პირველი სამსახური 18 წლის ასაკში დავიწყე – ჰიდროელექტროსადგურების ფინანსური ანალიტიკოსი გავხდი. კომპანიაში სტაჟირების პროგრამაზე ძალების ცდა მეგობარმა მირჩია. ჯერ კიდევ სტუდენტი ვიყავი, დიდი ენთუზიაზმითა და სურვილით, რომ პირველი კარიერული ნაბიჯები გადამედგა. სწავლის პარალელურად, ყოველ დილით 9 საათზე ჟინვალში მივდიოდი. ჟინვალის ჰესში ჩემს პასუხისმგებლობაში სხვადასხვა პროექტის ფინანსური ანალიზი – სულ დაახლოებით 500 გვერდიანი დოკუმენტაციის დამუშავება და ანგარიშების მომზადება შედიოდა.
სწორედ იქ დავინახე, რამდენად მნიშვნელოვანია გარემო და ის ადამიანები, ვისთანაც მუშაობ. ყოველდღიური ურთიერთობა გამოცდილ პროფესიონალებთან არა მხოლოდ ცოდნას გაძლევს, არამედ აყალიბებს შენს პროფესიულ ღირებულებებსა და მიდგომებს. მჯერა, რომ კარგი მენტორები და კოლეგები საქმიანობაში ერთ-ერთი უმნიშვნელოვანესი ფაქტორია.
ამავდროულად, პირველი დიდი გამოწვევაც ეს გახლდათ – ძალიან გამოცდილ, ასაკით ბევრად უფროს ადამიანებთან თანამშრომლობა, იმდენად დიდი იყო მათი გამოცდილება და ცოდნა. თუმცა, ეს გამოწვევები ფასდაუდებელი აღმოჩნდა. ეს გამოცდილება დამეხმარა ის ცოდნა, რასაც მათგან ვიღებდი, თანამედროვე ტექნოლოგიებსა და მიდგომებში გადმომეტანა. ვისწავლე, როგორ მომესმინა გამოცდილი კოლეგებისთვის, მაგრამ ამავდროულად, გამებედა ჩემი იდეების წარდგენა. მათი ტრადიციული ცოდნა და ჩემი ახალგაზრდული ენერგია ქმნიდა სინერგიას, რომელიც უკეთეს შედეგებს იძლეოდა.
ფაქტობრივად, ჩემი კარიერის პირველი ხუთი წელი მთლიანად სწავლასა და საუბარში გავატარე – ადამიანებისგან გამოცდილების მიღებასა და საკუთარი ხედვის ჩამოყალიბებაში. ტექნიკური უნარების შეძენის გარდა, ეს პროფესიული იდენტობის ფორმირებაც იყო. ყოველი პროექტი და გამოწვევა მაძლევდა შანსს, მეტი მესწავლა არა მხოლოდ სამუშაოს, არამედ საკუთარი თავის შესახებაც.
დღემდე მახსოვს ის პერიოდი, როგორც საფუძველი, რომელმაც შემასწავლა, რომ ნებისმიერი კარიერა იწყება პატარა ნაბიჯებით, სადაც მოთმინება და შრომა მთავარ როლს ასრულებს. ჟინვალში გატარებული დღეები, ის უამრავი საათი, რომელიც დოკუმენტაციის ანალიზში გავატარე, საუბრები უფროს კოლეგებთან – ყველაფერი ეს შეუცვლელი გამოცდილება აღმოჩნდა, რომელმაც ჩამოაყალიბა ჩემი პროფესიული ეთიკა და სამუშაოსადმი დამოკიდებულება.
დღეს, უკვე სრულიად სხვა ინდუსტრიაში ვაგრძელებ მუშაობას და ჩემი ამჟამინდელი პოზიციაა Chief Production Officer, SmartSoft Gaming-ში – სადაც სწორედ იმ პირველმა გამოცდილებამ დამიხვედრა გზა სწორი გადაწყვეტილებებისკენ. თამაშების ინდუსტრია რადიკალურად განსხვავდება ენერგოსექტორისგან, მაგრამ იქ შეძენილი ანალიტიკური უნარები, პრობლემების გადაჭრის მეთოდები და რაც მთავარია, ადამიანებთან ურთიერთობის გამოცდილება კვლავ უდიდეს როლს თამაშობს ჩემს ყოველდღიურ საქმიანობაში.
ლუკა ქობალია – SmartSoft Gaming-ის აღმასრულებელი ფროდაქშენ დირექტორი.
