ქალ მეღვინეთა მარშრუტის კვალდაკვალ, თქვენ იმოგზაურებთ იმ მარნებში, სადაც ქალებმა საკუთარი მეურნეობები მოაწყვეს. ისინი ვიზიტორებს იმ ტრადიციებსა და კულტურულ ფასეულობებზე უამბობენ, რომლებიც საუკუნეების განმავლობაში მათ რეგიონში ქართული სტუმარმასპინძლობის ისტორიას წერდა.
ქალ მეღვინეებს ღვინის ინდუსტრიაში ღირსეული ადგილი უჭირავთ. გავრცელებული სტერეოტიპების საპირისპიროდ, ისინი წარმატებული და ძლიერი მეურნეები არიან. უმრავლესობა ახალ პროფესიას დაეუფლა, თავად გახსნა საკუთარი ღვინის საწარმო, ვენახს უვლის და დარგის სპეციალისტებთან ერთად ღვინის წარმოების პროცესს ასრულებს. დღეს მეღვინე ქალები სამაგალითო მეწარმეები არიან და წარმატებით ოპერირებენ ქართულ და მსოფლიო ბაზარზე.
კახეთის შუაგულში, სოფელ კარდენახში ესტუმრებით ნინა ქოჩიაშვილის „კარდანახის მამულს“, რომელიც კახური არქიტექტურისა და ეთნოკულტურის თვალსაჩინო მაგალითია. ისტორიულად, სოფელი კარდენახი (კარდანახი) სავაჭრო გზის ნაწილი იყო. შენობას, სადაც „კარდანახის მამულია“ განთავსებული, საკომლო მარნისა და დუქნის ფუნქცია ჰქონდა. ის 1884-86 წლებში აშენდა. ნინა ქოჩიაშვილის ოჯახმა შენობას ძველი ვიზუალი შეუნარჩუნა და თავდაპირველი ფუნქცია დაუბრუნა. მარანში შესვლისთანავე, თქვენს ყურადღებას საწნახელი მიიქცევს, საიდანაც ღვინო პირდაპირ ქვევრებში მიედინება. ძველ საღვინე ჭურჭელზე ნახავთ ცნობილ მექვევრეთა დამღებს.
კარდენახი მევენახეობის ერთ–ერთი მრავალფეროვანი მიკროზონაა. აქაურ ქარხანაში ადრე იწარმოებოდა ღვინო „წარაფი“, პორტვეინი „კარდანახი“, ვერმუტი „ანაგა“ და სხვა. ნინა ქოჩიაშვილის ოჯახმა ძველი რეცეპტურები მოიძია და დღესდღეობით მათ მარანში 14 სახეობის სასმელი იწარმოება კასრებსა და ქვევრებში, თანამედროვე ტექნოლოგიების გამოყენებით. კვლავაც იქმნება ვერმუტი „ანაგა“, რომელიც 16 სხვადასხვა დისტილატისგან მზადდება. აღდგენილია პორტვეინ „კარდანახის“ წარმოებაც, ტრადიციულად, რქაწითლის, ხიხვისა და მწვანის კუპაჟით.
„კარდანახის მამული“ სოფლის ტიპის დასასვენებელი სივრცეა, სადაც სტუმრებისთვის ოთხი სახლია განკუთვნილი. სახლების პირველ სართულზე მარნებია მოწყობილი, მეორე სართულზე კი სასტუმრო ოთახები. აივნებიდან შეგიძლიათ გადახედოთ ტერუარებს, ალაზნის ველსა და კავკასიონს. ეზოში ბავშვებისა და მოზრდილებისთვის მოწყობილია დასასვენებელი სივრცეები.
ნინოსთან სტუმრობისას ღვინოსთან ერთად გემრიელ კერძებსაც გასინჯავთ. აქ შეგიძლიათ თავად გამოაცხოთ დედას პური, მოამზადოთ ბადაგი, ამოავლოთ ჩურჩხელა, მოახვიოთ ხინკალი და ა.შ.
თუ გსურთ კახეთს ყურძნის კრეფის ან ღვინის დაწურვის სეზონზე ეწვიოთ, „კარდანახის მამული“ რთველის ლხინში სიამოვნებით გიმასპინძლებთ.
ვიზიტის მსურველები ხანგრძლივ ტურებსაც დაჯავშნით კახეთის სანახაობების დასათვალიერებლად. მამულის მიმდებარედ შეგიძლიათ დაათვალიეროთ IV საუკუნეში აგებული საბაწმინდის მონასტერი, იოსებ ნონეშვილის სახლ–მუზეუმი და ძველი კოშკები, რომლებიც სიღნაღის ძველი არქიტექტურის გაგრძელებაა. ტრანსპორტირებას „კარდანახის მამულის“ მასპინძლები თბილისიდანვე უზრუნველყოფენ.
