in

Advertwise ქართული სტარტაპების გლობალური წარმატებისთვის და Leadin-ის პირველი ტრამპლინი

Startauperi
Startauperi

2020 წელს, Advertwise-ის გუნდმა გადაწყვიტა, საკუთარი ციფრული გამოცდილება (Performance Advertising, Outreach Campaigns, SEO, Web Development) გამოეყენებინა არა მხოლოდ საკუთარი სტარტაპების განვითარებისთვის, არამედ თანამშრომლობა გლობალური პოტენციალის მქონე წამოწყებებთანაც ეწარმოებინა და 40 კაციანი გუნდით – საკმაოდ გამოცდილი რესურსით, საქართველოში დაბადებული სტარტაპების საერთაშორისო წარმატებაზე ეზრუნა. 

სწორედ აქედან იწყება Advertwise-ისა და უძრავი ქონების affiliate გაყიდვების პლატფორმა Leadin-ის ურთიერთობის ამბავიც, როგორც თავად იტყოდნენ, „ახალი გზა და მოგზაურობა მსოფლიოსკენ“.

თუმცა მანამ, სანამ, უშუალოდ, „ლიდინის“ შესახებ დეტალებს გაგიზიარებდეთ, როგორ აგვარებს ქვეყანაში უმნიშვნელოვანეს – დასაქმების პრობლემას და რა მიდგომით იზიდავს დეველოპერებს, მოკლე ექსკურსი „ედვერთაიზის“ საქმიანობასთან დაკავშირებით:

კომპანია Advertwise, ბოლო 2 წელია უკვე, პოზიციონირდება არა როგორც მხოლოდ პერფორმანს მარკეტინგული სააგენტო, რომელიც მზად არის, ლოკალურ და გლობალურ ბაზარზე, ციფრული წყაროების საშუალებით, პარტნიორებს პროდუქტის/სერვისის გაყიდვები გაუზარდოს, არამედ ის სცდება სააგენტოს ფარგლებს და საკუთარ რესურსებს ციფრულ სამყაროში ტექნოლოგიური სტარტაპების შექმნისა და განვითარებისთვის იყენებს (მალე სააგენტო ახალი ბრენდ სახელით წარმოგვიდგება).

2019 და 2020 წლებში, კომპანია 5 სტარტაპზე მუშაობდა, საიდანაც 3 წარმატებული აღმოჩნდა:

  • ტექნოლოგიური სტარტაპი LiveCaller – რომელიც მომხარებლებს საშუალებას აძლევს, პირდაპირ ვებგვერდიდან, მობილური ოპერატორის გარეშე, ონლაინ დაურეკონ სხვადასხვა ბიზნესს. ამ სერვისს უკვე რამდენიმე ქვეყნის 100-მდე კომპანიაში იყენებენ და სტარტაპი, ამ მხრივ, კიდევ იზრდება (იხ. სტატია);
  • ტექნოლოგიური სტარტაპი Keto Diet App – ვებგვერდი/აპლიკაცია, საიდანაც მოხმარებელს შეუძლია, თავისზე მორგებული დიეტა ონლაინ მიიღოს და მიღწეულ შედეგებზე დაყრდნობით, ხელოვნურმა ინტელექტმა ის ავტომატურად განაახლოს. სტარტაპი წარმატებით ოპერირებს ამერიკის ბაზარზე. დაახლოებით, 20 000-მდე ამერიკელი სარგებლობს ამ ვებგვერდითა თუ აპლიკაციით. დაგეგმილია სტარტაპის სხვა ქვეყნებშიც იმავე ტემპით განვითარება;
  • dgiurad.ge – უძრავი ქონების გაქირავების პლატფორმა შიდა და გარე ტურისტებისთვის.

რაც შეეხება Leadin-ს, უძრავი ქონების affiliate გაყიდვების პლატფორმას – „ლიდინის“ მეშვეობით, ნებისმიერ ადამიანს შეუძლია, უძრავი ქონების პოტენციური მყიდველი, ანუ ლიდი უძრავი ქონების დეველოპერთან დააკავშიროს. თუ გაგზავნილმა ლიდმა დეველოპერისგან ბინა შეიძინა, გამგზავნი ბინის ღირებულებიდან საკომისიოს იღებს. ანუ, ერთი მხრივ, თუ „ლიდინის“ კლიენტი დეველოპერული კომპანიები შანსს იღებენ, მათი ბინა ასეულობით ბროკერმა გაყიდოს, მეორე მხრივ, ნებისმიერ ადამიანს შესაძლებლობა აქვს, სოლიდური დამატებითი შემოსავალი, 1500-დან 10 000 ლარამდე, გამოიმუშაოს.

პროცესი ასე გამოიყურება: „ლიდინის“ კლიენტი დეველოპერული კომპანიების გასაყიდი უძრავი ქონება ვებგვერდზე თავსდება. ამის შემდეგ, კომპანია მოტივირებული გამყიდველების მოზიდვას ცდილობს, რომელთა ვებგვერდზე დარეგისტრირებასაც ვერიფიკაციის გავლა და ბროკერის სტატუსის მიღება უნდა მოჰყვეს. შედეგად, ბროკერებს შეუძლიათ, ბინის შეძენით დაინტერესებული ადამიანები მოიძიონ, „ლიდინზე“ განთავსებული ბინები შესთავაზონ და დაინტერესების შემთხვევაში, მათი საკონტაქტო ინფორმაცია კლიენტ დეველოპერულ კომპანიებთან გაგზავნონ. როგორც ზემოთ აღვნიშნეთ, თუ ბინა გაიყიდა, ბროკერი ბინის ღირებულებიდან საკომისიოს იღებს.

Leadin-ის საქმიანობის შესახებ უფრო დაწვრილებით რომ მოგიყვეთ, გთავაზობთ ინტერვიუს მის დამფუძნებელ რატი წეროძესთან:

M: რატი, მოგვიყევი, რა გახდა „ლიდინის“ შექმნის წინაპირობა?
უძრავი ქონების ბაზარი ძალიან საინტერესოა – მზარდია როგორც მოთხოვნა, ასევე მიწოდებაც. საქართველოსა და ბევრ სხვა განვითარებად ქვეყანაში სახლი ერთ-ერთი ყველაზე სასურველი აქტივია ადამიანებისთვის. ბევრი იმისთვის ცხოვრობს, რომ სახლი შეიძინოს. ეს უმნიშვნელოვანესი გადაწყვეტილებაა, რომელიც ალბათ, ემოციურ დონეზე უტოლდება შვილის შეძენას, დაქორწინებასა და სხვა მსგავს ნაბიჯებსა თუ მიღწევებს.

მიუხედავად იმისა, რომ ამ ბაზრებზე მოთხოვნა იზრდება, სხვა ინდუსტრიებთან შედარებით, აქ მაინც ნაკლები ინოვაცია ხდება. უფრო ზუსტად რომ ვთქვათ, მაშინ, როდესაც e-commerce ბიზნესის, პლატფორმებისა და ხელსაწყოების განვითარების ტემპი ძალიან მაღალია, უძრავი ქონების გაყიდვების პროცესში ტექნოლოგიური გადაწყვეტები ნაკლებად გვხვდება. არავინ ყიდულობს სახლს ვებგვერდზე, კალათში დამატებით და სხვა.

სწორედ ამ ყველაფრის გაანალიზების შედეგად, შესაძლებლობა დავინახეთ, ეს პროცესი ბევრად უფრო დინამიკური და მოქნილი გაგვეხადა.

M: როგორ ესაუბრებით ამაზე თქვენს კლიენტებს?
ჩვენს კლიენტებს, ანუ უძრავი ქონების დეველოპერებს ვპირდებით, რომ მათ უძრავ ქონებას ასეულობით ბროკერი გაყიდის. ეს ბროკერები შეაღწევენ მყიდველთა ისეთ ჯგუფებში, რომლებში შესვლაც პირდაპირი რეკლამირების გზით ძალიან რთულია.

როგორც წესი, ნებისმიერი კომპანიისთვის საინტერესოა, როდესაც ვეუბნებით, რომ მათი პროდუქტის გაყიდვაზე 500 ან 1000 ადამიანი იმუშავებს და ამავდროულად, მათ ნული წინასწარი მარკეტინგული ხარჯი ექნებათ.

M: რაც შეეხება გამყიდველებთან თანამშრომლობას… მათთან ხელშეკრულება ფორმდება, თუ როგორ გაქვთ დალაგებული მათთან ურთიერთობის სისტემა?
ჩვენს ვებგვერდზე რეგისტრირებულ მომხმარებლებს ბროკერის სტატუსს ვანიჭებთ. ამ ეტაპზე ნებისმიერ ადამიანს შეუძლია, ჩვენი ბროკერი გახდეს, თუ ის კონკრეტულ პროცედურას გაივლის და ჩვენგან ვერიფიკაციას მიიღებს.

ჩვენი მიზანი გაყიდვების პროცესის დეცენტრალიზაციაა. შესაბამისად, ადამიანებს გვინდა, საშუალება მივცეთ, მარტივად გახდნენ ბროკერები. ამიტომ, არ ფორმდება მათთან ხელშეკრულებები, მთავარი ბროკერის სტატუსის მიღებაა.

M:ედვერთვაიზთან“ თანამშრომლობაზეც რომ ვისაუბროთ… კონკრეტულად, რა ღირებულება აქვს თქვენს პარტნიორობას?
გარდა იმისა, რომ ჩვენ დიდი ხანია, ვმეგობრობთ, „ედვერთვაიზი“ ბიზნესის განვითარების კუთხით, კონკრეტული გადაწყვეტილების მიღებიდან გეგმის უმოკლეს დროში აღსრულების საშუალებას გვაძლევს. კომპანიის გუნდი არაერთი სტარტაპის შექმნაში, ედვერთაიზინგსა და ბიზნესდეველოპმენტში არის ჩართული და ეს გამოცდილება ძალიან მნიშვნელოვანია დამწყები ამბიციური სტარტაპისთვის, ამ შემთხვევაში, „ლიდინისთვის“, რომელსაც გლობალურ ბაზარზე დიდი გეგმები აქვს.

სტარტაპისთვის კრიტიკულად მნიშვნელოვანია, იყოს ეფექტურ გადაწყვეტილებებსა და სწრაფ აღსრულებაზე ორიენტირებული. სწორედ ეს მოაქვს „ედვერთვაიზს“ – ინტელექტუალური რესურსი, გამოცდილება და ტექნოლოგიური შესაძლებლობები.

M: როგორია პანდემიის გავლენა უძრავი ქონების ბაზარზე? რამდენად სწორი ნაბიჯი აღმოჩნდა თქვენი რესურსების ამ კუთხით მომართვა?
პანდემია, რა თქმა უნდა, უძრავი ქონების ბაზარსაც შეეხო, თუმცა ბინებზე მოთხოვნა მაინც არის. როგორც უკვე ვთქვით, ადამიანებისთვის სახლის შეძენა ცხოვრებისეული გადაწყვეტილებაა, შესაბამისად, მასზე სამუდამოდ უარს არასდროს ამბობენ. მაქსიმუმ, ამ მიზნის მიღწევის გადავადება მოუწიოთ.

პირველი შოკის შემდეგ, რაც პანდემიამ ადამიანებზე არა მხოლოდ მატერიალურად, არამედ ფსიქოლოგიურადაც ნეგატიურად იმოქმედა, უძრავი ქონების გაყიდვების დინამიკა გაიზარდა.

გარდა ამისა, პანდემიის პირობებში, ძალიან ბევრი ადამიანი დარჩა უსამსახუროდ, რომლებსაც გაყიდვების კუთხით, ძალიან კარგი უნარები და გამოცდილება აქვთ. მაგალითისთვის, შეგვიძლია, ტურიზმის ინდუსტრია მოვიყვანოთ, რომელშიც ძალიან ბევრი კარგი კადრი იყო დასაქმებული. ჩვენ ამ ადამიანებს ვთავაზობთ, რომ გამოიყენონ, ან სულაც, აღმოაჩინონ თავიანთი შესაძლებლობები და თვეში 2000, 3000 ან 10 000 ლარიც კი გამოიმუშაონ.

ეს ყველაფერი, დიახ, რეალურად შესაძლებელია.

„ლიდინი“ GITA-ს გამარჯვებული სტარტაპია

M: რას გვეტყვით „ლიდინის“ გეგმებზე და რის ხარჯზე მოგიწევთ მათი რეალობაში სრულყოფა?
შაბლონურად შეგვიძლია, ვთქვათ, რომ მიმდინარე გამოწვევა პანდემიაა, თუმცა ვცდილობთ, ეს პერიოდი კლიენტების ბაზის გასაზრდელად გამოვიყენოთ. ლიდინის გეგმაა, 2022 წლისთვის საქართველოს ბაზარს გასცდეს და აღმოსავლეთ ევროპის ქვეყნების უძრავი ქონების ბაზრებზე შევიდეს. ამისთვის კი, სისტემის სრული ავტომატიზება გვჭირდება, ვინაიდან გვსურს, პლატფორმის მუშაობაში ადამიანური ჩარევა, მაქსიმალურად, შევზღუდოთ. 

თავის მხრივ, ამ გეგმას საკმაოდ დიდი ფულადი რესურსიც სჭირდება. ამიტომაც, ადგილობრივ და საზღვარგარეთის ბაზრებზე ინვესტორების მოძიების პროცესი უკვე დაწყებული გვაქვს. 

Leadin, სულ რაღაც 6 თვეა, რაც უძრავი ქონების ბაზარზე გამოჩნდა და ჯერჯერობით, მისი პირველი გამარჯვება GITA-ს 100 000 ლარიანი გრანტის მოპოვებაა, თუმცა თუ მის დამფუძნებელსა და პარტნიორებს დავუჯერებთ, სტარტაპს წინ არაერთი, თანაც საერთაშორისო წარმატება ელის. 

ავტორი: თიკა გეგენავა

წელს “კორპორატიულის” გარეშე არავინ დარჩება! Bright Minds – “კომპანიებს განუმეორებელ ონლაინ საახალწლო ღონისძიებას ვთავაზობთ”

“დაწყება თუ გინდა, რა მნიშვნელობა აქვს, გარშემო რა ხდება?” – მეორე ტალღის დროს გახსნილი რესტორანი “სხივი”