როდესაც ადამიანები მიჯაჭვულები არიან ახალ ამბებს, მათი მართვა განსაკუთრებით რთული შეიძლება იყოს. 2020 წელს, აშშ-ში არჩევნების შედეგების გამოცხადებას რამდენიმე დღე დასჭირდა. ბევრს გემახსოვრებათ გუნდის წევრები, რომლებსაც უჭირდათ ძილი და სამუშაოზე კონცენტრაცია. არაერთ ხელმძღვანელს დასჭირდა ასეთ რთულ პერიოდში თანამშრომლების მხარდაჭერა, იმ პირობებში, როდესაც თავად სჭირდებოდათ საყრდენის პოვნა.
ემოციურად დატვირთულ გარემოში, სადაც შფოთვა მაღალია, საუკეთესო მენეჯერები იღებენ უფრო მოქნილ და გააზრებულ ხელმძღვანელობის სტილს. გაგაცნობთ სტრატეგიებს, რომელთა გამოყენებაც ლიდერებს შეუძლიათ, რათა თავიანთ გუნდებს ემოციური კვირის სირთულეების გადალახვაში დაეხმარონ.
მოერიდეთ შფოთვით გამოწვეულ „გამოსწორების“ მცდელობებს
როდესაც ახალი ამბები სტრესულია, მენეჯერის საქმეა უზრუნველყოს, რომ სამუშაო არ გახდეს სტრესის დამატებითი წყარო. ხშირად, ღრმა სუნთქვის ნაცვლად, აფორიაქებული მენეჯერი პანიკურად იწყებს მოქმედებას, თანამშრომლებს შეტყობინებებით ავსებს და უცებ იწყებს ყველა მიმდინარე სამუშაო პროცესის მიკრომენეჯმენტს.
როდესაც მომავალი გაურკვეველია, უფრო მეტად ვართ მიდრეკილნი ზედმეტი დავალებებისა და პასუხისმგებლობების აღებისკენ. ეს არის არაჯანსაღი მცდელობა ვიგრძნოთ, რომ მეტად ვაკონტროლებთ სიტუაციას. ეს მხოლოდ დამატებით გამოფიტვასა და სტრესს იწვევს. ეს თანამშრომლებისთვის ცხოვრებას აუტანელს ხდის სწორედ მაშინ, როცა სტაბილურობა სჭირდებათ. თანამშრომლების ელ-ფოსტითა თუ სხვა შეტყობინებებით გადატვირთვა ასევე ზრდის გაუგებრობების ალბათობას: მათი 64% ამბობს, რომ დროს კარგავს კოლეგების წერილობითი შეტყობინებების ინტერპრეტაციაში.
ესაუბრეთ მაშინაც კი, როცა არაფერი იცვლება
არასაჭირო შფოთვის სპირალების თავიდან ასაცილებლად, იყავით რაც შეიძლება გამჭვირვალე, თუნდაც ეს ნიშნავდეს იმის შეტყობინებას, რომ ახალი არაფერი გაქვთ სათქმელი. სავარაუდოა, რომ პროექტები უფრო ნელა წავა არჩევნების კვირაში და ჩვეულებრივზე მეტ ხანს მოგიწევთ ლოდინი თქვენს კითხვებზე პასუხის მისაღებად. აცნობეთ ეს თქვენს გუნდს.
მაგალითად, ვთქვათ ხელმძღვანელობთ შიდა პროექტის კროს-ფუნქციურ გუნდს. პასუხისმგებელი ხართ შიდა გამოკითხვის ჩატარებაზე უკუკავშირის მისაღებად და თანამშრომლებს დაჰპირდით, რომ მიაწვდიდით გამოკითხვის მონაცემებს, რათა განესაზღვრათ რა მიმართულებით წასულიყვნენ. ახლა არჩევნების კვირაა და ყველა, ვინც გამოკითხვა უნდა შეავსოს, გაფანტულია. გაჩუმების ნაცვლად, მიაწოდეთ განახლება თქვენს გუნდს გამოკითხვის დაუსრულებლობის მიზეზისა და მისი დასრულების სავარაუდო თარიღის შესახებ.
დაეხმარეთ ადამიანებს სტაბილურობის შეგრძნებაში
პრიორიტეტების შესახებ მკაფიო მითითებები ამცირებს გაუგებრობას და თქვენს გუნდს პროგრესის შენარჩუნებაში ეხმარება. თუ ყველამ იცის ორი-სამი რამ, რაც იმ კვირაში უნდა გააკეთოს, უფრო სავარაუდოა, რომ იმუშავებენ ამ მნიშვნელოვან საკითხებზე. როდესაც არ სთავაზობთ მკაფიო გზას წინ, ადამიანები თავს აბნეულად იგრძნობენ და უფრო მეტად მიდრეკილნი იქნებიან არასაჩქარო, ნაკლებად მნიშვნელოვანი დავალებების პრიორიტეტიზებისკენ. თქვენი მიზანია თავიდან აიცილოთ ძვირფასი ენერგიისა და ფოკუსის ფუჭად დახარჯვა, ამიტომ გაუადვილეთ გუნდის წევრებს კონცენტრირება იმ დავალებებზე, რომლებიც თქვენთვის ყველაზე მნიშვნელოვანია.
ყოველ დილით შეამოწმეთ ახალი ამბები, რათა მზად იყოთ თქვენს გუნდში წარმოქმნილი ემოციებისთვის
პოლიტიკურ ცვლილებებს, გლობალურ სიტუაციებსა და ეკონომიკურ პირობებს შეუძლია ღრმა გავლენა მოახდინოს არა მხოლოდ თქვენს ინდუსტრიაზე, არამედ თქვენი გუნდის წევრების ფსიქიკურ ჯანმრთელობაზეც. იმის უზრუნველყოფით, რომ იცოდეთ რა ხდება მსოფლიოში, შეგიძლიათ წინასწარ განჭვრიტოთ, როდის შეიძლება თქვენი გუნდი მოვიდეს სამსახურში გაფანტული. მზად იყავით უპასუხოთ ნებისმიერ კითხვას, რაც შეიძლება თქვენს გუნდს ჰქონდეს. ასევე შეგიძლიათ განიხილოთ სამუშაო დატვირთვის კორექტირება, მხარდაჭერის შეთავაზება პირისპირ შეხვედრებზე და საკუთარი ემოციების გაზიარება გუნდურ შეხვედრაზე.
ასევე სასარგებლო შეიძლება იყოს HR-თან თანამშრომლობა ამ პერიოდში, რათა იცოდეთ, რომელ ორგანიზაციულ რესურსებზე შეგიძლიათ გქონდეთ ორიენტირი, როგორიცაა ფსიქიკური ჯანმრთელობის მხარდაჭერა ან თანამშრომელთა რესურს ჯგუფები, რომლებიც უსაფრთხო სივრცეებს უზრუნველყოფენ გამოცდილებისა და რჩევების გასაზიარებლად.
წყარო: HBR
