სამეცნიერო კონკურს „ლეონარდო და ვინჩის“ გამარჯვებულები მე-10 კლასის მოსწავლე გოგონები: მილანა გაგულია, მარიამ ბახტაძე, ანა კალანდარიშვილი არიან, სენაკის წმინდა ალექსი შუშანიას სახელობის მართლმადიდებლური სკოლა – გიმნაზიიდან.
15 ნოემბერს, 15:00 საათზე, თიბისი გალერეაში მოსწავლე გამომგონებელთა და მკვლევართა კონკურსის მონაწილეთა პროექტების გამოფენა და გამარჯვებულების დაჯილდოება გაიმართა. კონკურსის მეორე ეტაპისთვის შერჩეული 18 ნამუშევრიდან, StatusDonates-ის სპეციალური სტიპენდია უსინათლოთათვის შექმნილმა უნივერსალურმა მოწყობილობამ მოიპოვა.
ხელსაწყომ სრულყოფილი უნდა გახადოს უსინათლოთა მომსახურება და დაეხმაროს მათ ადაპტაციაში, ისე, რომ ვიზუალური დეფექტების კომპენსაცია მოხდება უსაფრთხო ანალიზატორებით – შეხებითა და მოსმენით. 
მოწყობილობას გააჩნია შემდეგი თვისებები:
- მოწყობილობა რეაგირებს ხმოვან ბრძანებაზე, ირჩევს მედიკამენტს და იძლევა ხმოვან შეტყობინებას მის მიერ შერჩეული მედიკამენტის შესახებ;
- მოწყობილობას შეუძლია შეახსენოს მედიკამენტის დასახელება და მისი მიღების დრო;
- მოწყობილობა ეხმარება პიროვნებას ისეთი წამლების მიღებაში, რომელთა ოდენობა განისაზღვრება წვეთების რაოდენობით: კონკრეტულად, მოახდინოს წვეთების დათვლა და წყლის დოზირება;
- ინოვაციური პროექტია;
- მისი გამოყენება შეუძლია ნებისმიერ პირს;
- სოციალური პროექტია;
- დამზადებულია საქართველოში.
საქართველოს განათლებისა და მეცნიერების სამინისტროს ინიციატივით, „შოთა რუსთაველის ეროვნული სამეცნიერო ფონდი“ 2010 წლიდან უწევს ადმინისტრირებას მოსწავლე გამომგონებელთა და მკვლევართა „ლეონარდო და ვინჩის“ კონკურსს. პროექტის მხარდამჭერია თიბისი.
