Maserati – სახელი, რომლის გაგონებაც გიღვიძებთ აღფრთოვანებას. დღეს, ეს ბრენდი იტალიური საავტომობილო გენიის უსაზღვრო პოტენციალს გამოხატავს, თუმცა წარმოიდგინეთ ბოლონიის პატარა სახელოსნო, სადაც 1914 წლის 1 დეკემბერს სამი ძმის ოცნებამ დასაბამი მისცა ლეგენდას, რომელიც დღეს მსოფლიო ფუფუნების ავტომობილების სიმბოლოდ არის ქცეული. სანამ თქვენ დილის გემრიელ ყავას იმზადებთ, ჩვენ Maserati-ზე მოგიყვებით.
ნეპტუნის სამკაპით შთაგონებული ლოგო – Maserati-ს საფირმო ნიშანი, არ არის შემთხვევით შერჩეული სიმბოლო. ის წარმოადგენს ძალას, სიზუსტეს და იმ უდრეკ სულისკვეთებას, რომელმაც ბრენდი საუკუნის მანძილზე წინ წაიყვანა. ალფიერი, ეტორე და ერნესტო მაზერატების ხედვა სცდებოდა უბრალოდ ავტომობილების წარმოებას – მათ სურდათ შეექმნათ ხელოვნების ნიმუში. 1920-იან წლებში ძმები მაზერატები ძირითადად სხვა კომპანიებისთვის მუშაობდნენ. ისინი საავტომობილო ნაწილებს აწარმოებდნენ და სარბოლო ავტომობილებს აუმჯობესებდნენ. თუმცა, ალფიერ მაზერატის ხელმძღვანელობით გადაწყვიტეს, რომ დრო მოვიდა საკუთარი ავტომობილი შეექმნათ. მათი მიზანი იყო ისეთი მანქანის გამოგონება, რომელიც არა მხოლოდ სარბოლო ტრასებზე იქნებოდა წარმატებული, არამედ საკუთარ სახელს მსოფლიოს გააცნობდა.
ბრენდისთვის გარდამტეხი მომენტი დადგა 1926 წელს, როდესაც მისმა Tipo 26-მა Targa Florio-ს რბოლაში გაიმარჯვა. ეს არ იყო მხოლოდ გამარჯვება, არამედ იმ მემკვიდრეობის დასაწყისი, რომელიც დღემდე გრძელდება. ეს იყო განუზომელი აღფრთოვანება და ენთუზიაზმი, რაც ამ მომენტმა გამოიწვია იტალიურ საზოგადოებაში. ასევე, ბრენდის ისტორიაში აღსანიშნავია 1937 წელი, როდესაც ბრენდმა მოდენაში გადაინაცვლა – ქალაქში, რომელიც იტალიური საავტომობილო ინდუსტრიის გულად იქცა.
1957 წელს, ხუან მანუელ ფანხიოს ლეგენდარულმა გამარჯვებამ Maserati 250F-ით Formula 1-ში კიდევ ერთხელ დაადასტურა ბრენდის რეპუტაცია. მთელმა მსოფლიომ დაინახა Maserati-ს ჭეშმარიტი პოტენციალი. 1960-იანი წლები კი ახალი ერის დასაწყისი გახდა. ამ დროს შეიქმნა Quattroporte – პრემიალური კლასის სპორტული სედანი, რომელმაც სრულიად ახალი სტანდარტი დაამკვიდრა ამ სეგმენტში.
დღესდღეობით, Stellantis-ის ნაწილად ქცეული Maserati აგრძელებს ინოვაციების გზას. Maserati არ გახლავთ უბრალოდ ავტომობილი – ეს არის ცხოვრების ფილოსოფია. ყოველი მოდელი მოგვითხრობს ისტორიას სიჩქარის, ინოვაციის და დაუოკებელი ვნების შესახებ.
ნეპტუნის სამკაპი კვლავაც რჩება იმ ძალის, ენერგიის და უძლეველი სულის სიმბოლოდ, რომელიც Maserati-ს ყოველ მოდელშია ჩადებული. ეს არის ბრენდი, რომელიც მუდმივად მიიწევს წინ, მაგრამ არასოდეს ივიწყებს თავის ფესვებს – იტალიურ ვნებას, ინოვაციას და სრულყოფილებისკენ სწრაფვას.
რუბრიკის „ყავასთან საკითხავი“ წარმდგენია Dunkin’.
