გაყიდვები საკმაოდ რთული სფეროა, ვინაიდან მომხმარებლებს ისე უნდა მიყიდოთ რაღაც, თითქოს თქვენი მიზანი ეს სულაც არ არის. განსაკუთრებით სოციალურ ქსელებში ყველაფერი ერთგვარ შეფარულ კულტურას ეფუძნება — თუ ადამიანს ეტყვით, რომ პირადად მასზე გინდათ რაღაცის გაყიდვა, უნდობლობის განცდა მეტად იჩენს თავს. ასე ვთქვათ, ამ სივრცეში თქვენ უბრალოდ უნდა არსებობდეთ და თავისთავად იზიდავდეთ ხალხს, „უხეში გაყიდვების“ გარეშე…
სტატიაში უშუალოდ LinkedIn-ის მაგალითს განვიხილავთ, რომელიც ერთ-ერთი საუკეთესოა ხალხთან პროფესიული თვალსაზრისით დასაკავშირებლად. „გასული წლის განმავლობაში ლინკდინზე ყოველდღიურად რაღაცის გამოქვეყნების რეჟიმზე გადავერთე. ჩემი მიზანი ქსელის გაფართოება, პოტენციური პარტნიორებისა და თანამშრომლების მოძიება იყო, რასაც ბუნებრივად ებმოდა ახალ შესაძლებლობებზე ფიქრი. მართალია, მალევე ჩემი გამომწერების რაოდენობამ 1300-ს მიაღწია, მაგრამ იმედგაცრუებამაც იმატა“, — ამბობს ხუან ფერნანდესი, ერთ-ერთი კომპანიის აღმასრულებელი დირექტორი.
ეს იმედგაცრუება კი სწორედ გაყიდვების თემას უკავშირდება. როგორც ამბობს, ძალიან ხშირად იღებდა ერთგვარ სპამ შეტყობინებებს, რომლებიც პირდაპირ გაყიდვაზე იყო ორიენტირებული. მაგალითად: „მე შემიძლია შენი დახმარება, რათა მეტი კლიენტი მოიზიდო. იცი, როგორი შეგრძნებაა, როცა ყოველთვიურად 30-დან 50-მდე ახალი მომხმარებელი გემატება?“ ან „გილოცავთ ახალ როლს! მოდით თქვენს საპენსიო გეგმებზე ვისაუბროთ, რათა დავრწმუნდეთ, რომ სწორ გზას ადგახართ!“
იყო ისეთებიც, რომლებიც საუბრის დაწყების ნამდვილ მცდელობად ჩაითვლებოდა, მაგრამ მაინც ეტყობოდა. შედეგად, შეტყობინების ადრესატსა და გამგზავნს შორის კავშირი ვერ მყარდება. სტივენ ბარტლეტმა თავის წიგნში The Diary of a CEO: The 33 Laws for Business and Life ერთ-ერთ დიდ გლობალურ B2B კომპანიას ოქროს რჩევა გაუზიარა: „შეწყვიტეთ საკუთარი თავისთვის გამყიდველის დაძახება. ამის ნაცვლად, პარტნიორებად პოზიციონირდით. მიზანი იგივე დარჩება, აღქმა კი შეიცვლება“.
როგორც წიგნის ავტორი განმარტავს, მთავარი საიდუმლო სიტყვებით თამაშშია. თუ გაყიდვებს ახსენებთ, ადამიანები შეურაცხყოფილად იგრძნობენ თავს — თითქოს, ძალით უნდა მიყიდოთ ის, რაც არ სურთ. ხოლო პირიქით, ჩარჩოს მიღმა არსებული სიტყვა „პარტნიორი“ იმაზე მიუთითებს, რომ ინდივიდი უბრალოდ თქვენი გუნდის ნაწილი ხდება. ეს მიზნის ცვლილებას სულაც არ გულისხმობს, უბრალოდ მეტად დაუახლოვდებით პოტენციურ მომხმარებლებს — ასე ვთქვათ, ზოგჯერ ნაკლები მცდელობა მეტი შედეგის ტოლფასია.
ამიტომაც, თუ LinkedIn-ს იყენებთ, როგორც ბიზნეს ინსტრუმენტს, ზოგჯერ თავშეკავება შეიძლება უდიდესი წინგადადგმული ნაბიჯი იყოს. აღნიშნულ პლატფორმაზე შექმნილი ანგარიში ერთგვარ მისასალმებელ შესავალს უნდა წარმოადგენდეს პროფესიულ ცხოვრებაში — ნაცვლად იმისა, რომ ნეონის ნიშანივით ყვიროდეს, გაყიდვებისკენ ვარ მომართულიო…
როდესაც თქვენი თითოეული პოსტი იმისკენაა მიმართული, რომ გაყიდვებზე ხართ ორიენტირებული, სავარაუდოდ, ბევრ უარყოფით პასუხს მიიღებთ — ან უარესს, დუმილს. მეორე მხრივ, თუ თქვენი პროფილი და აქტივობები პირველ რიგში გულწრფელ ნდობას შეესაბამება, LinkedIn გახდება შესანიშნავი პლატფორმა ახალი, საინტერესო ადამიანების შესახვედრად და ბიზნესის განსავითარებლად. ხოლო შეტყობინებების გაგზავნამდე კარგად დააკვირდით, მეტისმეტად პირდაპირი ტონი არ გქონდეთ. „გაგიჭირდებათ მომხმარებლების საფუძვლიანად გაგება, თუ გონება მხოლოდ საჭიროებებზე ფიქრით გაქვთ დაკავებული. მაგალითად, როცა იმაზე ფიქრობთ, რამდენად გჭირდებათ ფული და ვერანაირად გაუშვებთ ხელიდან კლიენტს, სასოწარკვეთილ არსებად იქცევით, რომელიც ყველაფერზე თანახმაა“, — აღნიშნავს ბარტლეტი.
წყარო: Inc.
