23
Jul
2019

ჰონგ-კონგის რეკლამის დედოფალი – კიტი ლუნი Ad Black Sea 2019-ზე

23 Jul 2019

ქართულ საერთაშორისო სარეკლამო ფესტივალზე, Ad Black Sea, წელს სპიკერი ჩინური კრეატიული ინდუსტრიიდანაც არის მოწვეული. კიტი ლუნი – ეს სახელი ჩინეთის სარეკლამო ინდუსტრიაში კარგად იციან. 19-21 სექტემბერს კი, ბათუმში, Ad Black Sea-ს დელეგატებს გაუზიარებს გამოცდილებას, თუ როგორ შევქმნათ იდეები, რომლებიც მსოფლიო მასშტაბით რეალიზდება.

კიტი ჰონგ-კონგში დაიბადა. სარეკლამო სფეროს ჯერ ბაპტისტთა უნივერსიტეტში სწავლობდა, შემდეგ კი, მაგისტრატურაზე ჩააბარა სირაკუზის უნივერსიტეტში, ნიუ-იორკის შტატში. ის ძალიან ბეჯითი მოსწავლე იყო და მოხვდა SU Newhouse-ის საკომუნიკაციო სკოლის 50 საუკეთესო სტუდენტს შორის, რომელიც სკოლას 50 წლის მანძილზე ჰყოლია. ასევე, მოხვდა საკომუნიკაციო სკოლა HKBU-ის 40 წლიანი ისტორიის გამორჩეულ 40 კურსდამთავრებულს შორის.

კიტიმ კარიერა, Leo Burnett-ში, კოპირაიტერობით დაიწყო და შეუპოვარი ხასიათის დამსახურებით, კრეატიულ განყოფილებაშიც მოხვდა. მოგვიანებით, არაერთ საერთაშორისო სააგენტოს ჩაუდგა სათავეში. მან იმუშავა McCann-ში, Euro RSCG-ში, Arnold-სა და Lowe-ში. მას ერთდროულად აქვს მართვისა და კრეატიული მუშაობის ნიჭი, რაც არაერთმა ნამუშევარმაც დაადასტურა.

90-იანებში, საჯარო სექტორის სარეკლამო სფეროში მუშაობისას, ეფექტიანი საქმიანობის გამო, მას ჰონგ-კონგის საჯარო სექტორის რეკლამის დედოფალი უწოდეს.

10 წლის განმავლობაში, კიტი ხელმძღვანელობდა სააგენტოს Lowe China. სააგენტოში მან სერიოზულ წარმატებას მიაჭრია. მისი დამსახურებით, Lowe ჩინეთის ყველაზე მეტი ჯილდოს მფლობელი კომპანია გახდა 2014-2015 წლებში. გლობალურ დონეზე კი, სააგენტო 30-ე ადგილს იკავებდა (Gunn Report-ის მიხედვით). 2016 წლიდან, ის Facebook-ს შეუერთდა, Creative Shop-ის ხელმძღვანელად.

2011 წელს, კიტი კანის ლომების მთავარი ფორუმის ორგანიზატორი იყო და თავადვე მასპინძლობდა. AdAge-მ ის ჩინეთის ერთ-ერთ ყველაზე დამსახურებულ კრეატორად დაასახელა 2013 წელს. კიტი ორჯერ იყო კანის ლომების ჟიურის წევრი, 2015 და 2019 წლებში.

2013 წელს, კიტიმ გამოუშვა ავტობიოგრაფია “რეკლამა ტუჩსაცხის გარეშე”.

განხილვა