არაერთი გამოკითხვა გვაჩვენებს, რომ ხშირად კომპანიების თანამშრომლებმაც კი არ იციან საკუთარი ორგანიზაციის სტრატეგია. ეს ყოველთვის არ ხდება მენეჯმენტის კომუნიკაციის ნაკლებობის გამო. თავად კომუნიკაციის მიდგომას აქვს მნიშვნელობა და ამ სტატიაში სწორედ ამას მიმოვიხილავთ.
წარმოადგინეთ ალტერნატივები
იმის ახსნა, თუ რატომ არ იყო სასურველი სხვა ალტერნატივები, დაგეხმარებათ ახსნათ – რატომ აირჩიეთ ამჟამინდელი სტრატეგია. ამრიგად, სტრატეგიის წარდგენისას თქვენ შეგიძლიათ წარმოადგინოთ განხილული ალტერნატივები და განმარტოთ, თუ რატომ დაიწუნეთ ისინი. განვიხილოთ, მაგალითად, აშშ-ს საბროკერო ინდუსტრიაში წამყვანი ფირმის, Edward Jones-ის პარტნიორობის გამოცდილება. ერთ-ერთ ინტერვიუში, ჯონ ბახმანმა, რომელიც ფირმის მმართველი პარტნიორი იყო 1980-2003 წლებში, შემდეგნაირად გამოხატა თავისი სტრატეგია:
„ინდუსტრიის სხვა კონკურენტებისგან განსხვავებით, ჩვენ და ვყიდით მხოლოდ ინდივიდუალურ ინვესტორებზე. ამ სეგმენტის ფარგლებში, ჩვენ ყურადღებას ვამახვილებთ ამერიკის სოფლად მცხოვრებ ფიზიკურ პირებზე და არა ქალაქების მოსახლეობაზე. რასაც ჩვენ მათ ვყიდით გახლავთ „სულიერი სიმშვიდე“. ჩვენ არ ვყიდით ეგზოტიკურ ან სარისკო პროდუქტებს – სამაგიეროდ ვირჩევთ გამჭვირვალე და უსაფრთხო პროდუქტებს პოპულარიზაციისთვის. დიდ ქალაქებში დიდი ოფისების ნაცვლად, ჩვენ გვაქვს პატარა ოფისები, რომლებიც განთავსებულია მცირე თემებში, მომხმარებლისთვის მოსახერხებლად. გარდა ამისა, თითოეულ ოფისს მართავს ერთი საინვესტიციო წარმომადგენელი“.
გაითვალისწინეთ, რამდენად თვალსაჩინოა სიტყვა „არა“. ფარმაცევტული ფირმა Roche ანალოგიურად აღწერს თავის გადაწყვეტილებას, ფოკუსირდეს რეცეპტით გაცემულ მედიკამენტებსა და დიაგნოსტიკაზე. ხაზს უსვამს გადაწყვეტილებას არ ჩადოს ინვესტიცია ალტერნატიულ სექტორებში.
სტრატეგიის ამ გზით კომუნიკაცია ადამიანებს საშუალებას აძლევს არა მხოლოდ გააცნობიერონ რა არჩევანი გაკეთდა, არამედ რა ალტერნატივები იქნა გათვალისწინებული თითოეული არჩევანისთვის.
კავშირი მიზანთან
თქვენ უნდა დაუკავშიროთ თქვენი სტრატეგიული გადაწყვეტილებები თქვენი კომპანიის მიზანს. თანამშრომლებისთვის იმის ახსნა, თუ როგორ უკავშირდება თითოეული არჩევანი ორგანიზაციის მიზანს არის კარგი გზა, რომ მათ სწრაფად აღიქვან არჩევანის უკან არსებული ლოგიკა ისე, რომ არ იცოდნენ მსჯელობის სრული დეტალები.
ავიღოთ DPG Media Group, წამყვანი მედია კომპანია ბელგიასა და ნიდერლანდებში, რომელიც ძირითადად ჰოლანდიურ ენაზე წერს. ერთ-ერთ ინტერვიუში, ჯგუფის თავმჯდომარემ, კრისტიან ვან ტილომ, განაცხადა, რომ კომპანიის ვარაუდით, ციფრული ეპოქის მიუხედავად, ხალხი გააგრძელებდა პროფესიონალური მედიის გაცნობას და არა სამოქალაქო ჟურნალისტიკის ან ბლოგების მოსმენას. შედეგად, კომპანიამ თავის სტრატეგიულ მიზნად აიღო მაღალი ხარისხის პროფესიონალური ჟურნალისტიკის მიყოლა. კომპანია ყოველთვის მიყვება ამ მიზანს, როგორც ამოსავალ წერტილს თანამშრომლებისთვის თავისი სტრატეგიული გადაწყვეტილებების ასახსნელად.
ჩართეთ თანამშრომლები სტრატეგიის შემუშავებაში
თანამშრომლების მონაწილეობა და ჩართვა სტრატეგიის პროცესში შეიძლება იყოს ბევრნაირი – იდეებისა და უკუკავშირის მოთხოვნით დაწყებული, სტრატეგიის ბრეინსტორმინგში აქტიური მონაწილეობითა და ახალი სტრატეგიული ინიციატივების ტესტირებით დამთავრებული. მაგალითად, გერმანიის სასმელების მწარმოებელი Premium-Kollektiv საშუალებას აძლევს ნებისმიერ დაინტერესებულ თანამშრომელს გამართოს სტრატეგიული დიალოგი, სრულიად გამჭვირვალე პროცესის მეშვეობით. მას შეუძლია დააყენოს საკითხი ან უპასუხოს კოლექტივის ნებისმიერ წევრს ელექტრონული ფოსტის საშუალებით. შეიძლება შედგეს ცოცხალი დებატებიც. გადაწყვეტილებები კი, დიდწილად, კონსენსუსის გზით მიიღწევა.
სტრატეგიული დიალოგის გაღრმავებასთან ერთად, პროცესში უფრო მეტი თანამშრომელი ერთვება და მათი ჩართულობით უფრო მეტად ხდება ნათელი ის კონტექსტი, რომელშიც შემუშავდა სტრატეგია.
წყარო: HBR
