მარკეტინგი ტექნოლოგიებზეა დაფუძნებული, მაგრამ სადღაც, გზადაგზა, სამუშაოს გასამარტივებლად გამიზნულმა ინსტრუმენტებმა ჩვენი ტემპის შენელება დაიწყო. ის, რაც კრეატიულობის გასაღვივებლად იყო შექმნილი, ახლა ხშირად საპირისპიროდაც მოქმედებს.
ზოგჯერ იმდენი ინსტრუმენტი და იმდენი პლატფორმის გამოყენებაა ერთი სამუშაოს შესასრულებლად საჭირო, რომ სანამ მუშაობას დაიწყებ, იქამდე იღლები. უნდა შეხვიდე CRM-ში, ანალიტიკაში, დიზაინის გუნდთან საკოლაბორაციოდ Figma-ს მსგავს ხელსაწყოებში, აღარაფერს ვამბობთ ელფოსტის ყოველწამს გახსნაზე…
დღეს მარკეტინგული ტექნოლოგიების სფერო უზარმაზარია. ის, რაც რამდენიმე ასეული გადაწყვეტით დაიწყო, 15,384 სპეციალიზებულ ინსტრუმენტად იქცა, რომელთაგან თითოეული კონკრეტული პრობლემის გადაჭრას ან ახალი შესაძლებლობების გახსნას გვპირდება. მარკეტინგული ტექნოლოგიების ნაკრები ერთგვარი სტატუსის სიმბოლოდ იქცა კომპანიებისთვის. თუმცა, სადღაც გზაში, ჩვენ შევწყვიტეთ კითხვის დასმა, ნამდვილად ნიშნავდა თუ არა მეტი ინსტრუმენტი უკეთეს მარკეტინგს.
რას ნიშნავს „ჩუმი” მარკეტინგული ტექნოლოგია
მარკეტერები გვეუბნებიან, რომ ახლა ჩუმი მარკეტინგული ტექნოლოგიის ეპოქაა, რა დროსაც გუნდები იწყებენ გაცნობიერებას, რომ სიმარტივე შესაძლოა ყველაზე დახვეწილი სტრატეგია იყოს.
ბრენდები, რომლებიც ამას სწორად აკეთებენ, ახალი ინსტრუმენტების დამატებამდე უფრო სიღრმისეულ კითხვებს სვამენ:
- ნამდვილად წყვეტს ეს ჩვენს პრობლემას?
- შეგვიძლია შედეგის მიღწევა უკვე არსებულის უკეთ გამოყენებით?
- რა დაჯდება ტრენინგის, ტექნიკური მომსახურებისა და ინტეგრაციის ჩართვა?
თანამედროვე კვლევები აჩვენებს, რომ იმ მარკეტინგულმა გუნდებმა, რომლებმაც მხოლოდ საჭირო ინსტრუმენტების გამოყენება დაიწყეს და მიზნობრივად გაწერეს გეგმა, თუ სად და რაში სჭირდებოდათ ციფრული ტექნოლოგიები, ბევრად მეტ წარმატებას მიაღწიეს, კამპანიები უფრო თანმიმდევრული გახდა, იკლო გუნდის სტრესის დონემ და ბაზარზეც უფრო სწორად დაპოზიციონერდნენ.
ინტელექტი, რომელიც ჩუმად მუშაობს
როდესაც მარკეტინგი ხელოვნურ ინტელექტს იყენებს და გუნდსა თუ მომხმარებელს, კარგ შედეგს ჰპირდება, აუცილებელია, ამ ინტელექტმა ჩუმად, კულისებში იმუშაოს და საქმე ისე აკეთოს, რომ ახალი თავსატკივარი არ გააჩინოს.
ინტელექტმა ისე უნდა მოაგროვოს მონაცემები, რომ ამაზე დამატებითი დრო არ დაიხარჯოს, არ შეეხოს პერსონალურ ინფორმაციას და ოპტიმიზაცია უნდა გაუკეთოს მხოლოდ იმ მონაცემებს, რომლებიც რეალურადაა საჭირო.
ამ ყველაფრის მისაღწევად არა კონკრეტული ხელსაწყოს, არამედ აზროვნების შეცვლაა საჭირო. მარკეტინგის ლიდერებს მეტი კვლევა სჭირდებათ, რათა უარი თქვან მხოლოდ მოდის გამო რაღაც ხელსაწყოების დამატებაზე, ხოლო გუნდის წევრებს დრო სჭირდებათ, რომ დაეუფლონ უკვე არსებულ პლატფორმებს, ახლის მუდმივად დანერგვის ნაცვლად.
რაღაცების რთულად კეთება ზოგჯერ უფრო მარტივია. პარადოქსულად ჟღერს, მაგრამ თუ გავიაზრებთ, ასეა. ნებისმიერს შეუძლია დაამატოს კიდევ ერთი ინსტრუმენტი, კიდევ ერთი პროცესი, კიდევ ერთი ფენა დაადოს თავის ყოველდღიურ სამუშაო პროცესებს. გამარტივება კი მოითხოვს დისციპლინას, მკაფიო პრიორიტეტებსა და გამბედაობას, რომ უარი თქვა იმაზე, რაც, უბრალოდ, არ გჭირდება.
დღეს უკვე, როცა ორგანიზაციები სხვადასხვა ფორუმსა თუ ღონისძიებაზე განიხილავენ თავიანთ სამუშაო პროცესებს, იმაზე საუბრობენ, რა უნდა დატოვონ და რომელი ტექნოლოგია უნდა ამოიღონ. თემა კითხვიდან „კიდევ რა გვჭირდება?” გადავიდა კითხვაზე „რისი გაერთიანება შეგვიძლია?”
ამ მიდგომის შედეგები კი თავის სიტყვას თვითონვე ამბობს: ფოკუსირებული გუნდები, უფრო ძლიერი კამპანიები და ბედნიერი ადამიანები. მარკეტერების პროგნოზი ასეთია, რომ უახლოეს წლებში გამორჩეული კომპანიები ისინი კი არ იქნებიან, ვინც ყველაზე მეტ ტექნოლოგიას იყენებს, არამედ ისინი, ვინც მხოლოდ საჭირო ინსტრუმენტებს დანერგავენ და მისცემენ საშუალებას ამ ტექნოლოგიას, თავისით გააკეთოს საქმე, ადამიანებისგან დამატებითი დროის დათმობის გარეშე.
