთად, აბსოლუტურად ადეკვატურიც არის. აი, მაგალითად როგორც წითელი ჯვრის ეს კომუნიკაცია: ვიდეო კადრების და მუსიკის აბსოლუტურად მოულოდნელი შერწყმა და სოციო-პოლიტიკურ კონტექსტთან სრული თანხვედრა, ასევე ბრენდის ღირებულებების ძლიერი გადმოცემა.

ადეკვატური არანაირად არ ნიშნავს მოსაწყენს და თუ ისევ იგივე ავტორს დავესესხებით: “იგი სხვა სიძვა სხვაა, შუა უზის დიდი ზღვარი.”

 

კოკა ქამუშაძე – Marketer.ge-ის კონტრიბუტორი

განხილვა