მალე LinkedIn-ზე შესაძლებელი ხდება, რომ პოსტის ავტორი მხოლოდ ერთი ადამიანი ან ერთი გვერდი აღარ იყოს. პლატფორმა Collaborative Posts-ის ფუნქციას ამატებს, რომელიც ორ ან მეტ ადამიანს, ასევე LinkedIn Pages-ს, ერთი პოსტის ერთობლივად გამოქვეყნების შესაძლებლობას აძლევს.
ფუნქცია ამჟამად ბეტარეჟიმშია და კრეატორებისა და ბრენდების შეზღუდულ ჯგუფში იტესტება. მისი ფართო გავრცელება მომდევნო თვეებში იგეგმება.
იდეა Instagram-ის Collab Posts-ის მსგავსია.
რა არის LinkedIn Collaborative Post
მთავარი განსხვავება ჩვეულებრივი მონიშვნისგან, ანუ tag/mention-ისგან, ისაა, რომ აქ ყველა მონაწილე თანაავტორად ითვლება და თანაბრად იღებს კრედიტს. პოსტი კი ყველა მონაწილის აუდიტორიაზე ვრცელდება.
ეს ფუნქცია არ უნდა აგვერიოს LinkedIn-ის Collaborative Articles-ში. Collaborative Articles არის პლატფორმის მიერ შემოთავაზებული, AI-ზე დაფუძნებული თემატური მასალები, რომლებშიც მომხმარებლებს კონკრეტულ საკითხზე საკუთარი მოსაზრების დამატება შეუძლიათ. Collaborative Posts კი ჩვეულებრივი პოსტებია, რომელთა თანაავტორებს თავად ირჩევთ.
როგორ მუშაობს LinkedIn-ის Collaborative Posts
პროცესი მოწვევისა და დადასტურების პრინციპით მუშაობს.
ერთი მომხმარებელი ქმნის პოსტს და მასში სხვა პროფილებს ან გვერდებს თანაავტორებად იწვევს. სანამ მოწვეული ანგარიში მოწვევას არ დაადასტურებს, ის პოსტზე თანაავტორად არ გამოჩნდება.
დადასტურების შემდეგ ყველა მონაწილის სახელი პოსტის ზედა ნაწილში ჩნდება და პოსტი თითოეული მათგანის ქსელში ვრცელდება.
LinkedIn Page-ის შემთხვევაში პროცესი ოდნავ განსხვავებულია. გვერდთან დაკავშირებული Super Admin-ის ჩართულობაა საჭირო. მას შეუძლია გვერდისთვის თანამშრომლობის ფუნქციის მართვა, მათ შორის სხვა მომხმარებლებისა და გვერდებისგან მიღებული მოწვევების დადასტურება.
თანამშრომლობის შესახებ შეტყობინებების ჩართვა შესაძლებელია Settings → Notifications → Collaborations განყოფილებიდან.
როგორ შევქმნათ Collaborative Post
პოსტის შექმნა ჩვეულებრივად იწყება. ზედა პანელში უნდა მოძებნოთ თანაავტორის დამატების შესაძლებლობა და სასურველი პროფილი ან გვერდი მოიწვიოთ. ერთ პოსტზე შესაძლებელია ხუთამდე დამატებითი თანაავტორის დამატება.
ფუნქციის გამოყენებამდე კი რამდენიმე საკითხის გათვალისწინება ღირს:
- შეარჩიეთ სწორი თანაავტორი – იქნება ეს კრეატორი, ბრენდი თუ LinkedIn Page, რომლის სახელის თქვენს გვერდით გამოჩენაც ნამდვილად ღირებულია;
- მოაწესრიგეთ პროფილი – Collaborative Post-ს შეუძლია ახალი აუდიტორია მოიყვანოს თქვენს პროფილზე, ამიტომ მნიშვნელოვანია, რომ პროფილის სათაური, ბანერი და ბოლო პოსტები იმ შთაბეჭდილებას ქმნიდეს, რომლის დატოვებაც გსურთ;
- შექმენით ისეთი კონტენტი, რომლის გაზიარებაც ღირს – ფუნქცია პოსტის გავრცელების მასშტაბს ზრდის, მაგრამ თავად კონტენტს უკეთესს ვერ გახდის.
რატომ არის ეს განსაკუთრებით მნიშვნელოვანი კრეატორებისა და ბრენდებისთვის
Collaborative Posts მხოლოდ დამატებითი reach-ის მიღების ინსტრუმენტი არ არის. ის ბრენდსა და კრეატორს შორის ურთიერთობასაც ცვლის. როდესაც კრეატორი ბრენდის გვერდთან ერთად ქმნის პოსტს, ამით ორივე მხარე იღებს სარგებელს – კრეატორს მოჰყავს აუდიტორია, რომელიც უკვე იცნობს და ენდობა მის კონტენტს, ბრენდი კი კრეატორს საკუთარ ავტორიტეტსა და საჯარო მხარდაჭერას სთავაზობს, რადგან მისი სახელი კრეატორის სახელთან ერთად ჩანს.
ამ თვალსაზრისით, Collaborative Post უბრალო მონიშვნაზე მეტია. განსაკუთრებით LinkedIn-ზე, სადაც პროფესიული რეპუტაცია პლატფორმის მთავარი ღირებულებების ნაწილია.
ამავე დროს, ასეთი პოსტი განსხვავდება ჩვეულებრივი sponsored content-ისგანაც. აქ ბრენდი უბრალოდ კრეატორის აუდიტორიას არ იყენებს კონკრეტული კამპანიისთვის ორივე მხარის სახელი, აუდიტორია და რეპუტაცია ერთ პოსტში ერთიანდება.
