Frida Baby არის მაგალითი იმისა, როგორ შეიძლება ბრენდის უშუალო კომუნიკაციამ ზღვარს გადააბიჯოს. კომპანია, რომელიც 2014 წელს ბავშვთა პროდუქციით დაისტარტა, თავიდანვე იყენებდა სუფთა, ხალისიან ტონს, რომელიც ეხმიანებოდა მშობელთა რეალურ ყოველდღიურობას.
ბრენდის კომუნიკაცია ხშირად იყენებდა იუმორს, აღიარებდა, რომ მშობლობა შეიძლება ასოცირდებოდეს ჭუჭყთან, დაღლილობასთან, და რომ ამაზე გაცინება მშობლებს მსუბუქ შვებას გვგვრის, გვაგრძნობინებს, რომ მარტო არ ვართ. Frida Baby ასევე ასახავდა სოციალურ სტანდარტებს და არაეთიკურ ნორმებს აკრიტიკებდა. ბოლო წლებში ბრენდი ხაზგასმით აჩვენებდა, რომ სიშიშვლე, ერთი შეხედვით, ჩვეულებრივ ჩანს რეკლამებსა და სოციალურ ქსელებში, მაგრამ, როდესაც დედა ბავშვს აჭმევს, ეს ბევრისთვის სკანდალური ხდება.
ბოლო პერიოდში კი აღშფოთება თავად ბრენდის მიმართ წამოვიდა, სოციალურ ქსელებში გამოქვეყნებულ პოსტებზე, სადაც სექსუალური ტიპის გზავნილები იქნა დატანილი. ეს წარწერები და იუმორისტული ფრაზები შექმნილია იმისთვის, რომ მშობლებისთვის რუტინა თითქოს გაეხალისებინათ, თუმცა სექსუალური კონოტაციები ბავშვთა პროდუქტებთან ერთად, ბევრისთვის არასასურველი აღმოჩნდა. სოციალური ქსელებისა და მშობელთა ფორუმების მომხმარებლებმა სწრაფად გამოხატეს პროტესტი და რამდენიმე საათში გამოჩნდა მოწოდება, ბოიკოტი გამოეცხადებინათ Frida Baby-ს პროდუქციისთვის.
თავის მხრივ, Frida Baby-ს რეაქციამაც დიდად ვერ შეძლო სიტუაციის მართვა. კომპანიამ თავიდან არ გასცა გამპროტესტებლებს ოფიციალური პასუხი, დაიწყო ძველი პოსტების წაშლა სოციალურ ქსელში და ვებსაიტიდან ამოიღო „გაიცანით გუნდის“ გვერდი.
ბრენდის საბოლოო განცხადებით აღინიშნა, რომ მათ კომუნიკაციაში იუმორი თავიდანვე გამოიყენებოდა მშობლების ყოველდღიური სტრესის გასანეიტრალებლად. მათი თქმით, პროდუქტი ბავშვებისთვისაა, თუმცა ტონი ყოველთვის უფროსებზე იყო მიმართული.
მიუხედავად ამისა, კომპანია აღიარებს, რომ იუმორი სუბიექტურია – რაც ერთ მშობელს სასაცილოდ ეჩვენება, მეორისთვის შეიძლება ზედმეტად მძიმე იყოს. მათ განმარტეს, რომ არასდროს ჰქონიათ მიზნად ვინმეს შეურაცხყოფა ან შოკის გამოწვევა, ხოლო იუმორი ყოველთვის დაკავშირებული იყო კონკრეტულ პროდუქტის ფუნქციასთან.
რა შეიძლება ისწავლონ კრეატორებმა ამ მაგალითით
რაც დრო გადის, ბრენდები სულ უფრო ხშირად იყენებენ არაოფიციალურ, ირონიულ ტონს, რათა ახალგაზრდები მიიზიდონ. ამის მაგალითია Ryan Air-ის ირონია, DuoLingo-ს სახალისო შეძახილები, Oatly-ს უცნაური იუმორი და სხვა. Frida Baby აჩვენებს, რომ პირდაპირმა კომუნიკაციამ შეიძლება ტაბუები მოხსნას და მომხმარებელთან ახლო კავშირი შექმნას.
მაგრამ ბოლოდროინდელი სკანდალი აჩვენებს, რომ არსებობს ზღვარი. ყველა ხუმრობა, რომელიც მეგობრებს შორის გასაგებია, სამომხმარებლო ბრენდის მესიჯებისთვის უსაფრთხო არ არის. კონტექსტი ძალიან მნიშვნელოვანია.
გარდა ამისა, ბრენდს უნდა ჰქონდეს გეგმა, თუ რა უნდა გააკეთოს უკუკავშირის დროს. პოსტების მოულოდნელმა წაშლამ შეიძლება ბევრად ცუდი შთაბეჭდილება დატოვოს.
ზოგჯერ ირონია და ხალისიანი კომუნიკაცია ძალიან კარგად მუშაობს Gen Z და Millennials აუდიტორიაზე – ისინი აფასებენ იუმორსა და რეალობას. Frida Baby-ს ეს კომუნიკაცია უნდა ყოფილიყო ახალი და სახალისო, თუმცა ზედმეტი იუმორი პროდუქტის კონტექსტში პრობლემური აღმოჩნდა და გადაფარა ბრენდის კარგი ინიციატივები.
