ქართველი დიზაინერების საერთაშორისო ასპარეზზე გამოჩენა უკვე აღარ წარმოადგენს სიახლეს, თუმცა, როდესაც საქმე ეხება ისეთ პრესტიჟულ ღონისძიებას, როგორიც ლონდონის მოდის კვირეულია, ყოველი ახალი წარმატება განსაკუთრებით აღსანიშნავია. გასულ კვირას ლონდონის მოდის კვირეულზე (LFW) მსოფლიო მოდის პროფესიონალთა ყურადღება სწორედ ქართველმა დიზაინერმა, გიორგი ქებურიამ მიიპყრო, რომელმაც თავისი 2025 წლის შემოდგომა/ზამთრის კოლექცია წარადგინა.
ევროკავშირისა და QUIS-ის მხარდაჭერა – ხიდი საერთაშორისო წარმატებისკენ
ლონდონის მოდის კვირეულზე ქებურიას ასეთი შთამბეჭდავი წარდგენა, მისი უდავო შემოქმედებითი ტალანტისა და უზარმაზარი ძალისხმევის გარდა, ასევე, ევროკავშირის მიერ დაფინანსებული პროექტის “QUIS” მხარდაჭერით გახდა შესაძლებელი. ეს გახლავთ პროექტი, რომელიც მოდისა და ტანსაცმლის სექტორში ხარისხისა და სტანდარტების გაუმჯობესებაზეა ორიენტირებული და ქართველი დიზაინერებისთვის მნიშვნელოვან პლატფორმას წარმოადგენს საერთაშორისო სტანდარტების ათვისებისა და გლობალურ ბაზარზე ინტეგრაციისთვის.
ლონდონის მოდის კვირეულის ფარგლებში, გიორგი ქებურიას ჰქონდა შესაძლებლობა, არა მხოლოდ წარედგინა საკუთარი კოლექცია მსოფლიო მოდის ერთ-ერთ ყველაზე პრესტიჟულ ღონისძიებაზე, არამედ კიდევ უფრო ახლოს გაცნობოდა მოდის სფეროს გავლენიან მოთამაშეებსა და ინდუსტრიის ექსპერტებს. კოლექციის შექმნისას, დიზაინერმა გაითვალისწინა ის ახალი ტრენდები და მოთხოვნები, რომლებიც დღეს მსოფლიო მოდის ინდუსტრიაში არსებობს.
კოლექცია – ვიქტორიანული პერიოდის ფუტურისტული ინტერპრეტაცია
გიორგი ქებურიას 2025 წლის შემოდგომა/ზამთრის კოლექცია წარმოადგენს ნამდვილ ხელოვნების ნიმუშს, რომელშიც ვიქტორიანული ეპოქის ელემენტები ფუტურისტულ ხედვასთან ერთად არის შერწყმული. კოლექციის ყველა ნაწილში იგრძნობა დიზაინერის დახვეწილი გემოვნება და ინოვაციური მიდგომა.
მეცხრამეტე საუკუნის ტრადიციული სილუეტები ქებურიას კოლექციაში ტრანსფორმირებულია თანამედროვე დიზაინის ენაზე. შთამბეჭდავია ის, თუ როგორ ახერხებს ის ისტორიული მოტივების სრულიად ახალი ფორმით წარმოდგენას. თოჯინების მსგავსი ქალური სილუეტები ქებურიას კოლექციაში ავანგარდული პრიზმითაა წარმოდგენილი.
კოლექცია გამოირჩევა განსხვავებული ტექსტურისა და გეომეტრიული ფორმების გამოყენებით, რაც მას განსაკუთრებულ ხასიათს სძენს. დიზაინერმა სხვადასხვა მასალის ჰარმონიულად შერწყმით შექმნა ელეგანტური, მაგრამ ამავდროულად პროვოკაციული და თავისუფალი კოლექცია. სწორედ ამ კონტრასტმა – ტრადიციული ელემენტების ფუტურისტულ ხედვასთან შერწყმამ – მიიპყრო მოდის კრიტიკოსების განსაკუთრებული ყურადღება.
გიორგი ქებურია: „ძალიან მიხარია, რომ მონაწილეობა მივიღე ლონდონის მოდის კვირეულზე. ეს ნამდვილად საპასუხისმგებლო გამოცდილება იყო – ბევრ სტუმარს ველოდებოდით, რაც კიდევ უფრო გვიბიძგებდა ბევრი გვემუშავა. ეს ჩვენი დებიუტი იყო და საოცრად საინტერესო გამოცდილება იყო სხვა ქვეყანაში საკუთარი შემოქმედების წარდგენა. ლონდონი ხომ მოდის ერთ-ერთი უმნიშვნელოვანესი დედაქალაქია და აქ წარმოჩენა ყოველთვის განსაკუთრებულია.
პროცესი ყოველთვის გრძელვადიანია. უმოკლეს დროში უნდა მოგვესწრო ყველაფერი, რაც დიდი გამოწვევა იყო. უამრავი ხალხი მუშაობდა, იმ შედეგის მისაღებად, რაც ნამდვილად გვსურდა. მოსამზადებელი პერიოდი ყოველთვის შრომატევადი და ინტენსიურია – მთელი ორი თვის განმავლობაში ვმუშაობდით ყველა დეტალზე.
კოლექციის წარდგენაში ბევრი ადამიანი და კომპანია დაგვეხმარა, მინდა გამოვყო DHL-ის მხარდაჭერაც, რომელმაც უზრუნველყო ჩვენი ნამუშევრების უსაფრთხო ტრანსპორტირება. ევროკავშირისა და სხვადასხვა კომპანიების მხარდაჭერის გარეშე ეს ყველაფერი შეუძლებელი იქნებოდა.
კოლექციას SKAZZ-ის მუსიკა ახლდა, ჩემი აზრით, ეს მსოფლიოს ერთ-ერთი საუკეთესო ბენდია. დიდი ინსპირაცია მივიღე მათი პოლიტიკური სიმღერიდან. რადგან მოდაც, ზოგადად, პოლიტიკურია, ამიტომ განსაკუთრებით მიხაროდა მათთან თანამშრომლობა.“
მდგრადობა და ხარისხი – თანამედროვე მოდის აუცილებელი ატრიბუტები
ქებურიას კოლექციის წარმატების ერთ-ერთი მნიშვნელოვანი ფაქტორი მისი პასუხისმგებლიანი მიდგომაა მდგრადობისა და ხარისხის სტანდარტების მიმართ. დღევანდელ მოდის ინდუსტრიაში მდგრადობა უკვე აღარ არის მხოლოდ ტრენდი – ის აუცილებლობაა. ბრიტანეთის მოდის საბჭომ (BFC) გიორგი ქებურია მისი კოლექციის შემოქმედებითი გამოხატვისა და მდგრადობისა და ხარისხის მაღალ სტანდარტებთან სრული შესაბამისობიდან გამომდინარე შეარჩია.
ქებურიას ბრენდი იყენებს ორგანულ და გადამუშავებულ მასალებს, რომლებიც არ შეიცავს მავნე ქიმიკატებს. ეს უზრუნველყოფს კოლექციის ეკომეგობრულობას და ამცირებს გარემოზე ზემოქმედებას. გარდა ამისა, ბრენდის ნარჩენების მართვის პრაქტიკა, გადამუშავებული და ეკოლოგიურად სუფთა შეფუთვა მას აქცევს სოციალურად პასუხისმგებლიან მოთამაშედ მოდის ინდუსტრიაში.
თანამედროვე მოდის სამყაროში ხარისხის სტანდარტები მკაფიოდ არის განსაზღვრული. შესაბამისად, ბრენდები, რომლებიც საერთაშორისო ასპარეზზე იმკვიდრებენ თავს, მაქსიმალურად ცდილობენ მიჰყვნენ ამ სტანდარტებს. ქებურიას ბრენდი წარმატებით ართმევს თავს ამ გამოწვევას, რაც მას მნიშვნელოვან კონკურენტულ უპირატესობას ანიჭებს.
შედეგი და შეფასება – ქართული მოდის ახალი ეტაპი
გიორგი ქებურიას მონაწილეობა ლონდონის მოდის კვირეულზე ქართული მოდის ინდუსტრიისთვის უდავოდ მნიშვნელოვანი მოვლენაა. მოდის კრიტიკოსებმა მაღალი შეფასება მისცეს მის კოლექციას, აღნიშნეს, რამდენად ღირებულია მისი მიდგომა როგორც ტრადიციული და თანამედროვე ელემენტების შერწყმის, ასევე მდგრადობის პრინციპების დაცვის თვალსაზრისით. ქებურიას კოლექცია არის ნამდვილი მანიფესტი იმისა, თუ როგორ შეიძლება ისტორიული მოტივების თანამედროვე ინტერპრეტაცია. მის ნამუშევრებში იგრძნობა როგორც ღრმა პატივისცემა მოდის ისტორიისადმი, ისე მუდმივი მზადყოფნა ინოვაციებისთვის.
გიორგი ქებურიას წარმატება მხოლოდ ერთი დიზაინერის ინდივიდუალური მიღწევა არ გახლავთ – ეს არის მთელი ქართული მოდის ინდუსტრიის გამარჯვება, რომელიც ადასტურებს, რომ ქართულ მოდას აქვს პოტენციალი, გახდეს გლობალური მოდის სამყაროს განუყოფელი ნაწილი. ქებურიას მონაწილეობა ლონდონის მოდის კვირეულზე კიდევ ერთი დასტურია, რომ ნიჭი, ინოვაცია და ღირებულებების პატივისცემა – ის ღირებულებებია, რომლებიც საზღვრებს არ ცნობს და მსოფლიო აღიარებას იმსახურებს.
ევროკავშირის მხარდაჭერა კვლავაც რჩება მნიშვნელოვან ფაქტორად ქართველი მეწარმეების საერთაშორისო ბაზარზე გასასვლელად. QUIS პროექტის ფარგლებში გაწეული დახმარება ხელს უწყობს ქართველ დიზაინერებს, შეიძინონ ცოდნა და გამოცდილება, რაც აუცილებელია საერთაშორისო სტანდარტებთან შესაბამისობისთვის. ეს, თავის მხრივ, ზრდის ნდობას ქართული ნაწარმის მიმართ და აფართოებს საექსპორტო შესაძლებლობებს.
[R]
