ბრენდები დღეს ერთი საერთო გამოწვევის წინაშე დგანან: სად დახარჯონ სარეკლამო ბიუჯეტები, რათა რაც შეიძლება მეტ მომხმარებელს მიწვდნენ. უამრავი არჩევანი რომ არსებობს, ეს სიტუაციას კიდევ უფრო ართულებს, რადგან არასწორი გადაწყვეტილების შემთხვევაში ხშირად ფუჭად დახარჯულ რესურსებსა და, შესაბამისად, შეზღუდულ გავლენამდე მივდივართ. აქ მთავარი მომხმარებლები არიან, სწორედ ისინი განსაზღვრავენ, რომელი არხი გახდეს მთავარი და რომელი არა. მარკეტერების ამოცანა კი სწორედ ამის დადგენაა.
მართალია, დღეს ელექტრონული ვაჭრობის ვებგვერდები სიახლეს აღარ წარმოადგენს, მაგრამ ამან დიდად შეუწყო ხელი ახალი სარეკლამო გამოცდილების შექმნას. იმის გამო, რომ მომხმარებლებისთვის ონლაინ ვაჭრობა კომფორტული აღმოჩნდა, მარკეტერებსაც მოუწიათ თავიანთი სარეკლამო ბიუჯეტები სწორედ მსგავსი გვერდებისკენ მიემართათ. 2024 წელს კი ონლაინ ვაჭრობის მედია არხებზე სარეკლამო ბიუჯეტიდან 61 მილიარდ დოლარზე მეტის დახარჯვას ელიან…
აქვე უნდა ვისაუბროთ გეიმინგზე, რომელმაც ბოლო დროს მომხმარებელთა დიდი რაოდენობის ყურადღება მიიპყრო. მართალია, თავიდან ნიშ კატეგორიის მსგავსად პოზიციონირებდა, მაგრამ თითქმის 40 წელი დასჭირდა მანამ, სანამ მომხმარებელთა დიდი ნაწილისთვის კომერციული ადგილი გახდებოდა… დღეს კი ფაქტი ის არის, რომ 2028 წლისთვის გლობალური სათამაშო ბაზარი 545 მილიარდ დოლარს მიაღწევს, რაც საოცარ შესაძლებლობას ქმნის მარკეტერებისთვის, რათა 2.7 მილიარდ გეიმერს დაუკავშირდნენ.
თანაც, აქ ჩართულობა ძალიან მაღალია: საშუალოდ გეიმერი კვირაში 8 საათს ხარჯავს ონლაინ თამაშებზე. თუმცა არ იფიქროთ, რომ აქ მხოლოდ ახალგაზრდა მამაკაცები იგულისხმებიან — ახალი კვლევის თანახმად, ამერიკელ მოთამაშეთა 45%-ს სწორედ ქალები შეადგენენ, 30%-ის ასაკი კი 45 წელს აღემატება. ამგვარად, თამაშში არსებული რეკლამა, სპონსორობა თუ პარტნიორობა შესანიშნავ გზებს წარმოადგენს ბრენდებისთვის, რათა ამ ბაზარზე შემოსავლების, ლოიალობისა თუ შედეგების გაუმჯობესებისთვის შევიდნენ.
კიდევ ერთ განვითარებად არხად კი CTV შეგვიძლია ჩავთვალოთ, ანუ სტრიმინგ ვიდეო და ე. წ. დაკავშირებული ტელევიზია. ბრენდებს, რომელთაც სტრიმინგ არხებზე რეკლამირება შეუძლიათ, დიდ აუდიტორიამდე მისვლის პოტენციალი აქვთ, განსაკუთრებით კი მაშინ, როცა Netflix-სა და Disney-ზე მზარდი მოთხოვნა არსებობს…
საინტერესოა ისიც, რომ მარკეტერები ახალ გზებს იკვლევენ, რათა CTV უფრო მიმზიდველად აქციონ. მაგალითად, ზოგიერთი კომპანია ექსპერიმენტებს ატარებს, რათა მაყურებლებს საშუალება მისცეს, არჩევანი თავადვე გააკეთონ და მიიღონ პერსონალიზებული რეკომენდაციები. მოკლედ რომ ვთქვათ, CVT ფორმატი მეტად იმერსიულ, დინამიკურ და ინტერაქციულ გამოცდილებას გვთავაზობს…
ამგვარად, შესაძლოა, ახალი სარეკლამო შესაძლებლობები ეფექტური იყოს ბრენდის ლოიალობის ჩამოყალიბებისთვის როგორც ახალგაზრდა აუდიტორიებში, ისე ახალი ტექნოლოგიების ე. წ. ადრეულ მიმღებებთან… დაბოლოს, ძლიერი კომერციული მონაცემები წარმატებული კომერციული მედია სტრატეგიების საფუძველია. მიმდინარე ტენდენციები კი კიდევ უფრო გავრცელდება სარეკლამო ინდუსტრიაში, რაც იმას ნიშნავს, რომ განვითარებადი არხები ახლა იმაზე უფრო მნიშვნელოვანი გახდება, ვიდრე ოდესმე ყოფილა…
