15 დეკემბერი, 2024 – თბილისი, საქართველო
ქინქლაძის ფონდი Grassroots Cup Georgia-ს ახალი პარტნიორია. თანამშრომლობა სათავეს 17-22 დეკემბერს თბილისში გასამართ ზამთრის ტურნირის დაწყებასთან ერთად აიღებს.
Kinkladze Grassroots Cup Georgia-ში მონაწილეობას 80 გუნდი მიიღებს და ტურნირი გაიმართება 17-22 დეკემბერს ინტერის აკადემიის მოედნებზე. ეს კოლაბორაცია საქართველოში ახალგაზრდული ტალანტისა და გრასრუტ ფეხბურთის მხარდაჭერის საკითხზე საერთო ხედვისა და დამოკიდებულების ხაზგასმაა.
Grassroots Cup Georgia 2023 წელს დაარსდა და მცირე დროში ქვეყნის მთავარ ახალგაზრდულ საფეხბურთო ტურნირად ჩამოყალიბდა. ტურნირი, რომელიც წელიწადში ორჯერ იმართება და ხუთ ასაკობრივ კატეგორიას (U7-U11) მოიცავს, გუნდურ მუშაობაზე, უნარების განვითარებასა და ღირსეულ სპორტსმენობაზე აქცენტირებულ გარემოში ახალგაზრდების შეჯიბრს უზრუნველყოფს. 17-22 დეკემბერს ჩანიშნულ ტურნირში მონაწილეობას აქამდე უპრეცედენტო რაოდენობის გუნდი მიიღებს, რაც ტურნირის პოპულარობასა და მის მნიშვნელობაზე მეტყველებს.
ქინქლაძის ფონდის მიზანი ფეხბურთელთა მომავალი თაობის განვითარების მხარდაჭერაა. ორგანიზაციათა კოლაბორაცია ტურნირის მონაწილეთათვის უნიკალური გამოცდილების შექმნაზე, შეჯიბრის საჭირო რესურსით უზრუნველყოფაზე, მოედანსა და მის მიღმა ახალგაზრდა მოთამაშეებისთვის შესაძლებლობების მიცემაზე იქნება ორიენტირებული.
ლეგენდარული ქართველი ფეხბურთელი და ქინქლაძის ფონდის თანადამფუძნებელი, გიორგი ქინქლაძე, პარტნიორობის შესახებ ენთუზიაზმით საუბრობს:
„გრასრუტ ფეხბურთი ამ თამაშის გულია, ამ ახალგაზრდა ფეხბურთელების მხარდაჭერა საქართველოში ფეხბურთის მომავლისთვის გადადგმული უმნიშვნელოვანესი ნაბიჯია. Grassroots Cup Georgia ახალგაზრდებს შორის ტალანტის განვითარებასა და ღირსეული სპორტული პრინციპების დანერგვაზე ბევრს აკეთებს. ამ წამოწყების ნაწილად ყოფნა დიდი პატივია. მოხარული ვარ, რომ ჩემი სახელობის ფონდი მსგავსი წამოწყების ერთგული და მხურვალე გულშემატკივარია.”
ზუკა დვალიშვილი, Grassroots Cup Georgia-ს დამფუძნებელი, პარტნიორობაზე საუბრისას ასეთივე აღტაცებას გამოხატავს:
„გიორგი ქინქლაძემ ქართულ ფეხბურთზე წარუშლელი კვალი დატოვა. მისი საფეხბურთო უნარი, კრეატიულობა არაერთი თაობის უამრავი ახალგაზრდისთვის შთაგონების წყაროდ იქცა. ქინქლაძის ფონდთან პარტნიორობა Grassroots Georgia-თვის უდიდესი პატივია. დარწმუნებული ვარ, რომ ჩვენი კოლაბორაცია დადებით გავლენას იქონიებს ზოგადად ქართული საფეხბურთო ტალანტის განვითარებაზე.”
ქინქლაძის ფონდის შესახებ:
ქინქლაძის ფონდი მიზნად ისახავს ადგილობრივი და საერთაშორისო საფეხბურთო, სპორტული ინიციატივების მხარდაჭერას, რომლებიც ხელს უწყობს ახალგაზრდების განვითარებას, პროფესიულ წარმატებასა და საზოგადოების ძლიერ წევრებად ჩამოყალიბებას.
Grassroots Cup Georgia-ს შესახებ:
Grassroots Cup Georgia 2023 წელს ჩამოყალიბდა და საქართველოში წამყვანი ახალგაზრდული საფეხბურთო ტურნირია, ის გრასრუტ ფეხბურთის განვითარებასა და ხუთ ასაკობრივ კატეგორიაში (U7-U11) გადანაწილებულ ახალგაზრდებს შორის ღირსეული სპორტული პრინციპების დანერგვას ემსახურება.
[R]
