პირობითად თუ დავყოფთ, დღესდღეობით ადამიანების ნაწილი ხელოვნურ ინტელექტს სათავისო განვითარებისთვის იყენებს; ნაწილი კი შიშით ელოდება, როდის ჩაანაცვლებს ტექნოლოგია ადამიანურ რესურსს… რა თქმა უნდა, მსგავს სიტუაციაში შიშს სჯობს, ფეხი ავუწყოთ პროგრესს და თუკი შეჩერება არ უწერია ამ ინოვაციურ ტექნოლოგიას, ჩვენც მასთან ერთად გავიზარდოთ — მოვერგოთ რეალობას, რომლის წინაშეც ვიმყოფებით და ჩანაცვლების ნაცვლად, უკეთესი პერსპექტივებისთვის გამოვიყენოთ.
სწორედ ამ პოტენციალის გაცნობიერებას უკავშირდება სქილვილ აკადემიის კურსი — „ხელოვნური ინტელექტი და AI პროექტების მართვა“, რომელიც ამ მიმართულებით პირველია საქართველოში. ეს უკანასკნელი მოიცავს ხელოვნური ინტელექტისა და მისი გამოყენების მაგალითების მიმოხილვას, AI-ის ისტორიას, ტექნოლოგიის მიზნების ახსნას და AI მოდელების შესაქმნელად საჭირო ეტაპების განხილვას.
საგულისხმოა, რომ 21 ივნისს ღია კარის დღეა, სადაც დაინტერესებულ პირებს შეუძლიათ მისვლა. კურსზე სწავლა 26 ივნისს იწყება, რეგისტრაციისთვის კი ეწვიეთ ბმულს.
კურსის შესახებ უფრო დეტალური ინფორმაციის მისაღებად სქილვილ აკადემიის დირექტორს, გიგის და ლექტორს, ანის გავესაუბრეთ.
M: გიგი, რატომ გადაწყვიტეთ აღნიშნული კურსის დანერგვა?
გიგი: ხელოვნური ინტელექტი სამართლიანად ყველაზე პოპულარული რამ არის დღეისათვის, რადგან სწრაფად ვითარდება და სწრაფადვე ინერგება — მალევე იწვევს რეალურ ცვლილებებს. ასევე, მომავალზე უდიდესი გავლენა აქვს. შესაბამისად, ადამიანებმა აქედანვე, დროულად უნდა ისწავლონ, როგორ ემუშაონ AI-ს, რათა, ერთი მხრივ, სათავისოდ გამოიყენონ და მეორე მხრივ, ამ გამოყენების მსხვერპლნი არ აღმოჩნდნენ. მაგალითად, ქოლცენტრის ოპერატორმა უნდა იცოდეს, რომ ხელოვნური ინტელექტის მიერ ჩანაცვლების საშიშროება აქვს, მაგრამ ასევე უნდა გაიგოს, რა პერსპექტივები აქვს აღნიშნულ ტექნოლოგიას — ასე შეძლებს, არსებულ ცოდნას ახალი ინტერპრეტაციები შესძინოს და თანამედროვეობას მოარგოს, ან რაღაც ახალს დაეუფლოს.
მთლიანობაში, ამ კურსის მიზანია, ხალხს მეტი პერსპექტივა დავანახოთ, პროდუქტიულობისა და შესაძლებლობების გაზრდაში დავეხმაროთ.
M: ვისთვის არის კურსი განკუთვნილი? ნებისმიერს შეუძლია, ვისაც უბრალოდ ინტერესი აქვს და არაფერი გაეგება ხელოვნური ინტელექტის თუ გარკვეული პროფესიული ცოდნაა საჭირო?
ანი: ეს კურსი განკუთვნილია მათთვის, ვინც დაინტერესებულია ხელოვნური ინტელექტით (AI) და მისი გამოყენებით ბიზნესსა თუ ყოველდღიურ ცხოვრებაში. კურსის გავლა შეუძლია ნებისმიერი ინდუსტრიის წარმომადგენელს, მათ შორის ბიზნესის, ტექნოლოგიებისა და აკადემიის წარმომადგენლებსაც, რომელთაც სურთ, გამოიკვლიონ ხელოვნური ინტელექტის პოტენციალი პრობლემების გადაჭრაში და ინოვაციების მართვაში. ის ასევე გამოსადეგია მენეჯერებისთვის და გადაწყვეტილების მიმღები პირებისთვის, რომლებიც ჩართულნი არიან ტექნიკური პროექტების მენეჯმენტში ან განხორციელებაში. ხელოვნური ინტელექტის ან პროგრამირების წინასწარი ცოდნა არ არის საჭირო, რადგან კურსი უზრუნველყოფს ხელოვნური ინტელექტის კონცეფციებისა და ტექნიკის საფუძვლიან გაგებას. კურსი ყველასთვისაა, ვისაც უნდა ააჩქაროს საკუთარი ცხოვრების ტემპი, ფეხი აუწყოს თანამედროვე მსოფლიოს გამოწვევებს ან გაზარდოს ბიზნესის ეფექტურობა.
M: მეტად რომ დავაკონკრეტოთ, რას ისწავლიან მონაწილეები ამ 3-თვიანი კურსის განმავლობაში?
გიგი: ამ თვალსაზრისით სამი რამის გამოყოფა შეგვიძლია: როგორ ვემუშაოთ ხელოვნურ ინტელექტს; რა შეუძლია და როგორ გამოვიყენოთ; და როგორ ვმართოთ AI პროექტები. მთლიანობაში, მონაწილეები გაიგებენ, რა გზებით შეიძლება ამ უახლესი ტექნოლოგიის კომპანიებში, ყოველდღიურ საქმიანობაში დანერგვა.
ანი: კურსი სიღრმისეულად შეისწავლის მანქანურ სწავლებას, ნერვულ ქსელებსა და ღრმა დასწავლას. სილაბუსი მოიცავს სხვადასხვა ტიპის AI-ის გამოყენების ნიმუშების ახსნას, როგორიცაა ბუნებრივი ენის დამუშავება, კომპიუტერული ხედვა, თვითმართვადი მანქანები, თაღლითობის გამოვლენა, ხელოვნური ინტელექტის გამოყენების შემთხვევები მედიცინაში, მარკეტინგსა და ფინანსებში, გენერაციული AI-ის ცნებები და მრავალი სხვა. გარდა ამისა, კურსი მოიცავს AI პროექტების მართვის პრინციპებს, მათ შორის AI გადაწყვეტილებისთვის შესაფერისი ბიზნესპრობლემების იდენტიფიცირებას, მონაცემთა შეგროვებას, დამუშავებას და მოდელის შერჩევასა და დანერგვას.
M: დღეს დიდი ხელმისაწვდომობაა AI რესურსებზე, რაც ერთი მხრივ კარგიცაა, მაგრამ ნავიგაციასაც ართულებს… თითქოს ძალიან ბევრი ინფორმაციაა თავმოყრილი და საუკეთესოს მიგნება მეტად რთულდება. კურსი ძირითადად რომელ მიმართულებაზე იქნება ფოკუსირებული და რა რესურსებს დაეყრდნობა?
ანი: კურსი მიმოიხილავს ყველა ინდუსტრიას და მათთვის განკუთვნილ AI ხელსაწყოებს, შესაბამისად, მონაწილეებისთვის მიწოდებული ინფორმაცია დალაგებული იქნება სწორედ ამ კრიტერიუმით. ძირითადად, კურსი ფოკუსირებული იქნება გენერაციულ AI-ზე და კომპიუტერულ ხედვაზე.
გიგი: მთელი კურსის განმავლობაში უახლეს მასალებს, კვლევებს, ვიდეოებსა და ჰენდაუთებს გამოვიყენეთ. ამ მუდმივად განახლებადი რესურსების გარდა, ცოდნის ძირითად წყაროს ჩვენი ლექტორები წარმოადგენენ, რომელთაც უშუალო პრაქტიკული შეხება აქვთ ხელოვნურ ინტელექტთან. თან ისიც მნიშვნელოვანია, რომ კურსის ფარგლებში მონაწილეებს უშუალოდ მოუწევთ პრაქტიკული საქმიანობა, რათა მეტად ნაყოფიერი იყოს ყველაფერი.
M: საინტერესოა, პრაქტიკული თვალსაზრისით რამდენად მნიშვნელოვანია ამ კურსის გავლა? რატომ უნდა აირჩიონ ის მომხმარებლებმა და მისი დასრულების შემდეგ რა შესაძლებლობები მიეცემათ?
ანი: AI ხელსაწყოებს საკმაოდ დიდი როლი უკავია დღევანდელ ტექნოლოგიურ ბაზარზე და უამრავ ადამიანს თუ კომპანიას უადვილებს ყოველდღიურ ცხოვრებაში ნავიგაციას. იმისათვის, რომ ჩვენც არ ჩამოვრჩეთ ამ მოვლენებს, საჭიროა ვიცოდეთ თუ რა არის რეალურად AI, როგორ მუშაობს ის და როგორ ეხმარება ის ბიზნესებს უფრო ეფექტურად მუშაობაში. კურსის დასრულების შემდეგ მონაწილეებს სრულფასოვნად ეცოდინებათ AI პროექტების სრული სასიცოცხლო ციკლი, შექმნიან საკუთარ AI მოდელებს (ნულიდან კოდის გარეშე ხელსაწყოების გამოყენების საშუალებით), შეაფასებენ თავიანთ ბიზნესში AI გადაწყვეტილებების დანერგვის ღირებულებასა და ეფექტს, ექნებათ საფუძვლიანი ცოდნა თანამედროვე AI აპლიკაციების და გამოყენების მაგალითების შესახებ, გამოიყენებენ AI ხელსაწყოებს ყოველდღიურ ცხოვრებაში ან ექნებათ შესაძლებლობა, დაიწყონ მუშაობა AI პროექტების მენეჯერად.
M: როგორ ფიქრობთ, ხელოვნური ინტელექტის საქართველოს ბაზარზე განვითარება, რაც პირველ რიგში მისი შესწავლით იწყება, როგორ აისახება ჩვენზე? როგორც თანამედროვე სამყაროს ნაწილზე…
ანი: რამდენიმე პოტენციური ეფექტი:
ეკონომიკური ზრდა: AI კურსების შეთავაზებით, საქართველოს შეუძლია ხელი შეუწყოს გამოცდილი ტალანტის ზრდას. თავისთავად, ეს მოიზიდავს შიდა და უცხოურ ინვესტიციებს, წაახალისებს ინოვაციებს და ხელს შეუწყობს ქვეყნის მთლიან ეკონომიკურ ზრდას. ბოლო რამდენიმე წელიწადში ეს ეფექტები საკმაოდ კარგად დავინახეთ coding კურსების და ტექ სტარტაპების განვითარების მაგალითზე.
სამუშაოს შექმნა: ხელოვნური ინტელექტის კურსის შექმნა გამოიწვევს ახალი სამუშაო შესაძლებლობების შექმნას სხვადასხვა სექტორში. რაც უფრო გავრცელდება AI-ის გამოყენება, გაიზრდება მოთხოვნა ხელოვნური ინტელექტის მქონე პროფესიონალებზე, როგორიცაა მონაცემთა მეცნიერები, მანქანური სწავლების ინჟინრები და AI მკვლევრები. ეს ხელს შეუწყობს უმუშევრობის დონის შემცირებას და მაღალი ხარისხის სამუშაო ადგილების შექმნას ადგილობრივი სამუშაო ძალისთვის.
ტექნოლოგიური წინსვლა: ხელოვნური ინტელექტის კურსების შემუშავება მიუთითებს საქართველოს ვალდებულებაზე, დარჩეს ტექნოლოგიური წინსვლის სათავეში ჩვენს რეგიონში. ხელოვნური ინტელექტის ცოდნითა და უნარებით ინდივიდების აღჭურვით, საქართველოს შეუძლია, წვლილი შეიტანოს ქვეყნის საერთო ტექნოლოგიურ პროგრესსა და კონკურენტუნარიანობაში, როგორც რეგიონში, ისე გლობალურად.
ინოვაცია და მეწარმეობა: ხელოვნური ინტელექტის კურსებს შეუძლია, განავითაროს ინოვაციებისა და მეწარმეობის კულტურა. როდესაც ინდივიდები იძენენ გამოცდილებას ხელოვნური ინტელექტის სფეროში, მათ შეუძლიათ, თავიანთი ცოდნა AI-ზე დაფუძნებული ახალი პროდუქტების, სერვისებისა და სტარტაპების შესაქმნელად გამოიყენონ.
სოციალური ზემოქმედება: AI-ს აქვს პოტენციალი, გადაჭრას სოციალური გამოწვევები ისეთ სფეროებში, როგორიცაა ჯანდაცვა, სოფლის მეურნეობა, ტრანსპორტი და მმართველობა. ხელოვნური ინტელექტის კურსების მიწოდებით, საქართველოს შეუძლია, უფლებამოსილება მისცეს ინდივიდებს, გამოიყენონ AI სოციალური სიკეთისთვის, რაც გამოიწვევს საჯარო სერვისების გაუმჯობესებას, უკეთესი გადაწყვეტილებების მიღებას და მოქალაქეების ცხოვრების ხარისხის გაუმჯობესებას.
მნიშვნელოვანია აღინიშნოს, რომ ხელოვნური ინტელექტის განვითარების წარმატება საქართველოში დამოკიდებული იქნება სხვადასხვა ფაქტორზე — მათ შორისაა ხელოვნური ინტელექტის კურსების ხარისხი და შესაბამისობა, დამხმარე ინფრასტრუქტურის ხელმისაწვდომობა, ინდუსტრიაში დაინტერესებული მხარეების ჩართულობა და ხელოვნური ინტელექტის პოლიტიკის გლობალურ სტანდარტებთან შესაბამისობა.
კურსზე სწავლა 26 ივნისს იწყება, რეგისტრაციისთვის კი ეწვიეთ ბმულს.
