სწავლობდა კავკასიის ბიზნეს სკოლაში „მარკეტინგის ფაკულტეტზე“, მეორე კურსიდან დაიწყო მუშაობა „McCann-Erickson“–ში, „ექაუნთ მანეჯერად“. ეს მისი პირველი სამუშაო იყო 200 ლარიანი ანაზღაურებით. ამას მოჰყვა: „სტანდარტ ბანკი“, „საქართველოს ბანკი“, „ჯეოსელი“, და „Outdoor.ge–ი“.
რა არის წარმატება თქვენთვის და რაზეა იგი დამოკიდებული?
ზოგადად, დასახული მიზნების 70 %–ს მაინც თუ აღწევ, ეს უკვე წარმატებაა. ვფიქრობ ჯერ–ჯერობით ისეთი წარმატებული არ ვარ, როგორიც მსურს, რომ ვიყო. რა საქმესაც აკეთებ, ის აუცილებლად უნდა გიყვარდეს, წარმატებაც სწორედ ამაზეა დამოკიდებული.
თქვენ კომპანიას ძალიან დიდი ექსკლუზივი აქვს, ფაქტიურად უნიკალური კონკურენტული უპირატესობა გაგაჩნიათ გარე რეკლამაში. მიიჩნევთ თუ არა, რომ Outdoor.ge–ი ბაზრის მონოპოლისტია? და თუ არა ვისთან უწევს „Outdoor.ge“–ს კონკურენცია, ანუ რეკლამის დამკვეთები რა არჩევანის წინაშე დგანან ძირითადად?
Outdoor.ge-ი მონოპოლისტი არანაირად არ არის, ეს გაზვიადებულია, ვფიქრობ ინფორმაციის ნაკლებობის გამო. ბაზარზე არის გარკვეული კომპანიები, რომლებიც ჩვეულებრივად ოპერირებენ, ანუ ჯანსაღი კონკურენციაა. უბრალოდ Outdoor.ge-ი, სხვა კომპანიებთან შედარებით, წინ იმიტომ დგას, რომ ჩვენ სრული მომსახურეობის სერვისის მქონე სარეკლამო სააგენტო ვართ. გვაქვს არა მხოლოდ ბილბორდები და ბეჭდვა, არამედ შეგვიძლია კლიენტს შევთავაზოთ რეკლამა მონიტორებზე, მეტროში, ავტობუსებზე და ბევრი სხვა პროდუქტი, რომელიც ერთობლიობაში სრულ პაკეტს კრავს და აქ მოსულ კლიენტს აღარ უწევს სხვა სერვისის მისაღებად სხვა კომპანიაში მისვლა.
გეგმავს თუ არა კომპანია გარე რეკლამის ახალ ეტაპზე გადაყვანას და რა არის ზუსტად დაგეგმილი (მაგალითად, ახალი ადგილები, მეტი ციფრული რეკლამის შესაძლებლობა, მეტი ლაითბოქსების დამატება და ა.შ)?
იდეაში ვცდილობთ ამის გაკეთებას. ქალაქშიც რომ გაივლით, ნახავთ რაც კი ინოვაციური, ახალი და ლამაზია თითქმის 80% Outdoor.ge-ის შექმნილია. ვცდილობთ მონიტორები განვავითაროთ და ქართული სარეკლამო ბაზარი უფრო ახალ ეტაპზე გადავიყვანოთ.
თუ გამოყოფდით კომპანიებს, რომლებსაც ყველაზე ეფექტური და დასამახსოვრებელი კამპანია ჰქონდა გარე რეკლამის კუთხით?
რეალურად რომ ვთქვათ, დასამახსოვრებელი და კარგი კამპანიები უფრო საერთაშორისო კომპანიებს აქვთ. მაგალითად, როგორიცაა Kraft-ი, Dirol, სიგარეტებში Philip Morris, ასევე Marlboro–ს ერთ–ერთი კამპანია: „მალე, მალე, მალე“ და შემდეგ გამოჩნდა სიგარეტის კოლოფი. ასეთ კამპანიებს აკეთებენ უფრო საერთაშორისო ბრენდები და საქართველოში უკვე დაწერილი მოდის ეს კამპანია.
რას მიიჩნევთ საქართველოში ბიზნესის პრობლემად? პირადად თქვენ რას გააუმჯობესებდით ქართულ ბიზნეს სივრცეში?
რომ შემეძლოს შემოვიყვანდი მეტ ინვესტორს. ქვეყანაში რეალურად გაჩნდებოდა მეტი ფული, იქნებოდა მეტი მოთხოვნა რეკლამაზე და ყველა იქნებოდა ბედნიერი.
რას მიიჩნევთ ყველაზე დიდ მიღწევას ცხოვრებაში?
მყავს შვილი, რომელიც ძალიან მიყვარს და ჩემი ყველაზე დიდი წარმატება ისაა, რომ მყავს პატარა თინა.
რა იყო პირადად თქვენთვის ყველაზე რთული გადაწყვეტილება, რაც ცხოვრებაში მიგიღიათ?
ასეთი ბევრი შემთხვევა იყო. თუმცა ერთ–ერთი შემიძლია გავიხსენო, როდესაც მონიტორების მიმართულებას ვიბარებდით, ფილარმონიასთან დამონტაჟდა ე.წ. „ქართული თაიმ სქვერი“, გადასახადი დიდი იყო, ვალდებულება უნდა აგვეღო, საკმაოდ სარისკო პროექტი კეთდებოდა. გავრისკეთ, ავიღეთ და გაამართლა. მაშინ ეს რთულად მისაღები გადაწყვეტილება იყო, რადგან დიდ რისკს შეიცავდა.
საქართველოში ხშირად გარე რეკლამის განთავსებისას იგნორირებულია რეალობა, ანუ მარკეტერები არ ითვალისწინებენ ბანერის ადგილმდებარეობას და ბანერზე დატანილი ტექსტი ან ვიზუალი უბრალოდ არ აღიქმება. მაგალითად: იმხელა ტექსტი წერია, რომელსაც 60 კმ/სთ–ის მოძრაობისაც ვერ წაიკითხავ, ან ფერია არასწორად შერჩეული, თუ არსებობს რაღაც კრიტერიუმები, რაც უნდა გაითვალისწინონ მარკეტერებმა გარე რეკლამის განთავსებისას?
ისევ და ისევ საერთაშორისო ბრენდებს დავუბრუნდები. რეალურად ბილბორდს აქვს სულ სხვა დატვირთვა. სამწუხაროდ, ბევრ კომპანიას ეს არ ესმის, ანუ ბილბორდზე არ შეიძლება იყოს უზარმაზარი ტექსტი წვრილი შრიფტით დატანებული, ბილბორდი უნდა იყოს მოკლე, კონკრეტული და ეფექტური. ეს ყველაფერი გაკეთებული უნდა იყოს მარტივად და თვალისთვის კარგად აღსაქმელი. თუმცა ბევრი კომპანია ნელ–ნელა ვითარდება და იმედი მაქვს მალე სხვა რეალობას მივიღებთ.
P.S.
რჩევა წარმატების მისაღწევად, რომელსაც Outdoor.ge–ის დირექტორი ბ–ნი კოტე ჭავჭანიძე იძლევა არის: აზარტი, კონკრეტულად დასახული მიზნები, მონდომება.
