ცალსახად ცუდ ხელმძღვანელებს უარყოფითი გავლენა აქვთ როგორც სამუშაო კულტურაზე, ისე თანამშრომლებზე. მაგრამ რას იტყვით კარგ უფროსებზე, რომლებიც დასაქმებულებს კარიერულ განვითარებაში უწყობენ ხელს, თავს დაფასებულად აგრძნობინებენ და უკუკავშირსაც გასცემენ? თუმცა ეს მხოლოდ იმის კეთებას არ ეხება, რაც სწორია, უფრო მეტად იმაზეა, რაც მნიშვნელოვანია. შედეგად, ისეთი ხელმძღვანელი ხდებით, რომელთან მუშაობაც ყველას უნდა. და რა უნდა გააკეთოთ ამისთვის? ახლა ზუსტად ამაზე გესაუბრებით:
1. ენდეთ თქვენს თანამშრომლებს
პირველი პრობლემა, რაზეც თითქმის ყველა თანამშრომელი საუბრობს, მიკრომენეჯმენტი და ნდობის ნაკლებობაა. ჩვენს კითხვაზე პასუხს კი ამის საპირისპირო რეალობაში ვიღებთ — კარგი ხელმძღვანელები, ერთი მხრივ, ენდობიან თავიანთ თანამშრომლებს; სწამთ, რომ ისინი ჭკვიანები არიან და საჭირო უნარ-ჩვევებიც აქვთ. მეორე მხრივ კი, შედეგებზე ფოკუსირდებიან.
2. შეამოწმეთ თქვენი ეგო და გააკეთეთ თქვენი საქმე
ალბათ გსმენიათ, რომ ამბობენ, არავის უნდა სთხოვო იმ საქმის შესრულება, რომლის გაკეთებას თავადვე არ ისურვებდიო… ამგვარად, კარგი ხელმძღვანელები დიქტატორები არ არიან, რომლებიც ბრძანებებს გასცემენ. არამედ ისინი იაზრებენ, თუ რა შეიძლება იყოს გონივრული სამუშაო დატვირთვა. ხოლო საჭიროების შემთხვევაში ეხმარებიან დასაქმებულებს, რაც ხელმძღვანელებს კვლავ გუნდის ნამდვილ წევრად აქცევთ.
3. აღნიშნეთ პროგრესი და გაეცით კონსტრუქციული უკუკავშირი
ჩათვალეთ, მონეტის ორი განსხვავებული მხარეა, თუმცა თანაბრად მნიშვნელოვანი. შესაძლოა, საუკეთესო ხელმძღვანელი იყოთ, მაგრამ თუ თქვენს შრომას არასდროს აღნიშნავენ, იფიქროთ, რომ აზრი არ აქვს… ასე ხდება თანამშრომლების შემთხვევაშიც. ხოლო თუ შეცდომებს უშვებთ, ან უნარები, ან ცოდნა გაკლიათ გარკვეულ საკითხებში, კარგი ხელმძღვანელი სულ არ არის ის, რომელიც არაფერს გეუბნებათ, რადგან კარიერული განვითარება მხოლოდ უკუკავშირითაა შესაძლებელი.
4. დააყენეთ თანამშრომლები პირველ ადგილზე
სამსახური არ არის თქვენი ოჯახი. კარგმა ხელმძღვანელებმა ეს იციან და პატივსაც სცემენ იმას, რომ დასაქმებულებს აქვთ ოჯახი, პირადი ვალდებულებები და ინტერესები, რომლებიც ხანდახან ყველაზე პრიორიტეტულია. საუკეთესო ხელმძღვანელები კარგად იცნობენ თანამშრომლებს და მოქნილობასაც სთავაზობენ, როცა ეს ძალიან სჭირდებათ.
5. დაამყარეთ კომუნიკაცია და იყავით პატიოსანი
თანამშრომლებისგან მოტივაციას არ უნდა მოელოდეთ, თუ ისინი ვერ იაზრებენ, რისთვის მუშაობენ… ამიტომ, კარგი ხელმძღვანელის საქმე, განსაკუთრებით კი ეს შუა რგოლის მენეჯერებს ეხება, თანამშრომლებთან მათ ხელთ არსებული ინფორმაციების მკაფიო კომუნიკაციაა. გაურკვევლობა დაბნეულობას ბადებს, ამიტომ კარგი ხელმძღვანელები ყოველთვის ამბობენ იმას, რაც იციან და როცა ასე არ არის, ამას აღიარებენ კიდეც.
